【龔成問答信箱】(Q19781-Q19800)
Q19781:
老師,當你買入某股後,見其他網友都話該股唔得,有些專家都話這股弱,我應該點面對?
你當年你入小米、比亞迪,係咪都受過類似批評?
我應該點樣,我見其他人對我隻股都係彈多過讚。
龔成老師:
小米(1810)2020年我買入時,中國印度有最多衝突,我在網上分析小米,話自己都有買,唔少網友即刻話小米將會玩完,會無左印度,之後會蝕錢。
佢地同好多人一樣犯了一個錯,就是將「表面因素放大」,而作為投資者,一定要分析將來情況,這企業的長遠發展怎樣。
比亞迪(1211)我買入了12年,你可以上網找翻,我多年來久不久有分析文,在比亞迪最差時,亦是佢最平時,我是比人罵得最多,話佢D車會爆炸。
到比亞迪上左$200,出面又個個都話佢好。
可見,一般人是好表面的,如果你用一般散戶的思維,保證你無法買到倍升股。要買中倍升股,就要有獨立思維,分析企業基本面,你應該多睇企業年報,少D睇坊間所謂的評論,浪費時間。
------------------------------------------------
Q19782:
龔成老師,您好!我現在39歲,有小朋友,300萬現金,
一層樓市價大概1000萬(負債400萬,月收入10萬,沒有投資經驗。
現在想用50萬投資股票。想分佈在收息股,穩健增長股,和一小部分潛力股。
請問我的這個計畫是否合理。如果現在入手,您會推薦哪些股票?多謝!
龔成老師︰
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
以你年紀計,應以增值為主,而非收息。你可以用"平穏增長股"作主力,再輔以一些"潛力股"作組合。現在你每月5成儲蓄,去做月供,其餘先儲起,用一邊月供一邊儲蓄的策略。
月供方面,你可以選擇投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)、希慎(0014)、太古地產(1972)或
潛力股︰中生(1177)、福壽園(1448)、安碩恒生科技(3067)、港交所(0388)、阿里(9988)、騰訊(0700)。
由於你現時無乜選股經驗,你可以先用盈富基金(2800)作為你投資目標,佢係包括52間質素不錯上市公司股票的組合,有助你平衡組合中的風險。
現時大市在合理水平,現金和股票最好各一半,但由於你經驗尚淺,建議你先用50萬資金,用"分注"形式,慢慢買貨。餘下250萬和每月所儲倒的資金,等到你有一定能力,才買其他我建議的股票。
------------------------------------------------
Q19783:
本人41歲,月入20k,持有一半現金及以下股票組合:
1) 0005匯控 56.5 兩手
2) 0941中移動 平均價57 三手
3) 1177中生製藥 8.16 三手
4) 1478丘鈦 11.5 兩手
5) 3319雅生活 平均價37.5 五手
6) 3331維達 30.4 一手
7) 3662奧園健康 平均價7.02 四手
8) 9999網易 144.8 兩手
股票組合OK嗎?有冇邊一隻現價值得加注?
順便問埋9988阿里巴巴最好係唔係反壟斷問題解決咗先投資會較好?Thx
龔成老師︰
以你年紀計,應以增值為主,但組合上要開始保守少少。
你持股中,都是有質素股票,大致上都可以。丘鈦科技(1478)和網易(9999-S)這類股好波動,不宜持有太多,故唔好再加注了。
現時這些股票,都在合理區中至上部。由於你已有一定貨係手,建議等有明顯回調(約10-15%),才入貨會較好。
而阿里巴巴(9988)近期面對內地監管可能收緊,風險度增加左。
早前螞蟻金服因貸款業務問題,被叫停上市。中央就是擔心這些小型信貸增長過快,但監管又未及銀行嚴緊,會危害實體經濟。
但內地唔係想佢唔賺錢,只係想規管佢。由於佢本身己建立一個完善的業務,因此本身是無得輸,只是賺多賺少架問題。
此股質素依然存在,但你預佢增在力會弱左。現價算是合理區頂部,可分注入貨,並長線持有。
------------------------------------------------
Q19784:
你好,龔成老師! 本人40 歲,自顧工作2年,月薪$30000-50000,目標是財務自由,每月不用工作可支取$30000!
股票:$500000( 阿里,領展,新地,恒生,銀娛,中鐵塔,盈富),高位買,大部分未返家鄉!
外幣、港元:$2500000
一直想買樓,怕工作不穩定的供樓壓力,加上這2年收入浮動,不敢入市!
想問老師,要達到財務自由,現在應怎樣部署?
龔成老師︰
你現時持股都有質素,買入價只係心理因素,唔好太在意,這些股你一直持有就可以。
如果你希望每月有3萬蚊現金流,令自已財務自由,以股息率5%計,你需要本金720萬。
你可以用"平穏增長股" + "潛力股"作組合,當中以"平穏增長股"為主。
現在你每月5成儲蓄,去做月供,其餘先儲起,用一邊月供一邊儲蓄的策略。(由於你收入較波動,你可以用一年去拉個平均儲蓄金額去計算。)
月供方面,你可以選擇投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)、希慎(0014)、太古地產(1972)或
潛力股︰小米(1810),中生(1177)、福壽園(1448)、安碩恒生科技(3067)、港交所(0388)、阿里(9988)、騰訊(0700)。
現時大市只是合理區,你現有250萬資金(連外幣)可以先投入100萬,用"分注"形式,慢慢買貨。餘下150萬和每月所儲倒的資金,就等大市出現一定程度的下跌,才大力度掃貨,然後長線投資。
以恆指過去年平均回報10%計(連股息再投資),假設你每月月供$10000 + 現有持股和現金300萬計,10年內應該可以增值到你所需金額。到時再慢慢換成收息資產,去支援自己生活開支,就可以。
------------------------------------------------
Q19785:
老師你好!我是你的新讀者! 經朋友介紹睇左 《財務自由行》,
但有樣野想請教一下老師, 書中P.384提到 “…買樓後, 餘下的$20萬便會投資盈富基金, 每月儲蓄$7,740, 同樣會不斷投入盈富, 繼續以12%複利息滾存。”
因本人財務知識不太豐富, 想請教老師怎樣可把利息滾存? 意思是收了股息後再購買盈富嗎??
本人32歲, 5年前開始購買一些儲蓄及投資產品, 而且剛剛買了樓花, 開始供樓, 現只餘現金10多萬, 扣除家用生活開支
每月大約可儲3000元, 因在2022年收樓後, 應有額外支出投放在樓宇中, 不知現在把每月的3000元投放在盈富增值是否可行?
雖然買了一些投資產品數年, 但對股票的認知不多, 不知之後可看老師的那幾本書比較合適? 希望現在才學投資不會太遲.謝謝老師
龔成老師:
書中的意思,就是將$20萬資金,買入一些投資工具,例如盈富(2800),佢會長期增長,股價長遠向上,加上有股息,當你收到股息後,就可以將股息再投資,買翻盈富,這就是複利息效果。
當然,如果你想有較高增長,其實可以考慮另一ETF,如安碩恒生科技ETF(3067),風險會高少少,回報都會較高。
由於你現時現金唔多,加上2022年可能有物業方面的支出,我會建議你點都要有一定的現金在手,唔好投資用得太盡,因此,你應該加強儲現金先,到有較多現金剩先投資股票。
另外,多增加知識先,例如睇《股票勝經》,唔好太心急買股,等你有一定的知識先
------------------------------------------------
Q19786:
龔sir你好,請問2809、2845、3110有質素嗎?哪個較好?現價可入嗎?謝謝
龔成老師︰
GX中國潔能(2809),其目標為追蹤SOLACTIVE中國清潔能源指數NTR之表現。
當中佔最多為"半導體產品與設備"股份,約組合4成,其次是逾2成的"獨立電力及可再生電力"。
此股平貴不易分析,而且頭10大股份中,除了信義光能(0968)外,其餘都在內地上市。
潛力度是有的,但會比較波動,如投資宜慢慢分注,可長線。
GX中國電車(2845)目標是扣除費用及開支前,與Solactive中國電動車指數NTR「相關指數」表現緊密相關的投資回報。
持股中最重就係比亞迪A股(002594),中國因為能源問題,長遠一定要發展電動車,這是大方向,故此股有一定投資價值。
由於近期不少車股被炒起,此股現價略貴。無貨可以現時入少少,到有明顯回調才再慢慢加注。
未來恒生高股息率(3110),其實這基金我在上堂都有介紹,是不錯的,你可以視為收息股的組合中其中一員。這基金可投資的,現價合理,可分注。
這3隻股票都有質素,前2者較有增長潛力,適合年青至中年人士。而後者係主要收下息,較適合將近或己退休人士。你可以因應自已情況,去決定。
------------------------------------------------
Q19787:
龔成老師多謝你的post,讓現年30的我開始意識累積財富,不能每月只儲蓄,買定年基金。我嘗試慢慢進行供股。
現時我每月可儲蓄$5000。如將儲蓄中的$2000,月供(2800),$1000,月供(1810)可以嗎?
