［有線又蝕4億：捱唔捱到30周年？］有線（1097）業績，多圖，建議睇medium版
好耐冇寫medium，倒唔係咩恩怨情仇。我一向都係多圖嘅文就貼呢度，雖然慢慢地進化到可以唔多用圖。但呢類業績文都係呢度寫好。唯一問題就係，有個都市傳說，好似話medium嘅文，Facebook會自動壓低啲reach．唔知係咪係，以往啲medium文都不乏好多reach嘅，如果呢篇少，亦唔知係因為篇文廢丫，定星期日出丫，定點。
1. 小小利申，我由93年開台開始睇有線（當年點昆到老母訂架呢？定其實根本係佢訂？），到而家。由蔡康年做YMC台睇到佢去我中學做評判，玩到我上佢TVB節目之後腥綿拿同佢合照。呼，青春。而我剛剛續咗兩年有線約，心諗，會唔會變苦主呢？2023年就係有線30周年，你估到時檔嘢仲存唔存在？
2. 真係差不多整整一年前，我在呢度又係寫過有線業績，又係蝕到仆街（http://bit.ly/2SkrDEG）．今年嘅業績，大家可以去睇下（https://bit.ly/2ygALV2）。但唔得閒嘅，都係聽我講啦。
4. 拿，幫你深晒，就在呢度。數幫你入晒，半年業績都幫你搵埋，上下半年都幫你拆散埋，有埋分部。其實好快手，不過我都冇玩好多年，呢啲血汗嘢一早有助手做啦。
5. 咁睇返，都真係冇乜特別，一如預期咁大鑊。19年蝕4億左右，少過之前嗰年蝕4億半，值得飲杯。下半年好似仲蝕少咗啲，值得恭喜。但，迫伊汾？諗你都唔使諗。
6. 拆分細啲，按年比嘅，收入平穩，半年計仲要升。製作成本就縮，按年同半年都係，SG&A（Selling, General & Administrative Expense，唔識就知你外行）亦係咁。幾明顯因為縮皮，減成本，炒人。慳到好多的。融資成本，即係利息開支，大升(發咗債，陣間講），但整體都係蝕少咗，按年半年都係。
7. 另外分返石文睇。計分部業績。你見其實電訊分部係賺錢嘅，按年改善不少添。當然就係惡名昭彰嘅有線寬頻，仲有電話，仲有不方便的中移動（陣間講）。亦即係，電視部份，比你想像中蝕得仲要多，但按年都係改善。做乜半年冇數字？因為半年時佢仲分咗舊「其他」，數目不大，但費事煩。
8. 不過留意分部業績加埋唔係你見嘅大數，因為仲有啲阿公嘢，企業層面，不能分類。計晒就係最下嘅經營虧損，同上面對到。然後仲有融資成本，又係分唔開計。稅都係，「蝕錢都交稅，真慘」。計埋呢兩舊咪個凈虧損
9. 好似改善咗少少，但，杯水車薪。唔好忘記舊年第四季情況應該幾差（社運嘛），今年仲要加埋肺炎，唔使講你都知啲廣告收入會點。仲要啲體育大事取消埋。你話點算？
10. 況且，就算可以保住蝕少啲，我都懷疑公司仲頂唔頂得住，仲有幾耐命。上篇嘅題目講咗啦，蝕錢唔緊要，你蝕唔蝕得起先？
11. 睇圖，有線帳面值（又叫股東權益），家下6.4億。就已經係計及2019年蝕嘅4億，仲因為中途供過股（見唔見年中係升到去8.3億？）。但仲玩得幾耐？我當你今年蝕少啲，3億，都即係兩年多啲公司就negative equity，資不抵債了。一間公司到咩位先要叫救命，有啲難量度。但簡單嚟講，而家就要了。有線隨時再集資，唔會令人意外
12. 問題係 ，仲有咩人落搭？有線2017年供過一次股，集咗7億，仲其實九倉免咗3億債。但話咁快燒晒（18 19兩年都蝕咗近9億），2018年尾又玩咗次一供一，被否決。2019年1月中又整個新方案，都唔夠兩星期，快過你去cut有線。呢次四供三就過到，集咗4億幾。再加埋發咗CB，另外集多2億。
13. 呢度要講下CB，Convertible Bond，行內人（其實只有我一個）戲稱冬蟲夏草。本身就係Bond，借錢畀公司，多數都平息。但有個option可以換股。咁當然係股價高先換，街買1蚊唔通我5蚊換咩。而家隻CB換股價係0.125，有線股價0.05左右，繼續努力。但其實成交極細，市值又低，要忽然夾上去未必唔得
14. 簡單一句，6.4億book，你一年蝕緊4億，今年可能仲唔止，再唔集資，好快資不抵債。但供股我懷疑仲有邊個肯制。
15. 另外留意，一日未換股，一日隻CB都仲係債，即係要畀利息。雖然唔貴（2%)，但始終供股呢，就真係有錢「入咗去」公司。你借錢，貸款，或隻未換股嘅CB呢，就只係負債，幫到公司出糧找數，但對財務狀況係冇幫助，甚至更差的。可以睇下有線嘅Net Gearing，即係凈負債佔帳面值幾多巴仙。凈負債，就計貸款同埋CB，減走現金。因為出咗隻CB，而同時個帳面值又因為蝕錢而跌咗，Net Gearing由18年尾41%，升到去19年尾68%。下年再蝕錢啦喎.....唔好忘記，啲利息開支都因為隻CB升咗（雖然再講一次，唔貴）
16. 簡單嚟講，係死局。除咗執笠，我相信出路就係染紅，應該冇第三條路。事實而家已經紅紅地。管理層業務回顧，第一句就講中國移動，帶嚟嘅收入。當然上篇都寫過，其實一間電視台而家仲有幾大影響力，我幾懷疑。有線呢十幾年，年年蝕錢，加埋蝕咗差不多30億。即使對任何富豪嚟講，都唔係少錢，仲有邊個同你癲？富豪係多錢，但30億我可以做幾多嘢？
17. 當然你可以發起一人幾舊水救有線。但，如果呢樣嘢成功，就唔會搞到今日咁啦。問題其實正好相反，有線唔係冇人睇，係已經好多人睇。有線成80萬用戶，仲有幾大增長空間？而台費方面，又有冇加價空間？唔好忘記你選擇多咗好多，可以睇Netflix，可以訂閱埃汾啲專欄。時間就得咁多，對手越嚟越多，你做內容嘅，又要背住咁大成本嘅，點玩？
18. 所以，有線三年內執笠，我唔會好奇怪。唔係話必執，但應該有可能。未執嘅係邊間？梗係人人得以誅之嘅大台TVB。今篇反應好就下篇寫。
19. 你話，Now同Viu又如何？其實FB Page 寫過（https://bit.ly/2wASZQN）。簡單嚟講，電盈有極之賺錢嘅電訊業務，養住兩檔電視咯。你計大數，我幾肯定Now同Viu蝕得仲甘過有線。不過因為冇獨立上市，好難計，但有得估，educated guess。
20. 最最最後補一句，早排問起，而家啲小朋友，都唔係好知有線「原本」係邊個的了。九倉真係甩身快，吳光正雖然名氣好似不及其他幾大家族，但眼光其實都相當好。
