《 萬寧有錯嗎？ 》
( 利申 : 77歲視障婆婆仲要做清潔，真係令人惋惜唏噓，法律不外乎鄭若驊，我希望佢最後冇事，吉人天相大步檻過。
帶完頭盔，家陣要對啲「法盲」開波！)
根據報章報道，77歲清潔工人涉嫌攞走萬寧一卷印花。
不過而家受審判嘅變咗係萬寧，真係峰迴路轉。
其實成件事得兩個重點，從來冇人講。
1. 當事人聲稱以為攞走係一卷膠紙，是否可信。
2. 是否相信當事人陳述呢個責任，應該係萬寧店長或者執法機關？
由於案件仲喺度審緊，我換個啲場景同大家分析。
全香港啲寫字樓， 都一定有員工間唔中攞啲萬字夾釘書機膠紙塗改液返屋企，未聽過有公司因此報警，但係如果夜晚嚟清潔既77歲女工，順手攞走公司總值1500蚊嘅文具，負責人發現咗應該點做？
同一晚，另外一個44歲清潔男工，亦順手攞走總值8000蚊嘅文具，負責人又應該點做？
如果一單報警一單唔報，好容易中咗老妨(妨礙司法公正)， 如果單單都唔報警，又可能觸犯串謀。
所以其實冇得揀，公司負責人全部報警係最合理做法。
全香港嘅超市，所有阿姐都曾經攞過印花返屋企，後來用人手搣飛改做機器出飛，情況先至改善。
點解我話1500蚊？
因為608個印花， 價值並唔係萬寧計嘅$30400 (608 x $50)，而係佢可以換嘅實物，我粗略推斷，當佢一個平底鑊加一套瓷器杯碟，大約港幣1500蚊。
呢一點好重要，三萬幾蚊同千零蚊嘅誘因好唔同，必須講清楚。
重點就係呢度，清潔工人相信當時自己攞走嘅嘢，係一卷膠紙？ 定係一卷印花 ( 等同攞走千五蚊嘅財物 )？
簡單講，印花就好似係錢。
當年漫畫家黃玉郎坐監，係獄中畫咗幾幅漫畫俾獄友，俾懲教署發現幾乎搞上法庭，因為一張黃玉郎親筆手稿，並唔係一張紙，係有價值嘅財物。
我唔係清潔婆婆肚裏面嗰條蟲，唔知道佢當時點諗，不過我希望佢係匆忙中當膠紙咁拎錯。
嚴格嚟講，攞走一卷膠紙都唔啱，但係我相信萬寧一定唔會為一卷膠紙報警，ikea 包裝櫃檯不嬲任人用唔使錢。
最後，呢篇文章只係以法論法，年紀老邁、視力障礙、 交回財物…… 等等全部都只係求情因素，而家網上將呢啲嘢變成「免死金牌」，總之小人物對大集團，就一定係大集團錯，咁嘅風氣對法治社會並唔係好事。
李懂媽