另外想為媽媽籌劃穩定而低風險的投資。媽媽65尚有工作。如50萬現金可以購入邊隻讓現金減低眨值?
謝謝你無私貢獻。
龔成老師︰
你尚年輕,投資應以增值為主。你現時組合合適,每月儲下$2000就等大跌市,才去入貨。
但緊記月供係一個長線計劃,月供最少維持3年,並持有這些股票5年以上,才會有較理想效果。
至於你媽媽,投資上要相對保守,以賺取穏定現金流為目標。以下收息股都適合佢,現大市只在合理水平,你可先動用25萬,分注買入以下股票(係慢慢入,唔係一次過入晒。)。餘下一半,等大市有明顯回調,才再加注。
目標是現價計有5-6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,這些股票股價會略為波動,故不能太過大注)。
------------------------------------------------
Q19788:
你好啊 我有睇到你啲專欄而認識你 我岩岩畢業出黎做野 想請問下
1)如果而家入手月供2800供唔供得過呢
2)每月大概供9000 係咪固定供會好啲定因應當時升跌調整好呢
3)同埋作為新手 邊幾隻相對進取月供基金股票你比較推薦呢 希望你可以比啲意見我喇thank you
龔成老師︰
1) 可以,現時大市只在合理水平,做月供係無問題。
2) 當個市好貴或平,我地係可以調整個供款額。但如果你係初學者,我建議一直用同一個金額去月供,唔好理個價格水平,因為月供長線會拉平均左個價。
若你唔識估值之下,胡亂去調整,反而會危害到你長線回報,到時得不償失。
3) 你很年輕,係增值黃金時期,但都唔好全部買晒潛力股。因為佢地增長力高,同樣波動性都大。你可以用"平穏增值股"和"潛力股"各一半,去做一個月供組合,咁會更理想。
平穏增值股︰盈富(2800)、港鐵(0066)、金沙(1928)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、希慎(0014)、太古地產(1972)
潛力股︰中生(1177)、福壽園(1448)、安碩恒生科技(3067)、港交所(0388)、阿里(9988)、騰訊(0700)、舜宇光學(2382)、小米(1810)
現時大市只在合理區,每月資金唔好盡用。必需要留有部份,等大跌市,才用來掃貨。
------------------------------------------------
Q19789:
龔成老師你好,我想問下我中移動係$46.45買左1000股,其實呢隻係味值得長線投資,唔使理會佢現時不利好既消息?
另外見到您而家介紹人月供股票都冇提及煤氣(00003),係咪唔建議再月供佢,因為本身月供佢5000
供左好幾年,近呢3個月改左3000盈富2000煤氣,我而家應否再將煤氣轉供其他?謝謝
龔成老師︰
中國移動(0941)不是無質素,5G雖然對佢有正面影響,不過中國政府希望相關費用不會太貴,令資訊流通更便利。
所以,對佢賺錢能力方面,未必有突破性增長。若你目標係收息,長線持有這股係可以。
至於煤氣(0003)雖然增長力比以往弱左,但依然值得做月供
而現時$3000盈富(2800)和$2000煤氣(0003)架組合會更好,可令你風險更分散。
------------------------------------------------
Q19790:
老師你好,最近我同我老公分別開左股票户口,佢全權交比我去買股票,我想問下兩公婆嘅股票組合要互相配合,定話可以係一模一樣?
例如我睇中地產股,新鴻基同恒基都係優質股,但恒基有最多農地
所以恒基睇高一線。我打算每人都月供一隻地產股,咁我應該分別每人月供恒基
定話一個供恒基一個供新鴻基(分散風險)?
唔該老師!!
龔成老師︰
若你們以一個家庭作單位,去計劃未來財務發展,應該一齊考慮會較好。
長線計,其實我較建議集中一個戶口去處理會好d,成本會較低。管理時候,相信也會較方便。你最好睇下邊個戶口成本較低,同較方便你地操作,長線就用個個。
新鴻基(0016)同恒基(0012)都有質素,後者潛力會略略高。但我地投資唔好太偏重個別行業,否則會有過度集中風險,單一行業佔組合最多3成好了。
------------------------------------------------
Q19791:
龔成老師您好!我有12000股中廣核電力1816,平均價2.78是換其他股還是繼續守?
如果換哪一個好,請賜教
龔成老師︰
中廣核電力(1816)質素算係中等,過往2015年大時代熱炒,盲目認為這股是高增長的股票,但電力股一向只是平穩增長。加上近年的盈利有下跌情況,都影響左估值。
現時處於合理水平,你預這股能保持平穩增值,但就難以爆升,所以較難上得翻去,你可以當收下息咁。
如果持貨太多,最好減持部份,分翻D資金去其他股票,會較好。
------------------------------------------------
Q19792:
老師,上完你堂我覺得1918吾值得長揸,但以前我係$33大量入貨,約30萬,我應吾應該等佢升返先走?換其他潛力股?
其實我睇好中國移動日後的發展,現價想入,但上堂時無聽到你推薦,我都吾知值吾值得入。謝謝老師
龔成老師︰
融創中國(1918)此股有一定風險。首先,中國樓市如果逆轉會有很大打擊,另外,這股的負債超高,無事就無事,有事大件事。
因此,投資這股不是不可,因為不是完全無質素,但你要明白背後的風險,同時明白這一定會令股價較波動,自己最好控制注碼。
由於你持貨不少,我建議你沽出部份,慢慢換至其他股票,去平衡翻個風險。
中國移動(0941)是有質素的,但增長力唔高,你預佢用來收息。現價算合理區,可分注。
------------------------------------------------
Q19793:
龔sir,想問我73.15買入中電控股,現階段仲應唔應該持有?
有無買錯呢?
我係新手
龔成老師︰
中電(0002)是不差的收息股。中電業務就是收電費,就算經濟差都有錢賺,最多只是賺少D,佢過往的業務與派息穩定。
如果你係接近/已退休人士,又話者作為新手,想保守D,投資中電都係可以。
但你預中電這類收息股,增長力唔會高。若你較年青,就不宜持有太多。
------------------------------------------------
Q19794:
老師,可否分析下2269 & 1801? 同埋幾錢算係合理價? thanks!
龔成老師︰
藥明生物(2269),主要提供有關生物製劑藥物發現、開發與生產服務。
佢涵蓋生物製劑發展過程的所有五個階段,即藥物發現、臨床前開發、早期臨床開發、後期臨床開發及商業化生產。
潛力是有的,因為過往的財務數據的確理想,但現時的估值唔平,這刻投資值博率一般。
不過,這類股好難話現價一定貴,因為佢有好高的增長,只可以話現價唔平,但如果之後有高增長,那就未算太貴。只可以話,如果你真的想投資,小注好了,你要明白業務有不確定性,同時股價會好波動。
信達生物(1801)係一家中國生物製藥公司,開發了集研究、發現、開發、製造及商業化於一體的生物醫藥平台,並在腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。
由於仍處於燒銀紙的狀態,所以有危有機,潛力度是有的,但估值好難,現時市值都唔細,只能完全「估」佢將來的價值,不確定性好大。只可以話,這刻投資值博率中等,投資可以,但唔建議大注。
------------------------------------------------
Q19795:
本人32歲,月入5萬,投資三年,每月能儲4萬以上,現時投資組合中
花30萬分別買入建行,中銀及匯豐,現時蝕約7萬,花45萬買入9988,27,2382
175,2822,2588,386,200帳面賺35%,另有100萬流動資金
請問我該如何投資以達至十年後能賺到600萬以上置業?謝謝龔成老師給我的建議,
看了你的帖文後,想於投資方面再努力一下看看能不能
補充一下股票的買入價
5 1500股 @63.5
939 20000股 @6.20
3988 30000股 @3.58
需要減持部分內銀股嗎?若要的話減持哪一隻比較好?
謝謝!
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
你現時的年齡,增值上可以較進取。建行(0939)和匯豐(0005)只係收息股,增長力唔會明顯,不宜持有太多。同時,你太集中同一行業,基本上單一行業佔3成以下較好。
而中銀航空租賃(2588)、新濠國際發展(0200)和中石化(0386)整體質素唔算好高,同樣只宜佔組合小部份。
未來時間,你可以用"平穏增長股" 和 "潛力股"組合,透過月供股票去增值。每月用5成儲蓄去做月供,其餘先儲起,用一邊月供一邊儲蓄的策略。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
增長力較強的,可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)。但佢地波動性和風險會較高,你要自己平衡。
現時大市只是合理區,未係盡用資金架時候。你現有100萬和每月所儲倒的資金,就等大市出現一定程度的下跌,才大力度掃貨。以你現時月儲4萬和現有資產(股票+現金),10年內達至600萬,應該問題不大。
------------------------------------------------
Q19796:
成哥 如果我個依家倉有
1810 40%
1711 20%
1211 20%
788 20%
我想問下 688 值唔值得長線投資 現在是否平?
