（劇透講兩句《低壓槽》）
「我很懷念膠片的味道」
—
睇完《低壓槽》，你會喺兩個鐘頭內變咗人種，又會跑得快咗，仲減埋肥大隻曬，知唔知點解？
—
因為你成個腦都會係無數嘅黑人問號。
—
係咪覺得好九唔搭八呢？無錯，「九唔搭八」就係我睇完《低壓槽》立即同唯一嘅感覺，果種打冷震嘅感覺係盈滿於全身，透過血液喺身體上下流動，睇到尾係會有種柒到如坐針氈嘅感覺。
—
咁我係咪覺得《低壓槽》係垃圾？絕對唔係，因為套戲係九唔搭八到，睇上半套戲嘅時候，我想大讚佢係一套好戲，果時我連CAPTION都諗埋：「仍然係張家輝，不過係更好嘅張家輝」。但睇到尾，我又呆曬。
—
記得當初睇《陀地驅魔人》，我即時有個諗法：套戲擺喺九十年代上，情懷啱，會係一套好戲，但擺喺201X年，未必有太大驚喜，但我仍然睇到張導演對電影嘅堅持。
—
而《低壓槽》亦一樣，好多時你會挑剔唔同作品嘅犯駁，唔合乎科學物理等等，但啲嘢你挑唔挑剔，睇得順唔順眼，其實係睇番電影入面嘅世界觀同設定。正如一套製作超認真嘅警匪片，主角喺結局無啦啦刀槍不入，大家一定插硬；而喺超級英雄電影，一拳可以打到個敵人飛上外太空，你又唔會詐型。
—
而《低壓槽》入面一切嘅動作場面我唔打算去挑骨頭，因為張導想營造嘅，係《力王》嘅感覺，樊少皇點解唔一開始就做一拳超人，打爛個監獄？講故唔好駁故，風格強烈就勝於一切，套戲前半係做到。
—
再講番套戲點九唔搭八，我諗最大嘅問題係導演編劇對於觀眾接收能力嘅錯判，HIDDEN咗太多嘢無交代。我作為一個普通觀眾，好多時候根本唔能夠掌握到導演想表達啲乜，令我難以理解整個故事。
—
例如開場點解無啦啦要打開隻手嚇果隻狗？果啲細路記住密碼又做緊咩，點解唔寫低佢？律政司角色又係啲咩？個老闆搞咁大壇嘢出嚟又係想點（佢有話想搵一個佢欣賞嘅人嘅...）？個細路女點解零零舍舍咁重要？
—
套戲亦試圖拋好多金句出嚟，但問題係觀眾對於劇情有太多唔了解，亦未能掌握節奏，例如秦沛叔話起身唔想見到「馬頭」，應該係指孤城變番個荒野之地？如此種種令對白流於突兀，好似特登CHOK樣咁，知道你CHOK就唔好睇架喇。罪犯嘅味道又係啲乜？
—
殺正義警察一幕，泰國一幕，熱氣球一幕尤柒，當然我明白張導演「以武制暴」嘅概念，手段一樣，但目標可以唔同，點解老闆要玩煙仔自殺？佢唔係就快死架喇咩？點解殺個警察要搞大龍鳳？開槍射Q死佢咪得囉。
—
乜嘢係正義？點樣可以伸張正義？制度內抑或係制度外？張導其實好多嘢想講，自己有遮應唔應該借遮比無遮嘅人？呢啲嘢當然係想講犧牲，但表達手法未必太搞笑。以武制暴，以黑吃黑，黑同白中間，仲有灰，明暗本來就係一體兩面，呢個社會唔可以無咗罪犯，電影嘅後半部有海量嘅訊息，總係喺觀眾仲迷緊、意想不到嘅時候說教。
—
有無人get到張家輝究竟點解要殺咗自己個BB？啲細路定時定候又睇緊乜嘢J圖？點解個正義警察有幕戲係拎住自拍棍嚟拍，喺電影語言上有乜心思？我見唔少人話套戲係意識流，又到底乜嘢叫意識流呢？
