《無神論》陳心遙
《信報》2017年12月6日《視線所及》專欄
歌手雷深如有首新歌叫《無神論》，藝深監製，黃偉文作詞。歌詞大意就係女仔會神化自己鍾意嘅男神，不知不覺變成盲目崇拜，迷失自己。回想我自己讀書嘅時候確實冇乜算係崇拜嘅藝人歌手偶像。不過記得有一次，喺大學嘅周會上，一位講者嘉賓着住件T恤，上面印咗一個女人肖像，面龐纖巧、五官清秀、雙眼有熱情和智慧嘅光芒。講者話呢個就係佢嘅偶像，問台下嘅同學有冇人知係邊個。嗰陣未興「女神」一詞，不過偶像都係呢個意思啦。冇聽嘅同學繼續自己傾偈，有留意嘅就面面相覷，心諗會唔會係邊個日本嘅新晉或老牌藝人。我一眼認出係邊個，但我真係唔記得當時有冇好認叻咁舉手答：「昂山素姬」。
莫講話係自詡進步嘅青年，大概當時崇尚自由民主嘅知識分子都會仰慕佢。本係名將之後，如果佢讀完書返緬甸依附權貴，可能會成為一位衣食無憂、優哉游哉嘅名媛。但天生一副仙風道骨嘅佢偏偏放棄一切，企咗喺反對派嘅懸崖上，力抗軍事政府成班殺氣騰騰嘅男人，淨係咁樣已經贏盡全世界嘅喝采啦。
時光飛逝，頭戴諾貝爾和平獎光環嘅佢由神壇走落凡間，女神道成肉身，坐喺權力嘅頂峰之上。一場羅興亞人道危機，令到全世界都搖頭嘆息。昂山素姬竟然話對付動亂，出動軍警，使用武力係必要嘅。對緬甸好多人嚟講，呢場可能只係佢哋之間百年宗教種族衝突嘅延續，但係對國際標準嚟講，殺人、燒村、驅逐、強暴婦女、逼人改信宗教，就係反人類嘅種族滅絕，唔係一句「以國家嘅名義」可以開脫嘅。
先幾日喺北京聲言欽佩中共執政成果嘅昂山素姬，啱啱上個禮拜俾英國牛津市議會撤銷「榮譽市民」嘅身份。好多人同事，係以你同我眨眼都追唔切嘅速度變化。
無論係藝術、科學、政治定宗教，咩範疇都好，你都可以有你嘅男神女神，但記住，青春嘅熱血，有朝一日會變成權位名譽嘅腎上腺素。當一個人開始講「大局為重」、「以睇整體最大嘅利益」去犧牲小眾嘅時候，就係你離教嘅時候喇。
「迷過幾多男神，再回頭已經不流行⋯⋯求愛心急如焚，我才神化一堆凡人。」心中有神，全因自覺位卑職微，想世界變革但又無聲無力，總係幻想有人代勞。除非英年早逝如甘迺迪、如梵高、如李小龍，否則眾神都難免有崩壞嘅一日。
最後，你應該知道，要令世界更美好，不能靠神蹟，只能靠自己雙手。
#無神論 #雷深如 #JArie #藝深 #黃偉文 #男神 #女神 #昂山素姬 #羅興亞人 #以國家的名義 #迷過幾多男神 #再回頭已經不流行 #諾貝爾和平獎 #甘迺迪 #梵高 #李小龍 #信報 #陳心遙
雙眼無神面相 在 [徵女] 單親爸的山友兼人生伴侶（文長慎入） - 看板AllTogether 的必吃