【丁屋生意 馬照跑舞照跳】
721 兩周年，白衣人終被判刑，今年3月村屋大王王光榮因涉嫌套丁被廉署請飲咖啡，一度令人以為鄉黑末日終於來臨。咁諗或者過份天真，近日研究員發現，套丁活動疑似繼續活躍，地點仲要喺正屯馬線洪水橋站300米外嘅黃金地段。呢啲不法產業，好可能係政府部門咪埋隻眼下繼續「馬照跑、舞照跳」。
▌若涉套丁 發展利潤超過2億
事發地點喺洪水橋田心村，位處未來洪水橋新發展區核心地段，牽涉一幅面積達7000平方米嘅棕地，查冊顯示，地段由寶標有限公司(TREASURE TARGET LIMITED)於2017年購入，今年5月獲城規會批准填土以準備興建33間丁屋(申請編號A/HSK/299)【註1】。
相關地段亦被本研社今年5月發佈嘅《草木皆丁：發展新界潛在違規丁地可行性研究報告》(https://bit.ly/3nFeDcA )納入「潛在套丁土儲」，顯示相關地段有種種套丁跡象：丁屋群中明顯整齊均等分佈、留有屋苑道路、由公司持有、2年前亦有專屬屋苑而設嘅變電站申請獲批(申請編號A/HSK/164)【註2】。
一般來講，真正自住用途嘅丁屋絕少集體大量申請，因而毋須興建專屬變電站。申請文件透露，該變電站專為屋苑而設，而足夠證明該屋苑已有事先規劃，種種跡象顯示內情並不簡單，並不像一般嘅自住丁屋申請。
若該33間丁屋於建成後售出，按本研社早前透過業內人士訪問的估算，保守估計元朗區每幢套丁丁屋盈利達500－1100萬(2017年價格）【註3】。屋苑未來正正位於洪水橋站旁優越地段，價錢或許更高，盈利可以超過2億。
▌涉違規發展 既往不咎
更甚者，申請地段原來曾經被非法填土。根據規劃文件，申請人事情已將80%土地非法填土，經「有關方面」指正後補交規劃申請，如今非但沒有追究（例如罰款），填土申請更加火速獲批，毋須承擔後果。如果以此態度處理違規違法行為，若果屋苑發展後來被證實牽涉套丁，會否又既往不咎？
▌九個政府部門 無一正視套丁嫌疑
就呢項填土申請而言，城規會事前亦收到公眾反對【註4】，質疑申請牽涉33間丁屋，並不尋常，若果牽涉公司購入土地更添嫌疑，要求城規會審視丁屋申請人是否真的打算自住而非旋即售出丁屋圖利。會議中亦有一不記名城規會員提出質疑【註5】，該申請地段屬屋苑式發展，如何確保不牽涉套丁行為。
面對質疑，地政總署助理署長盧錦倫先生(Assistant Director/Regional 3, LandsD, Mr Alan K.L. Lo) 話「現時已有既定程序(established procedure)監管丁屋嘅申請，當濫用丁屋政策嘅證據曝光(came to light)時，地政總署就會調查。」即係話，如果我見唔到，就當無發生。非法套丁行為多年來一直係枱底進行，無人「篤灰」就無人知，但唔代表套丁無發生。
若然地政總署嘅既定程序確實有效，為何王光榮大規模套丁行為多年來可以照常進行？近年陸續曝光嘅沙田套丁案、王光榮案，足以顯示呢套制度已經完全崩壞，若果丁屋大王涉嫌套丁落網，咁捍衛呢套充滿漏洞嘅制度，令不法分子有機可乘嘅地政總署，又洗唔洗為此負責呢？
【註1】 規劃申請 A/HSK/299 https://www.info.gov.hk/tpb//tc/plan_application/A_HSK_299.html
【註2】規劃申請 A/HSK/164 https://www.info.gov.hk/tpb//tc/plan_application/Attachment/20190611/s16_A_HSK_164_0_gist.pdf
【註3】《丁不厭詐：新界套丁研究報告2017》 https://bit.ly/3kNZczl
【註4】 Appendix III-2 of RNTPC Paper No.A/HSK/299 ( 第36頁）https://bit.ly/3y2q9mv
-
研究有價 月捐撐起土地研究工作：https://liber-research.com/support-us/
FPS ID：5390547
HSBC PayMe 捐款支持：https://bit.ly/32aoOMn
戶口號碼：匯豐銀行 640-198305-001 (LIBER RESEARCH COMMUNITY (HK) COMPANY LIMITED)
義工招募：https://bit.ly/2SbbyT
html a target 在 Target Attribute Of Anchor Tag In HTML with all values explained 的必吃
... <看更多>