本人可以承受風險 因為我喜歡留一半的現金 同埋每月可以儲倒錢
還有 非常感激 我套現左少少小米 我還清左之前係大陸買樓的債
龔成老師:
你上述持有的股票,都是有質素的,可長線。不過,長遠最好建立更平衡的組合,同一行業最好在30%以下,單一股要則在15%以下。
小米(1810)你賣部分是可以的,但最重要是點都要有D貨在手。
中國海外發展(0688)不是無質素,在發展商來講,不算最強,長遠有平穩增長的能力,前景都可以。
睇翻佢的財務數據,基本上都是正面的,但生意增長力不是好強,見佢過往的生意都只是平穩,而整體都有投資價值的。
可以視這股為平穩型的企業,現價合理。當然中短期可能因樓市一般而股價一般,但長遠,仍是可以的。
現時大市合理,你部分現金,部分投資,可以。
------------------------------------------------
Q19797:
你好,本人上年年尾已賣樓,隨時準備換樓。
而家手上有250萬資金,打算預100萬作投資,餘下就留來做首期。
希望投資之後可以盡快每年都有10-15%增長。用作供樓。
我近期都仲有睇老師你專頁,通常你都建議不太熟悉股票市場都先買2800盈富。我用50萬先入手,你覺得如何?
龔成老師:
我會建議你完成買樓過程後,之後再投資,這樣會比較好。
除非你已經計好數,對買入物業的金額及按揭有信心,就可將部分資金投資。否則,買完樓先買股票,會較好。
如果之後有$100萬資金剩,你可以用其中的$50萬投資股票,分注投資就得,如果不懂選股,盈富(2800)是最好的選擇。
另外可考慮:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067),要分注慢慢入,因為現價唔算平。
------------------------------------------------
Q19798:
請問你點睇 網易/清科創業/京東健康/比亞迪電子?
今年有冇潛力股推薦?唔該!
龔成老師:
網易(9999)有質素的。
先講講佢基本業務,佢創立於1997年,為用戶提供優質的內容和服務。以中文門戶網站起家,並推出了至今仍在發展的媒體及電子郵件服務。
不過,現時唔算平,同時市況波動,因此唔建議太進取,而小注投資是可以的。
清科創業(1945)係是股權投資行業的綜合服務平台,向股權投資行業的參與者提供數據、營銷、諮詢及培訓服務。集團主要為私募股權╱風險投資公司及增長型企業提供服務。
這股都可長線,但又唔建議大注投資。
京東健康(6618)有潛力,但股價上落太大,要注意風險,$120以下較合理。
至於比亞迪電子(0285),有質素的,潛力股,但現價都貴,回翻D先小注較好。
如果想考慮潛力股,安碩恒生科技(3067)可長線。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂,因此,這刻不能大注投資。最好的策略,就是月供,或自行分注小注慢慢收貨,原理如同不斷儲貨,這樣就能平均買入價,減少風險。然後就長線持有。
------------------------------------------------
Q19799:
龔sir你好:因為疫情關係,令到原本既生活及計畫全部打亂晒,而家收入突然減少好多,雖然渣住一筆現金,但對未來仍然是好徬徨,我想問下老師意見。
我有大約340萬現金,但銀行貸款大約有640萬,現時一個月供款要3萬5。因疫情關係家庭月收入只有2萬以下。
我而家應該如何運用340萬?是否將300萬攞去還貸款,還左之後每個月供款只需要1萬3,剩餘既40萬買股票投資?
因為不敢將所有現金用來買股票,始終有風險,但還左貸款後要再儲錢投資已經好難。請問我應該點安排較好?
龔成老師:
唔需要心急還款,除非是一些利息較高的貸款。如果是一般較低息的按揭類,其實無問題。你可以考慮存於按揭的高息戶中。
反而還款令你無現金,現時會更加不利。
現時你的情況,宜留一半現金在手,等疫情過後先正式進行理財投資。
你可以考慮將部分資金,投資收息股,建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
但要留意,現時股價只是合理,未到平宜,因此買入時宜分注,同時不能用盡現金。
------------------------------------------------
Q19800:
你好 老師 最近有一份保險理財計劃 每年存10萬美金 存10年 到2048年會有3000萬港幣
我挑選這個比較好 還是每年買100萬盈富基金比較好 感謝
龔成老師:
要睇你風險承受能力,上述的計劃,回報會較確定,但就,其實單計本金,你都投資約$2000萬,所以最終滾存至$3000萬,其實回報率不高,當然,這類保險理財計劃,風險會較低。
至於盈富(2800),預期有平穩增長回報,假設你每年投資$100萬,27年,回報保守少少8%(假設你將股息再投資)。2048年會滾存到$8000萬。
從回報角度,盈富會較好,不過風險就會高少少。
其實你建立平衡組合都得,按自己的風險承受度,投資適當比例在上述計劃及盈富。
----------------------------------------------
若你有問題想向本人發問,可在龔成的fb專頁中(龔成)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
同時也有10000部Youtube影片,追蹤數超過2,910的網紅コバにゃんチャンネル,也在其Youtube影片中提到,...
黃金9999意思 在 龔成 Facebook 的最讚貼文
【龔成問答信箱】(Q19521-Q19540)
Q19521:
老師~有問題想請教!現持有10手700平均買入價$300左右,你認為放一半定或繼續持有呢?近期升得好誇張,其實自己又唔係好想放住!
龔成老師:
要睇你持有騰訊(0700)佔組合的%,以及現金%情況。我地最重要是建立一個平衡的組合。
首先,如果你想獲利,賣部分是可以的,例如賣3-5手,總之,點都有貨是長線的,成為你投資組合的一部分。
如果你現時持有騰訊的比例太高,那可以賣少少。如果你現時現金少,可以賣少少。
相反,如果這股佔你組合比例唔過多,同時現金足,其實不用賣出。
------------------------------------------------
Q19522:
上年五月嘅時候,我仲記得我嘅資產大概900,000左右,之後再拜讀你數本書之後, 決定想你的班,自己有五年嘅目標,想完堂之後,真心覺得好好用!
但由於年紀唔算細,自己只係準備咗大概三份一嘅資金去嘗試實踐股票嘅投資,諗住之後再慢慢增加,而且,亦都聽你上堂時候講嘅心得,Mark低自己每月洗咗幾多錢
同埋應使則使、慳得就慳嘅方法去進行理財,去到今年一月,自己在進行整理嘅時候,當然知道股票個方面係有上升嘅
但係與此同時,亦都因為比以前慳咗,所以自己計過自己嘅資產去到1,370,000左右,其實上升咗四成有多。
其實講緊都係八個月左右嘅事,真係真心覺得好有用,亦都好多謝你嘅教導改變左我理財嘅方法
以前覺得冇可能,而家去到呢一步, 覺得唔係吖,其實真係有機會喎。我會再勤力啲做啲股票整合,多謝你。
龔成老師:
太好了!
我一直出書、教班的目的,就是想幫大家財富增長,現時相信做到了。
加油,理財是長期戰,你要保持進行!
------------------------------------------------
Q19523:
龔成你好,一直有看你的文章,早前為自己置業(同另一半夾份買,一人一半),儲蓄常常清空,沒有閒錢投資。
現時我正職收入3萬,副業收入1至3萬 (視乎疫情),再加其他收息基金每月數千。
每月支出供樓6000,零用3至5千。 每月可儲3至5萬。現時儲蓄現金20萬,另有約25萬股票,如下:
工商銀行 1萬股 (四蚊入)
建設銀行 1萬股 (五蚊入)
中國人壽 6千股 (17蚊入)
阿里巴巴 2百股 (252蚊入)
我想2年內儲1百20萬,贖番層樓。請問應該點做?
現在的股票應該長持有收息,還是有升幅先放,再等低位入呢。 謝謝你的意見
龔成老師︰
首先,2年係一個短時間,就算再優質股票,都會有機會出現波動,影響最終回報。
我建議你用每月儲蓄5成,去做月供。其餘先儲起,用一邊月供一邊儲蓄的策略,來進行財富增值。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
或一些潛力股︰安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177)、福壽園(1448)。
餘下的另一半儲蓄和現金20萬就等機會,當大市出現較大回調,就加大力度掃貨。
另外,你持股中的工行(1398)和建行(0939)佔組合比重太高,再加上佢地增長力麻麻,建議將部份換至以上股票。
以上月供計劃,你最好維持至少3年,並持有5年,效果會較好。記住財不入急門,好的財富增值係要按部就班。
------------------------------------------------
Q19524:
龔Sir, 早安!請問福壽園和華潤水泥現在哪個在更值搏水位?
