【龔成問答信箱】（Q14561-Q14580）
Q14561：
龔成老師你好，我一直有留意您的專頁，實在十分感謝您的無私分享。本人深受您主張的價值投資影響，故在今年開始投資股票。
但是，有時候股市的走勢令我費解，就如海底撈（6862）。明明近日疫情令海底撈550家中國門市停業至今，估計損失超過7億元人民幣，損失還可能會繼續擴大。而且，長遠的影響還未明朗。
但是，6862的股價反而在近日上升。請問這個情況應該如何解釋？是否因為大家都期望疫情造成的影響有限，不影響企業長遠發展，所以才繼續追入和持貨？
如獲回應，不勝感激。祝老師在新一年財源滾滾來和身體健康。
龔成老師：
因為市場以「預期」的模式運作，你的想法「無開店，有損失，股價跌」，是一種正常的直線思維。而股市卻是一個好難捉模的模式。
當市場預期「只是如此」「比想象已好」「現時是差，但差的情況已略有改變」，都有可能令股市向上。
早前，當中國的初期肺炎爆得勁時，市場處於「略恐慌」狀態，這就有可能出現下跌的程度，比經濟轉弱情況為多的情況。
當市場開始消化這事情，就會去到理性面，只要情況無太大的惡化，市場都有機會視為好消息。
不過，要解釋股市是困難的，因此，我經常說不要「預測股市」，不要著重中短期市況，因為股市往往無得估的。
你只要著重企業的基本面，唔好理過往升跌，分析翻這股的業務層面，海底撈（6862）業務不差，有潛力，但一直都貴，現價仍是，因此，這類股小注投資好了。
記住，唔好「解釋大市」，唔好分析短期走勢，集中分析企業長期質素，前景，以及平貴。
------------------------------------------------
Q14562：
老師 想問下 若果想草首期買樓，但亦想在未草到首期前將資金投放入股票 這樣正確嗎？
可是若果差不到草到首期了，卻發現之前投放落股票亦在蝕緊 都應該換做現金嗎？
還是應該分開草？即草首期 和 買股票分開？
謝謝
龔成老師：
要睇你準備買樓的時期，如果仲有3年以上，咁就要好好利用股票去進行增值。因為我地投資股票，中短期一定會有波動，但如果是優質股，長遠價值一定向上。
但始果你將會在1年內買樓，就未必能夠投資，因為無人知你賣出股票時的股市情況，因此，應該集中儲現金。
------------------------------------------------
Q14563：
Sir，請問深高速處高位嗎？還可以買嗎？還是待回落再買？謝謝！
期待老師新書！
還有，有其他公路股值得買嗎？
龔成老師：
深圳高速公路（0548）的確升左好多，比我書最初推介時升一倍以上，不過，由於佢的賺錢能力的確增加左，佢的企業價增加，令到佢這刻股價雖然高，但仍未去到貴。
這刻可以理解為合理區中上部，只要不太大注，以小注分注模式，又或月供，仍是可以的。
至於其他公路股，你都可以考慮，例如灣區發展（0737），雖然股息減左，但潛在增長力正增加，當然，佢比過往的風險度增加左少少。
------------------------------------------------
Q14564：
成sir 想問下1044
還是384 比較有質素？
龔成老師：
恒安國際（1044）本質唔差，不過近年中國消費弱左，對佢都有影響，相信之後能保持平穩增長。
中國燃氣（0384）的增長潛力會大D，因為行業受惠國策，同時質素會好少少。
------------------------------------------------
Q14565：
老師，我最近有留意到一隻長者用品上市公司股票 - 恒智 8405。
恒智係提供全面長者服務。我個人認為香港的長者市場會日漸增長。我想聽聽你意見
龔成老師
恒智控股（8405）主要於香港以「Ｓｈｕｉ Ｏｎ瑞安」及「Ｓｈｕｉ Ｈｉｎｇ瑞興」品牌經營安老院舍，亦銷售長者相關用品（如成人紙尿片、營養奶、其他醫療消耗品及日常用品）及提供保健服務。
市場的確不差，長遠有發展，不過，這企業規模並不算好大，未有太大的優勢在其中，同時由之前上市已不平，到現價，仍算合理區頂，考慮到企業質素後，投資價值只算一般。
------------------------------------------------
Q14566：
老師你好。之前聽你分享獲益良多。本人27歲，收入唔算多，但半年前坐言起行開始月供股票，供緊66同2800各2000蚊，而且學你之前所分享訂立目標，然後返兼職去加大自己收入，同埋繼續睇緊你書增加知識。
