【原來《低俗殭屍玩出征》劇集版仲好笑過套戲！🤣】
事前一直都想睇，但好難想像點樣將套戲撐足兩個season（第三季明年），都唔想破壞咗對套戲好感，一直都冇的起心肝睇。見艾美獎勁多提名，好奇開嚟睇吓，一睇就上癮，堅係停唔到，集集都笑到標曬眼水，有幾集笑到要停一停，唔係你真係笑到睇唔到落去！我諗，係我今年笑得最開心嘅劇或電影。
故事同套戲差唔多，都係講班吸血殭屍喺現實社會戇鳩鳩咁生活，而又有班攝製隊去拍紀錄片－－劇集連攝製隊都玩埋，笑到癲！劇集版冇戲咁連貫，感覺就係「吸血殭屍版愛回家」咁，一集一個小故事，設想到更多唔同吸血殭屍會遇到嘅生活「難題」，都牽涉咗好多「吸血殭屍」題材會遇到嘅嘢，例如有班小學雞狼人同佢開片，又例如無啦啦會有個低低能能「狙魔人」（Van Helsing，唔劇透係邊個啦）出現，吸血殭屍同人類、鄰居又點共存，仲會有咩roommate，甚至連喪屍、惡鬼、殭屍王都走埋出嚟，最智障係殭屍王吸錯醉酒佬血會Hyper咗😂「永恆怪物代言人」Doug Jones（《忘形水》隻人魚）做咁多sad爆creepy角色，原來喜劇感極強！
個人最鍾意一集講班低能殭屍變蝙蝠想去搞鳩個鄰居，點知俾鄰居拍暈咗，捉咗去愛護動物協會之類場所，佢班殭屍frd又用更低能方法戇鳩鳩咁去救佢，堅係笑到起腹肌。第一季有某一集仲要勁多大卡士串星，連幽靈刺客都走埋出嚟，癡線到底我睇緊啲乜嘢😂😂完全盡見班創作團隊無比創意，更佩服五個主角演出果時點樣忍到笑！
上星期有同大家講，近排人人都唔開心好低潮，不如搵堆喜劇睇吓，呢套一集得20分鐘，彼此之間都係獨立故事，冇乜連貫性，唔駛花你太多時間，可以得閒睇吓一集，但講真套嘢真係gag到你會一日睇完一季，然後笑到成個人爽曬。係，你宅在家中可以開套劇力萬鈞、一集一個鐘嘅劇睇，但睇呢套鳩流流無厘頭，又堅有創意嘅喜劇，同劇力萬鈞嘅「正常劇」一樣咁爽。
如果你鍾意《低俗殭屍玩出征》，呢套點都要睇，Taika Waititi都有份編劇同導演劇集版，佢導演果集大卡士版係第一季高潮，睇完我好期待佢套《雷神奇俠》第四集。
仲差最後幾集未睇要出一出去，忍唔住要同大家先介紹，睇完再詳細同大家分享。
《低俗殭屍玩出征》同「11部Netflix喜劇電影推薦片單」觀後感可看留言連結。
【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