龔成老師︰
華潤水泥控股(1313)本身有質素的,不過業務就較有波動,佢過往的盈利數據上落都大,因此股價的變大亦會較大。
長遠計,房屋、基建發展等因素,都會利好水泥股。
福壽園(1448)主要在中國從事殯儀及相關業務,此股質素和潛力上,會較華潤水泥高。
但以現時股價計,值博率華潤水泥會較高。但此股波動,不宜入太多。
------------------------------------------------
Q19525:
你好呀龔sir,我聽咗你上次嘅意見去咗睇股票勝經,去定立我嘅股票組合,希望你可以指點下
問題1:請問這組合ok嗎?(我19歲)
以下係我諗緊嘅組合,括號內為該行業中所考慮的股票:
科技 (9988, 700) —— 30%
公用(388, 66) —— 25%
地產(823, 12) —— 15%
賭業 (27) —— 5%
零售業 (590) —— 5%
盈富 —— 20%
問題2️:我決定月供的股票合理嗎?
我的考慮:
- 我每月只有16k可放入股票。很多我現在考慮中的股票1手價錢對我來說並不是小數目
所以保險起見好似月供好啲,但不知是否正確的決定。
- 想調整一下我的組合,所以決定先停供恒基和盈富一陣
- 銀娛好似好少人會月供
以下係我宜家有嘅股票:
現有股票
11 恒生 100股@$124
12 恒基 162股@$30.612
883 中海油 1000股 @$6.7
2800 盈富 1034股@$25.632
9988阿里 200股@$272
穩陣(11,2800) 37%
地產 (12) 4.7%
潛力 (9988) 52%
打算1月開始月供的股票
- 港交所 (如果1月頭<$390就開始) (3k)
- 港鐵 (3k)
- 恒地 (停一停先)
- 銀娛 (3k)
- 盈富 (停一停先)
問題3️:我打算一手手買的股票的選擇,和定的價位ok嗎?
(9988已經佔我現在的組合一大部分,仲要我買的價錢很高,現在一直跌很有衝動去溝貨。不過,
見你答其他人話如已有貨就再等下,所以現在就hold住先)
打算一手手買的股票
- 阿里巴巴
- 騰訊 (<$530 第一注)
- 領展 (<$60 第一注)
- 六福(<$18 第一注)
問題4️:睇完80後、股票勝經後,應睇邊本?
好多謝你無私嘅花時間俾意見我😭
祝 身體健康 開心 平安
龔成老師︰
1) 以你年紀,係財富增值黃金時期,應以增值為主,故這組合係可以。
騰訊(0700)要回多1成,而港交所(0388)則要回多2成才算合理價,才可開始分注,慢慢分段入貨。
2) 初學或資金唔多的投資者,月供會較一手手咁自已儲理想,因為操作上較方便。
持股中,中海油(0883)質素較中等,唔好再加注了。
你現時月供5隻股票都合適,包括港交所在內,都無停供需要。但你5隻中只有港交所較有潛力,其餘都平穏增長股。我建議你換入一隻潛力股,去提升組合增長動力。
潛力股︰安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177)、福壽園(1448)。
另外,現時大市只在合理區,每月資金唔好盡用。最好留有部份,等大跌市出現時,可以用來掃貨。
3) 由於你資金唔多,而阿里(9988)你已有2手,唔建議加注住。
領展(0823)和六福(0590)現價合理,可分注。騰訊(0700)等回到$500才算合理水平,這時首注會較好。
4) 你可以睇<財務自由行>和我本新書<5年買樓4步曲>。
------------------------------------------------
Q19526:
你好,我見到9988市盈率現在小于30,其實係好還是唔好?因為關於市盈率我從來都冇研究過
所以都想請教下你,反而拼多多市盈率現在是虧損,股價反而爆升
龔成老師:
其實呢類新經濟股,市場睇將來多過睇過往,市盈率都有參考作用,但由於市場對企業睇法可以變得好快,因此無得話絕對幾個倍市盈率係合理。
當市場對一間企業的睇法改變,就有機會調低市場認同的合理市盈率,這在新經濟股經常出現。
我地進行估值,往往以多種估值方法一同進行,例如現金流折現法與市盈率。就算企業這刻的盈利好少,但之後的盈利多,用現金流折現法仍可以計到高估值。
你預阿里(9988)現時處於合理區中上部,不過中短期仍會波動。
------------------------------------------------
Q19527:
早晨老師,我想請教一下,想長線投資一隻醫藥股,可月供或分注吸納
如以下三隻選擇
1801信達生物,2126藥明巨諾,1177中國生物製藥
邊隻會比較吸引,值博率高呢?如我想比較這三間公司是否睇曬roe,現金流,營業增長,毛利,前景等,最好資訊果隻係咪代表最高值博率呢,謝謝老師指教
龔成老師︰
分析任何企業,我地都應該了解佢質素、行業前景、財務狀況(如ROE、負債、現金流等),從而推算佢投資價值。
信達生物(1801)係一家中國生物製藥公司,開發了集研究、發現、開發、製造及商業化於一體的生物醫藥平台。
而藥明巨諾(2126)是中國臨床及臨床前階段細胞治療公司,2間都有質素。但由於仍處於燒銀紙的狀態,潛力度是有,但不確定性都好大。投資都得,但只可以好小注。
相比之下中生(1177)已一套成熟經營模式,也現有穏定盈利。雖然潛力未必及以上2隻,但相對穏健,整體質素和值博率都較好。
中生現價在合理區中上部,可分注,但要控制注碼。
------------------------------------------------
Q19528:
尊敬的龔成老師您好!唔好意思打擾你,因我係股票新手,韭菜中的韭菜,投機當投資,又保守又貪心,從六月至今
本金用了16萬買了,全部都係虧,hold 唔住。
本人中年四十多,從事體力勞動,每月可存8000–10000;現金有10萬。
股票有:[email protected]萬股均價1.43;914@1000股均價50.2;9999@200股均價141;9988@200股均價245.6;1099@400股均價18.8 我應該點樣做好?好擔心,長期投資大概要幾耐?
短期又指多短呢?我要從頭來過嗎?好亂。如有時間,肯請幫我分析一下,感激不盡
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
你現時股票,都係有質素,而買入價都算合理水平。這些股票一直長線持有就可以,無需太在意這些短期波動。
但留意網易(9999)和阿里巴巴(9988)有潛力,但波動性都高,以你年紀,不宜持有太多。國藥控股(1099)負債偏高,同樣要控制注碼。
我建議你用月供"平穏增長股",作未來增值平台。策略上,你用每月5成儲蓄做月供,其餘先儲起,用一邊月供一邊儲蓄的策略。
你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
如果想組合多少少增長力,就安碩恒生科技(3067)。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂,因此,這刻不能大注投資。最好的策略,就是月供,或自行分注小注慢慢收貨,原理如同不斷儲貨,這樣就能平均買入價,減少風險。然後就長線持有。
選股方面,如果你對這些股票唔係咁識,可以先用盈富基金(2800)作為你投資目標,佢係包括52間質素不錯上市公司股票的組合。到你有一定能力,才買其他我建議的股票。
10萬現金和每月餘下另一半資金,我地就等機會,當大市出現較大回調,就加大力度掃貨,然後作長線持有。
所謂長期持有,講緊最少5年。當然,股票質素一直無變的話,一直持有會更好。
------------------------------------------------
Q19529:
龔成老師,我的父母有$1.2M的現金,想幫佢地買入一些穩健的收息股長期收息,經過初步研究
希望分注買入中華煤氣 (0003)、領展(0823)、龍光地產(3380)、華潤水泥控股(1313)、碧桂園(2007)和龍湖集團(960),請問這個策略如何?
這些股票的股價和收息長遠看穩健嗎? 謝謝 !
龔成老師︰
你以上股票,如果作為收息股的話,其實未算最適合。
中華煤氣 (0003)和領展(0823)是當中較穏健,但股息率唔算高,而且都有一定波動性存在。其他內房股,有一定派息,但負債狀況好唔理想,唔建議用來在收息股投資。
你父母可以用這些收息股作組合,目標是5%、6%的股息率,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
這些股票派息唔錯和相對穏定,作為收息股會較適合。
現時大市只在合理區,120萬資金可以先投入一半,用"分注"形式,慢慢入貨。餘下一半60萬,就等大跌市出現,才去掃貨,然後長線投資。
------------------------------------------------
Q19530:
老師,可以幫我檢視投資組合嗎?
總投資金額:$393,280
盈富基金 $24.68@8000股 {50.2% (所佔投資比例)
太古地產$20.6@1800 {9.4%
領展$68@600股 {10.3%
必瘦站$3.2@8000 {6.5%
中國生物製藥$7.2@6000 {10.9%
阿里巴巴$245.8@200 {12.5%
另外我對1448福壽園,1211比亞迪股份,0027 銀娛,1928 金沙,都很有興趣想入手
我而家持有嘅股票會太多嗎?應該點樣調整?