想請教吓你幾個問題
1. 因為我之前有買過恒生銀行嘅紙黃金。請問紙黃金適合以月供方式進行嗎？我現時有8錢，每錢平均價約1402。
2. 我最近會出雙糧(約15k)。我想將啲錢投資潛力股，我屬於中低風險嘅人，請問比亞迪好啲定福壽園好啲？(但福壽園冇得月供要一手買) 定係加大我2800及66月供金額好啲？
3. 對我嚟講，香港樓真係好貴，上車好似天荒夜談。如果與男友合計收入有4萬，現儲蓄有25萬左右，有冇上車嘅機會？可以點步署？
多謝你願意解答我哋問題
期待你嘅回覆
龔成老師：
1）你可以利用月供，去投資黃金，黃金在我地的財富分配中，都可以佔一席位，不過，唔建議投資太多。因為黃金始終無現金流，投資的價值不會太高，只能在組合中，作為對沖黑天鵝的角色。
所以，月供股票是你的重心，黃金佔少少就夠。
2）如果你只是中低風險的人，最好就是加大月供盈富（2800）及港鐵（0066）。
3）有。
不過，你地要有一個長期的計劃，唔會一步登天。首先，你地要加大儲蓄，同時保持投資，令財富有更大的增值，你現時月供$4000不足的。
另外，增加投資知識，好好利用現金把握機會。
以你地的情況，財富仍有一定的增值力，建議你多增加投資知識，在選股、企業估值、投資時機上落功夫。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
我相信，只要你地有共同的計劃，數年後可以累積到$60萬-$100萬，要投資物業作首期可以的。
------------------------------------------------
Q14567：
現想買入恆地做長期投資，恆地每年10送一，4%利率，只要股價保持，每年回報近15%，預算10年後有600萬退休大/半退休，恆地幾錢買入比教好？
龔成老師：
恆基（0012）有質素，相信長遠仍有一定的增長力，但能否每年有15%增值，則未必，因為近年的增長已略有減慢，但我相信仍是好有投資價值。
現價合理，可分注投資。
雖然你可以投資，但不建議全部集中在一隻股票，應該建立一個組合。
------------------------------------------------
Q14568：
龔sir，我過多一個月就27歲，因兩次轉換修讀的學科，致2019年才剛畢業。儘管我求學時很努力，邊讀書邊工作（做著我不喜歡的須輪班工作）。
現在我畢業後裸辭了卻多個月找不到適合的工作，現時就替工開的士，掙的收入還可以過活。
我想請求指導下我該做些什麼，有看你在股票班推薦的書卻未能堅持全力研究，也不完全知道自己確實想做什麼工作和方向，到處見工都要求經驗，學無所用，頹廢感。
龔成老師：
你這刻最重要的，是提升動力，睇書、做運動、多做自我激勵，同時，要設計一個時間表，令自己除左生活外，有一些空閒時間。
同時，你要好好想清楚自己的長遠發展，只要你有大目標，就可以有好多路行，一條路唔得，就試下行另一條路。
如果你之前找工作困難，不一定是你的問題，可能是市場對這類職位的需求減少左，你就要試下轉一轉，其他行業可能都有一些職位，能成為你完成最終目標的切入點，你可以從這方向去想。
------------------------------------------------
Q14569：
龔成老師，你好！我26歲，月入$25000-28000，會每年跳point，每月可草到$13000(不計保險費)，現上手上現金4萬，持5首9988($207買入)
本身自已買左
-醫療、意外、嚴重危疾保:每年交$18000
-20年儲蓄保:每年$36000
只俾左一年$36000 煩惱緊應唔應該退保？
(原因係太守，係呢個年紀上應該用錢係先財富增值既攻?! 同埋上年買既時候完全未有理財觀念，只聽保險經紀建議T^T)
睇完你俾大家嘅建議
2020年好想開始月供股票(尤其係盈富)
我應幾多錢係月供票？幾多自己草/留係適合時機買入？同應該點分配同組合？
另外 ，月供3-5年以上後，應供到什麼時候停/放/轉？
呢幾年預計要用15萬讀書
目標想在30歲有100萬，還有可能嗎？
需要副業增加收入？
龔成老師：
我地理財，要做到攻守兼備，你這年齡，的確可以進攻多一點，不過，我地都不能忽視防守的重要性，以你的收入及投入到保險類的比例，都算在合理範圍，不過多。但不建議你再加，你之後保持供這數就得。
