《兒童危重病基金》陳心遙
《信報》2018年3月21日《視線所及》專欄
上個月因為動畫配音嘅工作，出席咗一項包場活動，係電影公司同一個名為「兒童危重病基金」合作，請咗一班正在醫治重病，同埋從危疾中康復嘅小朋友睇戲。影後同基金嘅成員同埋義工傾偈，知多咗關於香港兒童危疾嘅問題。
其實全球每年有1000萬個兒童，因為各種理由而喺5歲或之前離世；當中最少有600萬嘅死因都係因為一啲相對輕微，譬如肺炎、腹瀉、瘧疾呢啲病。喺香港我哋算幸運，絕少因為延誤診治一般嘅傳染病而死亡。不過，香港有唔少小朋友，患上好多罕見嘅重病，譬如兒童先天免疫缺陷症、肌肉萎縮症、白血病、腦腫瘤等等，一方面小小年紀嘅病人要承受病痛嘅煎熬；另一方面，醫治呢啲病嘅藥非常之昂貴，佢哋同父母承擔莫大嘅經濟同心理壓力；我哋嘅醫療系統，喺設備同技術上，暫時未必照顧到佢哋嘅需要。所以十幾年前就有香港大學兒科部成立咗呢個基金，目的係改善香港病童嘅治療同護理，佢哋仲希望透過基金，幫本地嘅醫護人員去海外，交流有關患重病兒童治療嘅研究經驗，多年來仲資助唔少兒童，去購買昂貴嘅醫藥，為佢哋燃點康復嘅希望。
當日其中一位義工係曾經被幫助嘅人，佢好記得當時好彩有基金嘅支持，佢嘅小朋友先可以健康成長，所以更想幫番而家有需要嘅家庭咁話。
特別要幫助兒童，因為小朋友永遠係社會嘅希望，你唔會知道眼前嘅細路可能係聽日對社會有好大貢獻嘅人，愛，係能源，會流動出去嘅。曾經有一個11歲嘅小妹妹，讀緊小學五年班，母親幫佢梳頭嘅時候發現佢後腦凸起咗一嚿，醫生本來以為係一個水瘤，開刀切咗佢過幾日就會好番，點知一開刀，發現事不簡單。醫生確認佢頭骨入面生咗一個湯碗咁大嘅惡性腫瘤。呢個位置比較罕見，當時醫院只係接觸過兩個案例，其中一個已經不幸病逝。
呢位妹妹相對幸運，做完手術就成功將腫瘤切除，不過跟住先至係考驗嘅開始，化療嘅痛苦我諗好多人都可以理解。呢個妹妹後來入咗醫學院學醫，相信佢而家已經係一位醫生，應該會用番當時醫治佢嘅人嘅愛心，去看待佢手中嘅病人。
醫療其實先係香港社會繁榮嘅基石。每年嘅醫療開支相比起香港嘅GDP其實一啲都唔算多，但係就支撐咗香港人每日無後顧之憂，衝鋒陷陣去工作。所以無論係醫院硬件同培養本地醫護人員嘅軟件，只有嫌少不嫌多。
#兒童危重病基金 #信報 #陳心遙
水瘤開刀 在 關於卵巢水瘤腹腔鏡手術 - 女孩板 | Dcard 的必吃
今天去醫院看婦科，因為之前去婦產科看經痛時發現有水瘤，婦產科建議到醫院手術拿掉，所以今天去醫院看醫生了，醫生說要做腹腔鏡手術拿掉， ... ... <看更多>