(我25歲,月入29K,手持21萬現金,喜歡主動式投資術,希望水桶1水桶2比例是60:40)
其實我超鐘意必瘦站
因為我對女人為左靚 既瘋狂 好有信心
龔成老師︰
你現家持股都有質素,而且都唔算太多。你想入手的4隻股票,都可以。當中以比亞迪(1211)和福壽園(1448)潛力較大,但現價偏貴。
但你現時組合的增長潛力略為弱,未來可以加大潛力股部份。
潛力股︰安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)。
現時大市只在合理區,應持有一定現金比例。故餘下21萬現金,就等大跌市,才出手掃貨。
我自己都持有必瘦站(1830),這股正面的。
其實你現時整體的方向正確,無乜問題,之後只要小心等機會入市就得,如果你可以承受風險,就慢慢增加潛力股的比例。
------------------------------------------------
Q19531:
龔sir,1579有咩建議?可入貨麻?
龔成老師:
頤海國際(1579)有質素的,佢以「海底撈」品牌銷售產品(火鍋底料、火鍋蘸料及中式複合調味品)予經銷商、餐飲服務供應商及網絡購物者(透過電商如天貓及京東)。
並於河南省鄭州市及四川省成都市設有生產設施。集團亦為海底撈集團(由主要股東兼非執行董事張勇及施永宏創立)於中國的火鍋底料產品獨家供應商。
業務與發展正面,有質素,有長線持有價值。
不過,現價就唔平,這股現價貴。最好回翻多少少先考慮小注。起碼都1、2成先考慮。會較穩陣。
------------------------------------------------
Q19532:
之前信了别人所謂內幕,於$3.98大手買入1759,之後直插至現價$2多徘徊,整份資金都被壓在此。請問閣下點睇呢隻,可返上?謝謝!
龔成老師:
中油潔能控股(1759)在廣東省、河南省及江西省經營液化石油氣和壓縮天然氣相關業務。
本身這類商品企業,賺錢能力就唔會太強。因為佢產品無差異性,故定價能力唔會太高。
佢本身規模好細,盈利都唔多,連1千萬都無。見佢近年盈利一直下跌,暫時所見質素好一般,其實無乜投資價值,你最好睇位賣出。
------------------------------------------------
Q19533:
龔成老師 hello,有個問題又想請教你 唔關股票增值事 不過關自我增值事
我覺得自己嘅技能經驗太普通 而且人與人嘅political/argue每日不斷重重複複 亦都令我好精神好困擾
想學專啲繼續頂硬上係本行發展 定學新技能轉行
如:
本行:digital marketing data analysis /retail training
轉行yoga/florist/arborist
有排都未去到財務自由 係咪就要放棄自我增值呢?每個course都幾萬幾廿萬 我無咁多錢應該點取捨 定係借錢都要讀左先呢?
困左係個死胡同度 個人自我感覺越來越低落 好似好多野都無價值 生活得毫無意義咁
龔成老師:
我地每個人的資源有限,時間有限,所以要好好計劃及善用。
你要從自己的興趣與強項去想,如果人做乜你又做乜,只會令你好普通,但如果你發展自己的興趣與強項,唔止做得開心,同時會做得比人好,所以,你一定要從這方向去想。
另外,想想在事業上,學那些範疇會對你長遠最大幫助,能夠配合到你的發展。
另外,你要從長遠的角度想,5年後、10年後,你想做甚麼?收入怎樣?生活怎樣?
當你有了目標後,之後就要想想,怎樣達成目標,這些學那一個範疇的事物,對你的目標最有利。這就是你這方向。
其實每個人都會有突破機會,但機會不會常常到來,不過你可以先作準備。
------------------------------------------------
Q19534:
老師,我想為(幫)我個女(佢一月出世)早點投資for第時讀書又好、出國又學。
如果我投資係一d新興市場既assets 例如基金:法巴能源轉型股票基金USD 、貝萊德世界科技基金USD、同埋一些etf 例如ARKK、QQQ、VOO 等等!
我當每月為個女儲少少(可能只係幾百至一千)買以上提及既assets (當然未必每期都買曬), for long time 睇,say 10年,20年,個投資回報會唔會理想?
我最期望每年能有10% return 。
策略只係月供/定期加注、當新興既市場轉型就換另一種。ps 唔會買個股,盡量想減低風險。
龔成老師:
你長線投資上述基金及ETF,可以,但就要留意一點,上述大部分都與新經濟類別有關,會有風險,你要明白這一點。始終風險與回報是相對的。
長線進行可以,只要你明白都有基本風險存在,就得。建議你保持長期月供,唔好心急入。
------------------------------------------------
Q19535:
成哥唔好意思,我本身住公屋,黎緊好大機會會抽到居屋,由於本身資金唔多
買樓之後,每個月大部分錢會用左去供樓
我估大約只有$3-4k 儲蓄
你覺得呢個時候買樓既選擇正確嗎?
龔成老師:
如果本身有自住需要的,其實可以進行,只要你「供得起」方面無問題就得。
雖然接下來1、2年,樓市有可能下跌(不會大跌),但實際情況無人知。而長遠會上翻。因此,只要你有自住需要,就可以進行。
之後就努力儲多D資金,再利用股票滾大財富。
------------------------------------------------
Q19536:
龔成老師您好,本人42歲,已經有個14歲嘅小朋友,而來年3月將會有新生命誕生。我而家創業階段,所以未有回報,老婆人工$18,000,流動資金20萬,人民幣定期96萬(24/11/2020到期),同埋以下股票。
1037-6,000 $2.2185
2380-6,000 $1.6995
2638-62 $7.9923 (23/10開始月供$500x2)
2800-19 $26.0147 (23/10開始月供$500x2)
3033-2,000 $8.0311
3316-500 $17.7094
8491-20,000 $0.6467
3-2310 $15.162
5-810 $69.586
6-1,000 $57.74
11-200 $159.422
788-10,000 $1.265
823-204 $77.297
1008-10,000 $0.604
1313-2,000 $11.838
1810-400 $19.2
3175-4,000 $5.388
6063-16,000 $1.53
8491-55,000 $1.837
想問下我可以點樣製造被動收入?以上股票有冇需要更改?人民幣定期回報低,有冇更好嘅意見,謝謝!
因為之前遇到老千股,所以依家都唔敢隨便買,機緣巧合喺Facebook見到你,聽你講過要了解股票先好買,所以買咗呢幾本書硏究"股票勝經""年報勝經""財務自由行第6版”,謝謝您Facebook 分享!
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你42歲,財富仍有增長力,因此,不用著急爭取被動收入,這刻可以目標為財富增值先。
雲智匯科技(1037)、COOL LINK(8491)、貴聯控股(1008)、智中國際(6063),質素都不太好,賣出較好。
至於中國電力(2380)、港燈(2638)、匯豐(0005)、電能(0006),只是收息股,未必太適合你,長遠宜調整翻。
你之後唔好再投資一些不知名的股票,不要再信陌生人推介,要有自己分析,我建議你考慮以下股,O作為之後的投資方向。
盈富(2800)。
銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
你最重要是保持知識的增長!
------------------------------------------------
Q19537:
老師,我報左你個進階班啦,希望再可以跟你學多d嘢😊,但7月先上,這段時間我應該做d咩可以之後上你堂,又可以跟得好d?thx
每星期看二份財務報表?
有沒有咩其他書介紹可以備課?你的書我看晒了
Thx
龔成老師:
你可以每星期研究一間公司,你要仔細少少睇年報,唔好睇完就算,要「解讀」數字背後的意義,同時用「企業評估表」進行,我寧願你仔細分析一間,深入了解,都好過表面分析幾間。
另外,你可以睇《年報勝經》《選股勝經》,以及巴菲特相關的書(初班最後一堂有一些書推介的,你照住睇)。
------------------------------------------------
Q19538:
有咩股票係會穩定增長一倍
龔成老師:
有唔少潛力股在2020年都升左,所以這刻要買入高增長的股,反而有風險。如果你能承受風險,可考慮安碩恒生科技(3067),可長線。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂,因此,這刻不能大注投資。最好的策略,就是月供,或自行分注小注慢慢收貨,原理如同不斷儲貨,這樣就能平均買入價,減少風險。然後就長線持有。
------------------------------------------------
Q19539:
成哥你好!
有幾個問題希望能夠賜教下細佬
1. 相信你都有睇過今日關於藍籌門檻嘅新聞。呢個改變會對恆指以及盈富造成咩影響?會唔會係根本性,令相關指數質素下跌?
2. 本人對香港對景持保守態度,再加上同國際嘅關係,我對香港市場嘅增長並唔樂觀。如果因此而選擇投資其他股票市場嘅ETF, 例如S&P500,係唔係一個可取嘅做法?