另外，如果你打算幾年後要有$15萬資金作讀書，在投資上有部分資金就不能太進取，同時要留一定的現金。
我相信你仍可以有$5000去做月供股票，你集中供盈富（2800）可以的，餘下就努力儲現金。要30歲前有$100萬，不是不可能，但你除左要努力保持月供外，同時要每月彼到現金$5000左右，當見到大市回落，要有把握機會的能力，同時在這段時間，學好選股，這就有機會做到。
另外，阿里巴巴（9988）是不錯的優質股，同時有增長力，但這類潛力股，唔能夠太過集中，你之後唔好要增持，持有原有貨好了。
------------------------------------------------
Q14570：
本人27歲，月薪大約2萬2左右，每月大約可以儲8000左右，手上有6萬現金，現時有以下投資組合，希望老師評價下：
778置富：9.2@6手
1475日清：4.0@6手
468紛美: 3.5@5手
6823香港電訊:12.3@1手
請問有無可以改進空間？投資組合上會否太保守？
個人睇好日清在中國市場的潛力同發展，所以會希望等股價下跌時再加注。
另外2019年初已經每月月供匯豐，5千蚊一個月，如果轉供港鐵（66）會係更合適的選擇嗎？
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。你以上所講置富（0778）、香港電訊（6823）、紛美（0468）和匯豐（0005）都係收息類，增長力欠奉，所以都唔適合你。
日清食品（1475）的生意的確有所增長，至於盈利，有波動，始終這企業有品牌，香港及大陸的業務都不差，優質度都有，算是平穏增長型，此股可選擇，但現價少少貴。
我建議你組合集中翻係"平穏增長股"和"潛力股"上，以下的股票都優質和適合你年紀，你可以參考下︰
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（0388）、深高速（0548）
潛力股︰比亞迪（1211）、中生（1177）或福壽園（1448）。
------------------------------------------------
Q14571：
老師想問下京信通信（2342）, 中興通訊（0763）, 1299 的目標價是什麼
285 係咪唔好買啦 & 1211 仲可以買?
經常聽到月供？ 點樣先係月供？要供how long?
龔成老師︰
我唔會為股票定下一個目標價，其實一隻只要一直保持優質，我地係唔需要將佢沽出。而你所講3隻股票中，京信通信（2342）質素較為一般，唔建議持有太多，其餘2隻長線持有無問題。
比亞迪電子（0285）近期升了不少，已開始在合理區中上部，除非月供，否則就等一等唔好買住，最多小小注。而比亞迪（1211）而價依然在合理區偏低位置，可以買入，如果回到$35入貨會更好。
簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。
形式就是每月投入相同的金額，買入同一隻或多隻股票，並持續進行。
例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。
總結這三個月，投入了的資金為$30,000，累積股票為1019股，平均買入價為$29.4。
由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。
要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3-5年以上，當然長期保持月供就更好。
------------------------------------------------
Q14572：
龔成老師你好，我係投資班既學生，上堂後都有跟從老師教導的方法，選擇優質及有潛力的股票作投資。
近日家人見我投資穩定，想我幫忙做投資。因為父母約8年後退休，想每月有息收，因此想問老師意見。
即時可動用的投資金額約60萬，我應該先投資多少金額及保留多少金額？及月供股票的比例應該是多少？
我想問以下投資組合可以嗎？
盈富基金（2800）；港燈（2638）；中電（0002）；港鐵（0066）；恒基（0012）
好需要你俾意見~幫人投資有壓力
Thank u so much!!
