唔睇fb都唔知今日DSE放榜，數數手指我都離開左中學十幾年。我當然就唔係考DSE，我係考會考的，當年我亦只係考到11分，英文唔合格。
當年考得衰，真係覺得人生已完。不過都冇得怨，因為自己冇努力。都冇咩人好似我咁，past paper都唔操就衝入去考。十幾年過去，你問我有冇後悔冇俾心機讀書？坦白講真係有，我都係《戒窮》講過，讀書唔係一切，但讀書係最有效率幫你脫貧既方法之一，因為唔洗特別才能，相對人人平等，你努力，就有一定回報，而且，都係2年時間，係抵玩既！
但放榜成績失意，都唔好覺得人生已完。路仲有好長，可能會用多左時間，可能要辛苦少少，但係呢個先係你人生既開始，往後既變數冇人知道，靠既除左係運氣，仲係你今後既付出同埋選擇。我好怕悶，你叫我入政府工，一世人就跟住張紙黎跳point，係舒服，但我唔甘心。我成日想做d特別既野，我成日想挑戰自己，所以我揀左科唔係幾好讀既科黎讀，由讀書到而家，做左好多好多人覺得好無謂、掛住玩既野。但就算好多人都覺得我不務正業，唔好好地搵錢改善生活都好，我都無悔我嘗試過既野，因為堅係好玩！
大佬！中學俾人話我讀屎片，今日我出左本書，就放左係公共圖書館，可能有d學校圖書館都有得借。當日俾人話我上堂發夢，今日我每年都會係大專教下書，我成日講笑，當年我讀書8：30堂幾乎走哂，今日唔知係咪報應，要教返8：30堂。呢一切一切，都係放榜當年始料不及！我唔想呃大家話DSE成績唔代表乜，佢的覺好重要。但更重要係，大家係唔係有想法既人，呢個世界，只要你有想法，肯堅持，係一定會有有趣既事係前面等緊大家！
如果當年有份教我既中學老師，見到我咁多年做過既野，我相信佢地都會嚇一跳。唔好做一個一眼就俾人估到你一生既人，keep住有趣好緊要！加油各位同學！
p.s：分享當年幾樣有趣事：
1.我初中時代俾老師話我係我數學白瘢
2.我曾經因為冇錢，日日買排白麵包係個飲水機前面食
3.我係入ive之前冇讀過art
4.我冇讀過一日經濟學
5.我中學係讀理科，連會計都冇讀過
6.我由中一到中五英文都冇合格過，離開中學之後全英文讀書完全冇問題。
7.中學長期尾幾，之後由ive到大學都名列前茅
8.我中學冇拍過拖
