《阿嬌就好似行左入結界咁，一直都冇行返出來》
今日見到阿嬌個「養狗唔可以嫁獸醫？」訪問，大家都話阿嬌又嚴重左，又開始語無倫次.....
其實由始至終，我都唔覺得佢語無倫次，阿嬌係唔岩做藝人.....佢由入行開始就行左入結界，一直都冇行返出來
由day one 開始，我就覺得阿嬌表達能力比較差，如果你有留意，所有訪問阿sa 都好似參加「小學常識問答比賽」咁搶答。想當年我都成日覺得阿sa 搶野講，唔鐘意佢，但後來你明白，阿sa唔係搶野講，而係自救，佢希望搶答令阿嬌唔好出事累埋佢，阿嬌真係豬隊友。
twins 年代其實唔會出事，作為一個偶像組合，其實阿嬌呢D 唔識表達自己，唔識講野嘅人，係恰如其分，阿嬌呢隻本身內向冇咩個人意見嘅人，其實好好操控，加上有阿sa 呢個睇個樣都知佢精甩邊嘅partner，阿嬌唔會有出錯嘅機會。
但自從edison 件事之後，一切都唔同了...
記者問個D 野，阿sa唔再可以代答，當阿嬌一答，佢就出事啦。我唔覺得阿嬌今時今日先語無倫次，由始至終，佢表達能力都好差。
而最慘係，佢一唔講野，大家就覺得佢仲未釋懷，唔開心，因為個件事冇哂自信。於是好多時，佢都好似要夾硬講D 野，hyper D ，比大家覺得佢ok，佢冇野。
阿嬌近年來嘅對答，喺我角度，只係覺得佢將以前大家冇留意嘅缺點更彰顯出來....
自從個件事後，成個香港，都好似好想阿嬌「好返」，唔好再活喺陰影之下，好想佢開心返，但佢每次嘅出現同對話，都好似好牽強，好委屈。可能真係因為個件事，但我覺得更加係因為，大家夾硬要一個好內向同唔識講野嘅人，不停講野，不停同大家講「我冇事。」
阿嬌最大嘅障礙，唔係大家對佢嘅眼光，而係佢選擇左一個唔岩佢做嘅行業，而佢一直都冇咩進步過......
佢由入行開始，就好似入左一個結界咁，一直都冇行返出來。佢好似一個打機好差嘅人，一直想打爆機，但skill set 冇增強，永遠都停喺同一關，過唔到下一關，永續咁留喺同一個level 入面。
有時你真係好忟架睇住阿嬌....
其實真係好多人都好幫佢，好多人都好同情好憐憫佢，點解佢唔進步D 爭氣D。就算今日佢出來做訪問，阿sa 都好幫佢。
點解咁多年來，佢都冇因為件事而變得有霸氣同自信呢？點解人人都攻擊你個時，你唔拎D 霸氣出來diu 班人呢？點解比D 記者日日問你D 多餘問題，唔一句撻埋去「唔答」，點解做左咁多年野，都依然冇咩個人意志，唔知自己做緊咩野？
佢係好可憐，佢係受害人，但如果佢選擇一直留喺呢一行，可以救到佢嘅就只有佢自己。你冇個人意志，只係一直以「可憐」存活，就永遠都走唔出呢個結界了。
