【惡頂奶奶都只係得一個】
復課以後，學生物流嘅需求就出返黎。
兩個女人，兩個小朋友，一部BB車，人只係啱啱好坐滿，已經令人感到車廂被塞爆，大概係小朋友嘅喊叫聲，加上兩個女人嘅對話，收窄咗車廂空間。
「我大洗？我點樣大洗呀？你個仔就大洗喇，政府嗰一皮你見過未？佢直接入咗馬會喇。」抱住BB嘅女人話。另一個女人嘅回答，我由頭到尾都聽唔到，好細聲咁講，好似驚小朋友會聽到。
「啲錢係佢嘅？咁你又話我大洗？你有我呢個新抱執到啦，俾著其他人，你個仔俾人飛咗好耐啦。」新抱瞪大眼好不留情咁樣鬧奶奶，就咁聽覺得佢好惡，聽到內容又覺得好合理，與此同時我只希望個小朋友唔好再用巴士車仔打我個頭枕。
然後係長時間嘅沈默，正確黎講，係奶奶講緊嘢，同樣係無聲無息。
「我地無老人院架，唔會要你去老人院，我阿媽唔會去，你都係我阿爸阿媽，唔會送你地去老人院，你地係得一個。」聽到呢度我就覺得好感動，奶奶聽到有咩感覺我就唔知道，只係又進入長時間沈默。
「我唔大洗啦，用嘅都係必要。你黎我地屋企食飯先搭的士咋，平時都係拖住呢兩隻嘢搭小巴啦。我點樣大洗呀，我又無公屋住。」跟住講嘅嘢都愈來愈個人，而且重複又重複，唔多講喇。
落車嘅時候，新抱抱住BB，奶奶拖住小朋友，小朋友又要捉住細佬隻腳，拖拖拉拉，寫下家中難唸的經。經常都有婆媳喺的士開火，可能呢個係難得地磨心唔喺度嘅地方。作為男人，我有重大利益衝突，不過我覺得男人同時作為人地老公同人地個仔，最理想做法就係分隔兩方啦，鍾意同一個男人嘅女人們，好少有和平共處嘅空間。呢一對算係好好喇，雖有火花，同場有愛。
BTW，係沙田區，師兄自己留意返係咪自己女人。
lazytaxi 在 我的你的紅的- Home 的必吃
我的你的紅的. 33969 likes · 6 talking about this. 香港人的的士，我的你的紅的。 ... <看更多>