繼續係香港人、香港事。全文畢錄，碌落少少就有。
Medium link 喺度，自便：
https://link.medium.com/VT0CHgmNEZ
//
2019 年 9 月 1 日，香港大嶼山上演一幕現代版「鄧寇克大逃亡」，一眾示威者發揮驚人意志，由機場走到東涌，再走到欣澳，最後在青嶼幹線收費廣場等得到救命草，一架又一架嘅義載素人車輛，將示威者帶到安全嘅地方，盡顯人性光輝。
喺呢個星期日，喺相距六小時時差嘅比利時，上演一場一級方程式賽事。晴空之下，陰霾籠罩。法國新秀車手 Antoine Hubert 上日喺二級方程式嘅賽事中意外身亡，同佢由細鬥車鬥到大嘅法拉利車手陸克萊 (Charles LeClerc ，多謝 丹尼爾 vs 陳恩能 譯得咁好) ，承受住喪友之痛及五屆總冠軍咸美頓 (Lewis Hamilton) 亦步亦趨嘅壓力，以不足一秒嘅差距，首摘分站桂冠。賽後陸克萊亦將勝利奉獻畀故友，話會銘記呢一場車。
喺致命意外發生之後，賽車記者 Andrew Benson 寫咗篇文解釋，點解車手明知一級方程式呢種運動隨時攞命，但依然喺駕駛座中，將平衡力、勇氣、技術、判斷力及亢奮共冶一爐，以時速 300 公里穿越每條直路彎路。原因，係賽車本身，就係一種咁特別嘅運動，只以力壓群雄為目標。關於意外，佢咁講：
"There will be a full investigation into this accident... The forces involved will be analysed. Lessons will be learned, and changes made. But in some cases, there is not much to be done. The human body can only take so much, which is why the risk of motorsport can never be entirely eradicated."
係呀，無論大家如何以古鑒今，賽車同賽道嘅設計點樣改良，安全系數再高，有啲意外一旦發生，人體能夠承受咁多，就係咁多。賽車嘅風險，從來都不容抹殺。
- - -
星期一，開學日。有人罷課、有人罷工、有人開學、有人返工。
當喇沙、皇仁、聖方濟各等名校嘅學生戴上頭盔同面罩，默站甚至跪喺校門外嘅時候，另外有啲學生，可能就靜靜雞咁，喺紀律部隊職員保護之下，返學。例如話，警察公共關係科 (PPRB) 總警司謝振中嘅兩個仔，據報就係坐警隊嘅私家車返學，仲要有便衣警員喺校內出現，唔知以為拍緊《逃學威龍》。
喺警方每日例行嘅記者招待會上，記者當然就呢個疑似特權問題窮追猛打。不過謝 Sir 自己就冇回應，將個波射咗畀坐旁觀嘅 “Er Er Sir” 江永祥。咁 “Er Er Sir” 例牌咁 Er 住講一大輪廢事遊花園之後，就用雙手整理枱頭叠紙，然後同謝 Sir 轉身拂袖而去。
如果大家有睇到 Er Er Sir 答問題嘅呢條片，可能都會有一個疑問：點解阿 Sir 今日你個樣咁心虛、咁怯懦嘅？平時讀稿神態自若、譴責示威者嘅霸氣都忽然間盪然無存。阿 Sir ，你今日姨媽到定係賭輸馬呀？表現判若兩人喎。
其實原因又唔難理解嘅。 PPRB 平日記招上嘅應對，一係就關於同袍嘅受辱同受傷；唔係就關於「暴徒」嘅破壞同惡行。有幾可會講到自己，或者自己屋企人嘅事？當話題涉及到尚未成年，需要成年人保護嘅兒女嘅時候，Er Er Sir 唔答又唔得，答又可能流露一啲情感，心入面隨時嬲鳩緊謝 Sir 乜咁大整蠱。
- - -
咁你話， Er Er Sir 怕表露咗啲乜嘢情感呢？
即係咁。仔女喺屋企，仲可以由家人或者工人姐姐睇住，放假出街，自己𥄫實亦都得。唯獨是返學，喺一千幾百個年齡相若嘅學生之間，如果自己嘅子女不幸成為眾矢之的，咁就認真大檸樂。
站在父母嘅角度，當然唔希望子女蒙受任何髮膚上嘅傷害 (聲明：切勿以暴易暴，打人係唔啱嘅，犯法嘅嘢真係唔好做) 。但係打交嘅皮外傷總有癒合嘅一日，而小朋友成長真正有影響嘅，可能係心理上嘅陰影：同學嘅排擠、奇異眼光、甚至被當透明人，因為有特權 (或者手中嘅掌心雷) 而被疏遠，諸如此類。
如果阿 Sir 嘅子女返到屋企，同嗲哋媽咪講：「返到學校，啲同學仔都唔肯同我講嘢、又唔同我玩呀⋯⋯我係咪做錯咗啲乜嘢？」呢一刻，假使你代入阿 Sir 嘅身份，你，會作何感想？每個月逗緊嗰份糧、穿著制服嘅光榮同使命感、特區同中央政府對你嘅嘉許同肯定，同子女嘅童年、青春及校園生活相比，邊樣重要啲？
- - -
當一幕又一幕警察、防暴乃至暴龍以不必要嘅武力去殘暴對待示威者、喺太子地鐵站亂棍毆打乘客、向投撚晒降嘅平民發射胡椒噴霧嘅時候，我能夠理解佢哋一係已經殺紅咗眼，一係就已經畀上級指令洗撚晒腦，行動同機械人無異。
但係差人都休班嘅時候，返到屋企，面對屋企人，尤其是性格同價值觀都未定型、對人際關係以至政治時局一知半解嘅子女嘅時候，一眾休班警又如何正常生活？如何面對一啲言者無心，但非常尖銳嘅問題？ The human body can only take so much.
香港嘅社會撕裂，始於黃藍，繼而分黑白，再細分到警察同平民。
本應柴娃娃開心下嘅球迷會都杯葛警察 (反而原本敵對嘅球迷會就自發攜手 We Connect ，林鄭真係功德無量) ；本來歌舞昇平嘅商場但凡有警員出沒就畀人噓到耳聾；本應天真無邪嘅小學、青春熱血嘅中學，若然都出現警民分化，除非警隊能夠肯定自己嘅權威千秋百載，警員能夠自欺欺人到 2047 ，否則，情感上嘅崩潰，亦可能係香港人命運嘅一個轉捩點。