3. 近日有KOL指出恆指過去10年嘅增長麻麻,甚至只能平通脹,令盈富嘅表現非常一般。你會點樣回應以上嘅評論?我明白股票係forward looking, 但睇番頭先我對香港嘅睇法,盈富嘅投資價值係咪俾以前冇咁吸引?
4. 我希望揀一隻增長股,配合ETF作月供投資,你認為邊隻現價處於平或合理水平,可以開始投資?比亞迪是否好嘅選擇?
多謝老師指教!
龔成老師:
1)其實長遠是好事,因為現時的選股較少,代表性未夠,同時在選股中,未能反映現時的經濟結構,所以,長遠改變是好事。
2)可以,其實你可以加入美股指數基金VOO,如果能承受風險就加入QQQ,港股美股無衝突的,其實可以配合。
3)我建議投資者買入盈富(2800)的原因,是「平衡風險」,不是「增長」,因為我過往做了10年銀行工與證券行,見了大量散戶投資成績,我發現大多數人輸多贏少,其實對不少人來說,簡單投資盈富最好。
這是一個「穩中求勝」的工具。
當然,近年由於經濟結構改變,新經濟類企業增長力較強,而盈富較多是舊經濟股,所以過往回報一般,因此,恆指公司之後會改革指數。
其實你可以建立平衡組合,盈富,安碩恒生科技(3067)、VOO、QQQ。同時持有。
4)由於現時唔少增長股都貴,建議你考慮指數基金,如3067、QQQ。
------------------------------------------------
Q19540:
先多謝啊sir. 應用了大半年你的價值投資方法,除了身心上增長,荷包也鑊益良多,希望疫情盡早變成過去,可以跟你見個面,說句謝謝!
現有「公司」如下,777,1787,6049,2013,772,1501,1797,1801,2048,2382,9698,9618,9988,9999,9901,9992
其中,9618,9988,1801 佔了一半左右,另外其他每隻大約5-10 萬左右,全部共约230 萬,另外有40 萬現金留用隨時在適當時機加貨。原來望得很遠的房子,看來也不是沒有希望。
龔成老師:
我睇翻你的持股,基本上都是有質素的,不過有兩個問題,第一是有點散,之後未必要太急加入其他股。第二,較多是潛力類股票,這會增加了你的風險類。
同時有少少行業集中的情況,你要注意這點。
你講得對,「原來望得很遠的房子,看來也不是沒有希望」,我過往都有這想法,以為很難完成的目標,其實可以做到。
加油!現時你的財富,是你努力的成果!
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
黃金9999意思 在 龔成 Facebook 的最佳貼文
【龔成問答信箱】(Q19061-Q19080)
Q19061:
老師:見你FB 有此說法「98%的散戶想法,會停留在「賺現金差價」,但你要明白現時的貨幣系統,現金已不是錢,資產才是,不斷追隨現金無法賺到大錢。你要跳過98%散戶的想法,了解有錢人怎樣賺錢」
那麼,Cash is King 是錯的嗎?
長期持有優質股票,只買不賣,是為了賺取股息?這豈非要持有大量優質股票才有大額股息?
我是否想錯了?謝謝老師
龔成老師:
「Cash is King」是錯誤觀念。
你睇翻全球的有錢人,他們是怎樣賺錢。
我20年前開始睇致富類書,就是見到所有有錢人,都不會有「Cash is King」概念,他們明白,現金不是「真正財富」,現金只會貶值,最重要是持有資產。
李嘉誠利用地產致富,巴菲特利用長線持有優質股致富。
他們大部分資產都是一些「會增長的類別」,長期持有。
而佢地都會持有現金,不過,佢地明白現金的作用只是「等投資機會」。
現金正在無限發行,永遠貶值,持有現金只會成為輸家。
你唔好停在「要賣出股票」的概念,要有「真正財富的概念」,建議你多睇書,《股票勝經》《財務自由行》對你好有用。
------------------------------------------------
Q19062:
龔老師,你好,我近排先追隨你,我啱啱供咗盈富5000,小米1810供1000,1177供1000,比亞迪1211供2000
比亞迪呢個月先開始供,87蚊供咗23股,宜家咁高,我停?還是繼續供落去呢?
請你指教,謝謝。
龔成老師:
現時的確有點兩難,因為潛力股的股價上左唔少。你可以停一停比亞迪(1211),其他就保持月供,長線進行。
始終比亞迪$100以上都貴,你等佢落翻先考慮,又或者供另一隻。
------------------------------------------------
Q19063:
龔成老師你好,因為我唔肯定現時採用嘅儲蓄planning 好唔好,所以想問你意見
背景: 2019大學畢業生,已穩定工作一年幾個月,月入平均17k, 因為讀書嘅時候感受到貧窮嘅無力感,所以一開始做嘢就好急草錢,有持有公用股for 長線投資,自從幾個月前睇到你嘅書同fb嘅Q&A,都有每個月用$6000月供幾隻股票,當中盈富佔$3000:
長線持有中 (未有增/減持想法):
1. 0003 (10500@$11.52)
2. 02638 (4000@$7.81)
月供中:
1. 00823 (62@$62.01)
2. 00066 (150@$39.38)
3. 02800 ([email protected])
4. 00669 ([email protected])
一共大約16萬股票,如果唔計mpf,大約有5萬蚊嘅現金儲蓄,不過因為遲啲要做手術,可能得返2萬左右。
因為轉咗工,下個月我嘅薪金會上調至19k,2年後可能會同朋友夾份搬出住,變相每個月支出更多。
有計過條數,我其實係需要更多現金儲備,但係我又想係未搬去,趁未有另一筆開支前,可以增值我嘅資產,入手更多優質股。所以有幾個問題想問:
1. 因為薪金上調,我應該點去分配?定還是我要降低月供嘅金額,放更多落現金儲蓄?
2. 宜家月供緊,感覺上係有排都未供完,我想知幾多手先叫足夠?
3. 因為我所選擇嘅股票都係長線投資,增長都慢,假如真係有需要拎一筆錢出嚟,我係咪要放咗股票?定係我要接觸下短線投資?
另外特別想多謝你之前分享月供股票呢個概念,可幸嘅係 我可以趕係中低位嘅時候開始月供,所以均價都唔高,多謝!
龔成老師:
1)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
我見你現時持有的,部分只是收息股,如煤氣(0003)、港燈(2638),這些股雖然有質素,但就未必好適合你年齡,所以,你可持有,但唔好加注。在之後的財富配置,要提高翻增長力。
你可考慮月供盈富(2800)+安碩恒生科技(3067)。
2)你可以保持月供的,這是一個財富配置的計劃,不一定要有「完」的概念,是將你財富有效配置的模式。
你要思考,怎樣對你財富最平衡,現金與股票,各類股票等。同一股票太多就會有集中風險。
3)唔好短炒。
你先要儲一些現金,如果有需要用現金,就先動用這筆先。之後先考慮賣股票。
------------------------------------------------
Q19064:
成哥 有置業既問題想請教你
我同女朋友準備3年後買樓結婚
而家我收入27000 佢32000
佢係政府工會跳point
我係持牌測量師 跳糟後30000以上
3年後大家約定儲到80萬作首期同雜費
資產方面
1. 自住公屋 綠表市值220萬左右 但未供完 欠36萬
2. 港股+美股 共20港幣
3. 珠海公寓 約值100萬港幣 簽左10年租約 10年回報約25萬港幣
欠債
1.信用卡欠款約27萬 投資用 每月供6400 3年半後供完
2. 政府學費 13萬 8年後供完
手上仲有2年半後家人既綠表資格
所以我打算3年後用綠表抽新屋
因為都比較難抽中
如果抽唔中
買私樓好 定居屋二手市場好?
另外買幾大先易轉手?
如果買左上述既物業 同時又抽中左綠表市場既新居屋 點樣配置好?
麻煩哂成哥
龔成老師:
無論你之後的置業情況如果,都建議你這幾年,集中在股票方面的投資,利用股票去進行財富增值,至於買甚麼樓,慢慢決定都得。
當然,你唔能夠全部持有股票,一定要部分留現金。
你可以以平穩增長股為主,分注投資優質股就得。
置業方面。從自住角度,政府樓是較著數的,因為你每月的現金流支出較少,這就可以令你有更多資金投資,原理就是自住政府樓與住私樓,在相同自住概念情況下,政府樓的每月支出一定較少。
不過,在投資角度,私樓長遠的租金收入,以及升值能力,一般都會比政府樓較好。
你可以這刻先買二手居屋,同時之後不斷財富累積,之後先再私樓。
------------------------------------------------
Q19065:
你好呀龔先生 我有好大既家庭負擔 又唔識投資買股票 又想增加資產 銀行有70萬 成日想買保險儲蓄 由得佢擺 幾十年後比小朋友 唔知咁樣做岩唔岩
定係可以有其他方法快啲增加 請問可以比少少意見我嗎?
