真係唔係同佢賣廣告
（只係讚自己，吹咩！）
見到同事 Goodbye HK Hello Billy 本書已經印好出街，不禁要讚下自己嘅無謂嘅堅持，除咗佢本人嘅文筆之，明知一眾文化界前輩高手幫佢序，有個儍佬既耳不紅耳不赤，癡到堅持用又爛又臭嘅廣東話寫序，夾雜响佢本文學大作裡面同成班文字大師嘅序之中沾光。
嗱！咁癡嗰個就係我！有了我，大家有多個理由「不了」喇！
Goodbye HK Hello Billy 《一念英倫》（到底「倫」定「淪」？成日搞錯，So99y)），儍Ben序柒文共賞：
//序
响香港呢個功利嘅社會，大家只投入職場時間越長，就越會選擇隱藏自己嘅興趣，尤其是文史哲呢類興趣或者知識，因為「嘥時間搵唔到食」，就更容易越收越埋，埋藏到心底最深嘅地方。營營役役大半生，因為無機會同其他人分享，唔少人最終連自己都唔再記得。
其實响香港已經認識Billy，未得到佢同意之下，唔敢唔知醜咁自認係知心好友，不過無可否認佢係少數能願意同我呢個可以對任何題目有興趣或者沉迷，「周身刀，無張利」嘅多嘴人溝通嘅朋友。相信大家都會有同感，响香港呢個話題咁狹窄嘅社會，要搵個肯討論詳談賣樓、投資、搵錢、育兒、教育，食買玩以外嘅話題嘅親朋戚友，可以話係難過上月球。而我同Billy都算係會乜話題都講唔怕悶死對方嘅朋友，就因為願意傾談，我從來都知道Billy心底裡隱藏住一個中文文學修養高嘅靈魂。
話說回來，大概一年多前，因為本人任性地令自己個「仆街移民Agent」面書專頁深度變質（年份同原因不解釋喇）。加上越來越忙，處理腦細嘅工作越來越少，雖然腦細無明言，但自覺好似白支人工咁，所以介紹同Billy分擔處理自己原有嘅工作。當然佢工作上比小弟處理得出色，之後佢自己亦開始咗獨立嘅Facebook專頁”Goodbye HK Hello Billy”。
坦白講，講移民嘅專頁周街都係，黎黎去去都係分享下移民資訊，極其量炫耀出下客人嘅成功個案，感謝信、禮物、花、朱古力之類，矯情咁曲線讚自己有幾叻有幾勁。偏偏Billy並無咁做，反而搵返自己收埋咗好耐嘅嗰把「刀」，發揮佢嘅文學修養同智慧，同文字感動讀者。
當日得知同事Billy將會出書，老老實實，感覺一則以喜，一則以愁。喜嘅係終於見到佢能夠將埋藏多年（可能準備忘記）嘅興趣發揮出黎，愁嘅係佢嘅貼文散發出嘅中文水準同文化修養，血淋淋咁將小弟嘅低質庸俗突顯晒出黎（尾燈都見唔到）。
最後，衷心恭喜Billy人到中年可以搵返報失多年嘅寫作樂趣，亦能夠可以同讀者分享，得到認同結集成書。//
#偽黃暗放負藍分化Ben不了