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你父母在8年後退休，策略上要保守一點，平穏增長股和收息股在整個投資組合中應各佔一半。你所選的組合，盈富基金（2800）；港鐵（0066）；恒基（0012）是平穏增長股，而港燈（2638）；中電（0002）是收息股，都是適合之選。
但港燈（2638）和中電（0002）算是同類型企業，會有過集中風險，你可以將其中一間轉為香港電訊（6823）、工行（1398）或匯豐（0005）。
現時大市在合理區，60萬現金可以先將首30萬用"分注形式"買入上述股票。其餘30萬就等機會，當大市出現一定程度的下跌，就可以動用現金去投資，在平宜價加大力度掃貨。
當你父母將近退休之時，再將整個組合慢慢調整至100%收息股，讓收息股為佢地創造現金流，去支付佢地退休生活開支。
------------------------------------------------
Q14573：
Hi 老師，我留意到你既答覆，你推薦12，我有以下問題：
1. 因為佢比其他發展商有更多既土地儲備，所以值得長期持有，抑或有其他因素？
2. 現價可否買入？
多謝解答！
龔成老師︰
1） 我以往經常講恆基（0012）是有質素的股票，前景正面，主要係佢係香港發展商中持有最多農地。
預期政府會慢慢想方法發展這些農地，這會令佢盈利潛力增加。長遠會因此而受惠，前景正面。
2） 現價處合理區，你可以月供或先入分注都可以，之後長線持有。
------------------------------------------------
Q14574：
老師 我係你學生
之前問過你6869
但由33.2 跌到而家15-16
你覺得我應該繼續等 定轉去買2128
因為睇報表 6869 呢d光纖股係中國有好多競爭對手 導致d光纖愈做愈平
反而我睇過2128 報表靚仔 中國需求量大 而且佢好似係龍頭 你認為我要放棄6869 轉去2128？
龔成老師︰
長飛光纖光纜（6869）長飛光纖是內地光纖業的龍頭， 光纖行業大致處於寡頭壟斷競爭狀態，佢始終有一定優勢。
全球光纖光纜市場，仍會保持向上，智能手機、互聯網、大數據等科技，都會持續推動行業增長。
而中國聯塑（2128）業務有質素，但這股在《50值博倍升股》初推介到現時，已升了一倍有多，現時已過了平宜區，不過仍未算貴，有長線投資價值，但投資值值博率比過往少左。
其實2者都有潛力和質素，但此刻以股價去評值博率，長飛光纖在合理區偏低位置，而中國聯塑就在合理區較頂水平，故會係長飛光纖值博率較高。
------------------------------------------------
Q14575：
龔先生，你好，本人則35歲，同老婆剛結婚，兩人月入共5萬，有200萬現金，依家兩人租屋住，月租15000，我哋想買600-700萬嘅樓，請問現在是否時機？
龔成老師︰
長期而言，香港樓市潛在需求依然大，加上供應不足，因此長遠仍會向上的。
記住我地投資樓市，唔好以「預期」的模式進行，只要你資金足夠，堅守「供得起」原則，而樓市唔太貴，已可以買入。
香港樓現價略貴，投資價值的確較少，但自住價值仍在，你唔需要擔心買入後樓價的升跌，因為你買入後，影響的是供款。
現時香港樓價比合理價，依然稍為貴少少。但你唔好因為咁樣乜都唔做，你要開始慢慢睇樓。一旦遇到一些心急業主，或樓市再向下調，令樓價下跌10%左右的話，你已經可以入市。
------------------------------------------------
Q14576：
老師：我歷史高位買咗6手3號,而匯豐是在70元買的（4手）,不知道怎麼辦？是放棄買阿里,定長揸收息？
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
煤氣（0003）和匯豐（0005）都有質素，前者有平穏增長力，後者則比較適合收息之用。雖然近期隻股票都跟隨大市回落，但其本質並無出現問題，長線投資價值還在，你可以維持持有。
