【誰是下個莫札特】
同來自世界各地嘅人交流，都算係的士佬福利之一。有俄羅斯珠寶商問邊度有雞叫，亦有同智利攝影師講香港夜景嘅利弊，今次就載到一對來自奧地利嘅遊客。
喺上環某的士站，路過見到人比車多，就跟埋去攞客。未上車之前，同男女乘客已經四目交投，互相點一點頭，上車整返句Hello，氣氛都好好多。一上車，大大張寫住「天璽1」嘅紙遞上嚟，非常清晰，值得一讚，美中不足嘅係無寫行咩隧道，唯有一邊開車一邊問，多數都行西隧無誤。點知，男乘客聽完點點頭，講句Okok然後叫我講慢啲，莫非我英文真係咁差？重複一次問題，總算令佢哋明白同同意行西隧，本以為話題結束，反正言語唔係咁通，快快手搞掂就算，點知女乘客講多句「唔好意思，我哋英文唔係咁好。」引起我嘅好奇心，又再傾落去。
「你哋喺邊個國家嚟？」
「奧地利，」可能見我無乜反應，再補充「德國附近嗰度。」
「噢噢！奧地利！我好想去呀，莫札特出世嗰度，仲有sound of music，我都好鍾意。」無論來自世界各地嘅遊客，愛國心都唔弱，真係令國民討厭嘅國家少之又少，所以讚吓人哋嘅本土文化，一般都有正面回應。
「係呀，就係奧地利。不過莫札特，我哋唔鍾意，佢好慘，細細個就被爸爸迫住做嘢。」呢句評語咁熟口面嘅？乜唔係香港小朋友嘅寫照？「哦，我哋香港人又唔覺得佢好慘，成千上萬嘅父母都希望子女成材，莫札特三歲識音樂（唔知作曲英文係乜），我哋小朋友三歲都識好多嘢。」
「Really？（真係㗎嘅tone）三歲小朋友應該去玩。莫札特真係好可憐，佢嘅作品好多都係為咗錢而作，可惜都係好年輕就死。」女乘客好感慨咁補充。「我哋香港好多小朋友都識音樂，好多中學前已經考到認證資格。」以我所知，確然如此，再引來另一句Really。「Really？咁你哋有咩出名嘅音樂家？」「無㗎，認證資格淨係要嚟考中學考大學用，出名嘅音樂家出名嘅原因，係因為喺唔恰當嘅地方玩音樂而被打壓。仲有Celine囉，不過佢喺香港都無呢啲比賽去發揮。」其實我仲想講音樂家嚟香港演唱，都有被捕嘅風險，不過太難表達。
「我哋都有聽過Celine，真係好叻。咁點解咁多父母要子女學音樂？佢哋想子女做到莫札特？」男乘客可能聽得唔清楚，我嘅答案解除唔到佢嘅疑惑，唯有簡單講多次。
「No，父母未必想子女學莫札特，但佢哋都想學莫札特嘅父母，迫子女跟佢哋預計咁成長，同搵錢。學音樂對考好學校有幫助，所以就要學。」
男乘客搖搖頭，顯然仲未明白香港發生緊咩事，我睇對於外國遊客而言，呢個情況確實係難以理解嘅，女乘客一句句嘅Really，已經反映咗兩地文化嘅差異。「Really？You keep it。」臨落車都引到佢講多句Really，找散紙畀乘客，可能又係另一件幾罕見嘅事。
如果莫札特生於今日香港？可能35歲都去唔到，又要投過胎喇。
#lazytaxi
#的士
#taxi
#我的你的紅的
作曲英文 在 用台灣總統蔡英文的鼻子來作曲｜哥倫布Columbus 原創歌曲 的必吃
... <看更多>