龔成老師:
如果你有家庭負擔,在財富配置上會偏向穩陣。
不過,全部持有現金都不是方法,你可以留$35萬現金,餘下$35萬就投資股票,部分平穩增長股,部分收息股。
平穩增長類你可以考慮盈富(2800)。
另外再加:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
收息股可考慮:5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)都可以。
你唔好一次過入這些股,要分注,要慢慢進行,部分資金要等跌市才動用。
------------------------------------------------
Q19066:
老師,我剛退休,收到一筆約七百萬現金,我好迷惘,想請你指點一下如何配置。
龔成老師:
你可以將這$700萬,分成5部分。
第一部分投資收息股,你可以建立一個收息股組合,你可考慮港燈(2638)、香港電訊(6823)、恆生(0011)、工行(1398)、置富(0778)、陽光(0435)、深高速(0548)等,大多有5%股息
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
(你可睇下《50穩健收息股》當中仲有好多)。
你平衡的投資這些股,除了可以得到穩健的收息收,同時可有效的分散風險。
第二,投資債券,你可以選擇A評級的債券,年期較長都可以,但利息卻不高。你可以到銀行問問。
第三,投資年金,你可以睇睇,這是適合你們的產品,零風險,可以有穩定回報。
第四,你亦可投資銀行低風險類的產品,你可自行到銀行了解下,總之是「低風險,持續現金流」的。
第五,持有現金,除了可做定期外,現金亦可以為你的後盾,以備不時之選。同時,若投資市場大跌,你可以在這時買到更多的收息股,股息率會進一步上升。
你可以將$700萬資金,平衡地分配在上述的項目上,對你來說是最好平衡風險,同時有穩定的現金流。
------------------------------------------------
Q19067:
Hello 龔成老師, 大家都是80後, 我仲有兩個月就40, 希望10年後財務自由, (最好係5年, 因為工作隨時可以無左). 我月入5.5萬. 約儲3萬. 現金約HK$500K, 外幣約HK$150K, 美股約HK$200K.
至於港股:
公司 號碼 股數 平均價
匯豐控股有限公司 5 1,200 $ 77.00
吉利汽車控股有限公司 175 4,000 $ 22.00
中國教育集團控股有限公司 839 2,000 $ 15.20
安徽海螺水泥股份有限公司-H股 914 4,000 $ 54.50
中國建設銀行股份有限公司—H股 939 142 around $5
工商銀行—H股 1398 2,093 around $4
太古地產有限公司 1972 800 $26
冠君產業信託 2778 3,000 around $5.5
盈富基金 2800 1,000 around $27
交通銀行股份有限公司—H股 3328 1,265 around $4
FI二南方恒指 7500 9,000 $7
京東集團-SW 9618 100 $ 226.00
網易-S 9999 100 $ 126.00
想請問老師應該步處如何? 從而5-10年後可財務自由.
龔成老師:
首先你要明白,我地繼續持有一隻股票與否,與你的買入價無關,因為這只是一個心理因素,最重要是企業的質素、前景。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你現時的年齡,可投資平穩增長股為核心。
有部分股,如匯豐(0005)、工行(1398)、建行(0939)、交行(3328)就不用持有太多。因為增長力不強,只是收息股。
另外,7500這類反向衍生工具,無必要持有。
至於其他股,無問題。之後的方向,以平穩增長股為核心,再加小部分潛力股,保持進行,已經是適合你的大方向。
------------------------------------------------
Q19068:
龔sir, 今次係第一次與你洽談,我現在61歲仲有幾年就退休啦(65歲),現在仲跑緊數,睇到你好多寶貴意見,希望65歲做到財務自遊啦
我既目標在最後5年再儲蓄多3百萬(每月4萬月供股票,28OO,66,1398,3988)
住屋已供月,退休後用來收息,以上4隻股票OK要?
住屋已供完
龔成老師:
以你的年齡,現時可以投資平穩增長股+收息股,你上述投資,方向都是這類。
上述4隻都是有質素的,可以供,不過,有些少問題。
第一,你如果$300萬集中4隻股,會有集中風險,建議分散少少。
第二,當中有2隻是銀行股,同時較集中。
平穩增值股,可再加入,例如盈富(2800)、長建(1038)、恆基(0012)、粵海(0270)。
同時,可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、置富(0778)、陽光(0435)都可以。
你可以選擇部分,去進行月供,到65歲就長期收息。
當然,你都要有部分現金在手,唔好100%股票。
------------------------------------------------
Q19069:
龔sir,唔好意思,想問一問阿sir你點睇賽晶科技(00580),因為見到公司研發IGBT 芯片,想知道佢有冇潛力
龔成老師:
我無研究賽晶科技(0580),見佢的業務都穩定的,同時有一定的盈利,財務數據算不差。
不過,見佢規模不算大,你要確定佢在全球,真的擁有相關技術,現時的研究情況如何。
我從過往的財務數據睇,見佢業務不差,財務數據不差,但就未知潛力度,建議你睇佢的年報進一步分析。
------------------------------------------------
Q19070:
龔成老師你好
本人26歲,月入$14000
現在放緊無薪假,月入大約$12000
想30歲前搵到人生第一個$100萬
現金大約$18萬
另外手持
2手滙豐(59.9入)1手生物制藥(8.9入)
2手大快活 (25.15入)1手港鐵(38.5入)
同家人夾錢買咗間屋(夾咗$30萬首期)
間屋租咗出去等人供緊
有打算賣出樓宇
可以拎返共$45萬
股票依加都係蝕緊錢,請問我應該放左佢地嗎?同埋我資金咁少,應該如何部署投資呢?謝謝你!
疫情下每月存款$3000-4000
正常情況下每月存款$5000-6000
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這年齡,匯豐(0005)這類收息股,未必適合你,你應該投資較有增長力的股。你等佢上翻多D就轉其他。
至於另外3股,都有質素的,可持有,但都不是高增長類。
如果你想30歲完成目標,要盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。月供股票都可,最重要是你仍有現金在手,唔好用盡。
你可以考慮盈富(2800)$2000。
另外再加1、2隻(每隻$1500):銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
我希望你這段時間提高財務知識,到你取到$45萬後,可以更有效運用。
------------------------------------------------
Q19071:
Sir,想問你個問題,已經買左7萬股煤氣,1萬股金莎,5000股盈富,現金約30萬左右,目前睇好博彩同消費行業,想買入銀河同高鑫
但想知道應該怎樣運用資金會比較好,本人30,每月可儲3萬
龔成老師
這些都是有質素的股票,你可以長線。其實最重要是「配置」,建立一個長遠平衡的組合。
銀娛(0027)有質素,你可分注投資,但同一行業比例唔好過多。
高鑫零售(6808)於內地經營大賣場業務,以提供各種零售商品包括紡織品、電子產品、日用百貨、大眾消費品及生鮮產品。集團除對外採購品牌產品,亦自有品牌商品。
近期被阿里收購,股價上左,這刻的投資值博率,算是中等。
睇翻佢基本面,雖然業務穩定,但睇翻佢過往的財務數據,就發現佢生意增長力不算強,盈利增長力都不強,相信佢都會因中國的經濟週期受影響,同時,網購的發展對佢都有一定程度的影響。
不過阿里收購,會利好長遠發展,這股都有前景的,但不能只睇好的一面,而以佢現時的估值計算,這刻的投資值博率只屬中等,未到吸引的人平。如投資只能小注先。
$30萬中,你可以動用$10萬,餘下就留現金。你可以分注投資股票。建議你同時加入其他股,唔好只集中幾隻股。
至於每月$3萬,可以部分月供,盈富(2800)、安碩恒生科技(3067)(小注)都可以長期月供。
------------------------------------------------
Q19072:
老師,我啲股票蝕緊,好似有排都唔上返嚟,我應該點好呀?
12,66,405,5,3,2388,823,700
12,66,405,5,3,2388,823帳面都蝕緊10幾萬,係咪經濟好啲就會上返嚟?
我知道股票係一種投資 只要有耐性,但係依家好似蝕錢多啲,應該點做呀?
龔成老師:
有兩點你要注意翻,第一,我地繼續持有一隻股票與否,與你的買入價無關,因為這只是一個心理因素,最重要是企業的質素、前景。
最重要不是賺蝕數,而是「配置」。
第二,如果大部分股你都蝕錢,而我睇翻上述股票其實有質素,相信你有買入方面未能掌握,建議你日後同月供策略,將買入價平均,對你有利。
上述股,你可以守,只要經濟好轉,過1年後,大部分都會上翻唔少。
另外,你要將「賺蝕」概念減少,要有「配置」,長期持有的概念。
------------------------------------------------
Q19073:
龔成老師。我與先生(32/30歲)有一個小朋友。現有2個物業,一個貸款270萬,一個貸款450.感覺現在的資產較偏重在物業,現時現金流只要約10萬
是否建議分批沽岀正榮服務,換碼至你fb提及的盈富,金沙,舜宇等股票會較好?還是待有較多現金流,再作佈署?
