【電影吹水潭】
繼續清未睇嘅blu ray存貨。
尋晚睇Polanski 套《狂爸爸躁媽媽》Carnage。我喺臉書search 返，似乎唔少網友喺當年上映時（2011）都大讚套戲。我自己都幾鍾意波蘭斯基，2015 年嘅Venus in Fur超級厲害。《狂》改編自得獎舞台劇劇本，又有全演技派Cast，我點都有一定期望。不過，睇完呢套戲我反而覺得唔太好（以Polanski Standard黎講），雖則佢近年嘅戲絕大部份都係Underrated... 《狂》無乜悶場，演員好睇，一個廳做晒成台戲好考導演功力，但係成套戲有個好大缺點，就係唔係好有說服力。四位主角嘅對白有時好「為講而講」，令到成個劇情好唔流暢。成個劇情發展我係睇得好不明所以。
我估套戲嘅原著舞台劇可能係由一個 motive ：「點樣令到困住兩對夫婦留喺大屋內產生drama」而想像出黎，但係一開始就set死咗呢道規條，係舞台劇或者有趣，但喺電影黎講就變相加添咗限制。
就Kate + Christoph 走極都走唔到而言。基於個人性格係「話不投機半句多」，唔鍾意同三唔識七嘅人吹水，所以見佢地喺電影早段就第一次拎袋出門口，我就覺得好合理。我更加期待有咩好強而有力嘅情節可以令佢地回心轉意返入屋。點知就係無啦啦話飲杯咖啡，就令Christoph 呢個由頭到尾都覺得登門拜訪係多舊魚嘅角色乖乖地返轉頭。之後，無論邊個講到明話想走想走，但都係不了了之，一次又一次留返喺度講/聽「廢話」。 電影由兩對唔太認識嘅夫妻，發展到去四人半醉大混戰，中間過程好勉強。一開始佢地傾兩個仔嘅打鬥，四個入面有三個都表面客氣，一個乞人憎，係一個好好嘅人物同處境設定去建立戲劇張力。但係佢地無由呢度開始發展矛盾，好快就無再圍繞佢兩個仔嘅事繼續辯論。由講倉鼠開始，就好戲劇化啲對白，個過程好刻意去為兩方升溫，變成針鋒相對互揭瘡疤。
睇完嘅感覺係，成套戲好有目的，要不惜一切令呢兩對唔熟嘅父母留喺間屋，撕破大家嘅中產面具。呢份劇本好似無乜時間去改編，直接「搬字過紙」— 將舞台劇嘅表達型式搬去電影度咁。我越睇，就越難投入去呢四個人物當中，更遑論佢地各自嘅立場。
同其他Polanski 電影比，我覺得呢套係差咁啲啲。
#carnage #電影 #romanpolanski #katewinslet #christophwaltz #judiefoster #johncreilly #film