至於阿里爸爸（9988）佢有質素、長遠有發展潛力。但現價己開始貴，如果你想投資此股，最多只可小注。
------------------------------------------------
Q14577：
想問下呀Sir，我依家每個月17000底薪，而自己份工每季都會派錢，所以想問下，如果我現時現金唔多，每個月可以儲10000左右，應該拎幾多錢去月供。
因為我上過你堂，而且又有一定估值能力，只不過怕自己唔夠自律儲現金入市，所以如果10000蚊入面幾多係現金幾多月供。
而月供入面有可以點樣分配係以下既股票？（0003, 0823, 2800, 0066）
龔成老師︰
由於現時大市處於合理區，你每月可用的$10000，我會建議你先用5成去做月供，其餘先儲起，用一邊月供一邊儲蓄的策略。
至於你所計劃月供的4隻股票，我建議你資金分布用$2000落在盈富（2800），而煤氣（0003）、領展（823）和港鐵（0066）就各供$1000。
至於儲起的5成資金就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
------------------------------------------------
Q14578：
sir, 您好! 有事想請教您：
我琴日喺FB見到您一篇文章，當中內容如下：
“例如該迷你商場舖的售價是$100萬，發展商保證頭兩年，每年有5%的租金回報，即是每月有$4000的租金收入，這表面很吸引，但實際上只是減價10%。”
阿sir, 恕我井底之蛙⋯⋯請問$4000係點樣計出嚟㗎？
謝謝阿sir解答。
龔成老師︰
這個每月租金$4000計法是︰
（商場舖的售價 X 租金回報率）/12個月
= （100萬 X 5%）/12
= $4,167
在投資這些迷你商場舖時，唔好因為這9折而覺得很優惠就去投資。你要清楚分析，商場位置、人流、客源等因素，是否有利於你業務﹐才去決定是否投資。
其實，這些舖的投資價值好低。
------------------------------------------------
Q14579：
請問一下現時003，0012，0066是否都處合理價?
謝謝你
如果我要8年後從股票得到每月2萬元，我現在應該每月月供幾多錢同如何分配到邊幾隻股票上呢？
龔成老師︰
煤氣（0003）和港鐵（0066）已經開始有少少貴， 而恆地（0012）則在合理區頂部。
如果你希望8年後每月有2萬蚊現金流，以股息率5%計，你需要本金480萬。再以恆指年均回報10%計（連股息再投資），你每月大約需要投資$37000，8年後就會增值至約500萬。
策略上，每月供$20000，選股方面可以利用平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）或潛力股︰比亞迪（1211），中生（1177）或福壽園（1448）。
至於另外$17000就先儲下等待機會，當大市出現一定程度的下跌，就可以動用現金去投資，在平宜價加大力度掃貨。
到你增值到480萬，再將組合慢慢轉成收息股（5%或以上），就可以創造每月2萬元現金流。
------------------------------------------------
Q14580：
成哥 有啲ETF嘅問題想問下你意見
最近我研究緊一啲做多嘅ETF 例如 7200兩倍看多恒指 TQQQ納指3倍做多 交投量都多
在熊市期間月供7200/TQQQ 理論上長線回報係咪等於恒指兩倍/納指三倍
龔成老師︰
ＦＬ二南方恒指（7200）的投資目標，係追蹤恆生指數每日表現兩倍（２ｘ）的投資業績。而TQQQ則是3倍放大納指的正向ETF，我一向對這類槓杆產品都有保留。
佢地係放大左指數的工具，但由於有槓杆成份，因此一定有誤差，同時當中會有管理費等（這將會慢慢影響你的回報）。
如果長遠恆指向上，7200的獲利會有原本投資盈富（2800）的兩倍，當然，若然恆指向下，你的虧損都會放大，你要明白這點風險。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