另外想問問你幾時會黎澳門開班?
龔成老師:
如果你股票持有比例唔多,建議你之後加強這方面,令你的組合唔好太多物業類。
正榮服務(6958)主要在中國從事提供物業管理服務及提供增值服務。
佢的物業管理服務,包括住宅及非住宅物業的清潔服務、安全秩序服務、園藝服務及工程維修服務。集團會委聘外包商提供若干物業管理服務等。
生意與盈利理想,現金流理想,因此整體是不差的。
不過股價就有少少波動,有時行業有炒作,股價上落較大,要注意風險。加上佢規模較細,不似同行有些較大型及有背景支持的有優勢,這會扣左d分。
整體都可以的,但未到最高質之列。這股你持有都得,但如果這股只是你唯一一隻股,就要調整。
你可以建立一個平衡的財富組合,盈富(2800)等等,「平衡」是重要的,你要從長期角度作配置。當然,留部分現金都重要的,所以,現金有$10萬是基礎。要利用「餘下現金作配置」。
其實我之前都有開過澳門班的,不過現時疫情,所以暫時停左,之後會再開翻的。
你或者可以預早留位,只要whatsapp 852-55457212我同事講,打「留位澳門班班」就得。我地有具體資料就會 whatsapp你。
因為現時已有好多澳門人留左位。
------------------------------------------------
Q19074:
Hello 老師,不知您記不記得我呢?
經過數年努力後,我在早前終於買了樓,我買了啟德(近$800萬樓價)樓花。
現想請教您,我該兩成首期上會、還是四成首期上會好?
我還在跟家人同住,想在3-4年後用綠表抽新居屋,故啟德會放租出去。謝謝您的意見。
龔成老師:
恭喜你!
這是你努力的成果!
啟德這區不差的,長遠正面。
你可以比較少首期,只要你可承受風險,同時你要有現金剩就得。
至於日後再買樓,可以,現時做好這一步先,順利做按揭,同時買樓後由於有負債,點都要預留現金。
之後就努力儲蓄投資,日後可以考慮再買樓。你方向無問題。
------------------------------------------------
Q19075:
想多問一下 2年後我會有2筆儲蓄保已回本+有少量的息
約20萬左右
想知道到時候應該拿出來投資 還是繼續滾息?
龔成老師:
如果你的投資知識好低,同時你好怕風險,就留在原有的儲蓄保。
在我地的理財配置中,儲蓄保都有佢的角色,是防守部分。不過,進攻度不足。
如果你有少少投資知識,想回報可少少,就應該將資金,轉投資其他項目,最簡單如盈富(2800),回報會較高。
------------------------------------------------
Q19076:
老師請快幫忙1789買了1萬股
点解市升佢連跌幾日?
龔成老師:
愛康醫療(1789)本身正面,不過,貴。
佢以「愛康」品牌從事設計、開發、生產及銷售骨科植入物,並專注於髖關節及膝關節置換植入物。
睇翻佢的資料,佢的產品包括用於初次手術的骨關節植入物,以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。
這股業務不差,有增長潛力,盈利增長,這反映企業有實際的價值提升。
不過,這股經常處於少少貴的水平,股價一定會較為波動。如果你持貨不多,就不用理中短期股價,如果太多,就應該減持。
------------------------------------------------
Q19077:
有時見到d潛力股票
少少上
大大回
搞到好驚
但學你話齋
而家燒銀紙階段
所以就算產品賣得比同期高增長率好似都係無太大嘅增長
另外我仲想問
我之前買左紫金(2899)
係6蚊左右就已經放左
呢排見佢都升得好快
想問下
如果我中長線嘅話
可否值得再入?
幾錢度為合理?
另外我手上有小米
華潤水泥
同周黑鴨
是否都值得做中長線?
小米而家已經試緊破頂(爭扎緊是否應該要出)
留意左你fb一段時間
想入你建議嘅粵海同維達
合理價是多少可入?
問題比較多
好多謝你嘅耐心解答
龔成老師:
你唔好太著重「股價」,最重要睇企業價值。這類公司,要睇下你博唔博,長遠的情況如何,唔好太理短期股價。
紫金礦業(2899)佢主要從事黃金及其他礦產資源的勘探、採礦、生產、冶煉及銷售。
但你要留意番,雖然這類資源股雖有投資價值,但只算中等。
原因是這樣,資源本身有一定的價值,但盈利始終受國際黃金價格影響,本質上會較為被動,無乜價格自主能力,同時產品無差異性,是典型的商品企業。這類企業都有一定的投資價值,但就不會太高。現價合理區頂。
至於你持有的股,都是有質素的,可長線。
粵海(0270)現價合理,分注投資可以。
維達(3331)合理,是平穩增長型,現價分注投資都得。
------------------------------------------------
Q19078:
龔成老師,先多謝你,我看了你的的書:80後一百萬富翁,80後二百萬富翁,選股勝經,年報勝經,我看完,我的財富與金錢都有明顯的提升,多謝你。
我現在自己下載年報,根據你書中的內容一步一步分析。
以下是我現時的財政情況,希望可以得到你的指點:
月薪 17000, 2019年畢業 現25歲 單身女 每月大概可以儲蓄10000
現持有股票分配如下
386-中國石油化 8000股 買入價 3.98 (前幾日 我3.1 賣出4000股)
1448-福壽園 4000股 買入價 7.5475
1810-小米 1200股 買入價 13.56
1830-必瘦站 4000股 買入價2.87
1928-金沙中國 400股 買入價 29.5
2382-舜宇光學 100股 買入價 123.9
股票市值大概 12萬
現在持有現金 大概6萬
問題1:
我現在的全職工作時間為一個星期6日,我呢幾日係度留意兼職情況,我前幾日見到一個時薪120的補習,一星期2日,一日2小時,請問你認為我是否去做兼職還是利用時間,增加知識。
問題2:
我目標是2021年9月是儲蓄40萬,我覺得如果按現時情況黎睇,好似無咩希望咁,請問你有什麼建議?
問題3:
請問對於我現時的財政情況有什麼好的建議?
問題4:
如果要自由,書建議要從商,但我從來無關於做生意的唸法,我的專業是關於金融的範疇,我唔知做咩生意好,我知道你都是金融出身,你可以分享下你之前做生意的經歷?如果要做生意,你有什麼建議給我?補充:我租屋住
我會耐心等待你的回覆,十分多謝你可以閱讀到此!
龔成老師:
1)我初踏出社會工作時,由於本金不足,要盡快有本金進行投資,等我可以財富滾大財富,所以,頭1、2年我不斷做兼職。
但之後,我就開始減兼職,因為我放更多時間在「研究股票」,令我可以將資金滾大。
所以,你要睇翻你自己現時的本金,去到基本狀態未。你要平衡「得到本金」與「增加投資實力」這兩方面。
2)比起2021年目標,我反而建議你定一些長少少的目標,如2025年、2030年。其實原理如同種樹,唔好太心急,反而目標長遠建立大樹。
3)分配都不差,但現金唔算多,同時之後可以加入盈富(2800),以平衡組合。
4)如果你本身有金融知識,可以集中發展「投資」,投資股票的回報可以好大,但你要專業,我一星期用6小時分析一間公司,一年50間,但一年只買1、2隻股票。
其實你投資可以發展好大,同時要放好多時間。
當然,你可以試下做小生意。我乜都做,小販、網站等等。
------------------------------------------------
Q19079:
龔sir 其實系咪唔算優質既股票大跌,你都唔會考慮,寧願買合理價既優質股?
例如005,144,659 等 都大跌
唔系無質素又唔系優質股
龔成老師:
我地最重要睇企業質素、前景,如果優質度無變,當然不用理,但如果優質度變左,就另一件事。
以銀行業來講,賺錢能力的確有所減弱,優質度減,投資價值地減,值得佔我地組合比例都會減。
至於招商局港口(0144),貿易因素同樣令佢賺錢能力與增長力減弱,雖然不是無質素,但有所減弱。
至於新創建集團(0659),這股本質就無明顯減弱,不過增長力減,以及面對中短期不利情況。
我選股,會以較高優質度及增長力行先。
------------------------------------------------
Q19080:
老師,我可以問你,你係成功之前,我記得你講過你都經歷過一d fatal mistake,但係你係點樣捱過黎,最後建立出而家自己既資產出黎?
龔成老師:
投資方面,十幾年前試過幾次近輸身家的經驗,每次都好痛,但每次我都比一個限期自己唔開心,之後就一定要重新振作。
當時輸左幾次勁之後,好決心要學好投資,同時要自己之後的投資,每一次都好小心,要逼自己好仔細研究之後,先會出手。
就算我面對唔同人生低谷,我都好快企翻起身,我會逼自己做運動,同埋要自己睇成功類書。同時要同自己講,最重要是之後的大目標,這刻只是小挫敗,是學習,之後會更強。通常就好快起翻身。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。