［禍不三行，卡夫亨氏大插三成］今個週末最震撼嘅財金新聞一定係呢單。卡夫亨氏Kraft Heinz，股價大插近30%，史上最大單日跌幅！
Kraft Heinz，就係合併出嚟嘅一間公司。 Kraft 就係卡夫芝士間卡夫，Heinz就固然係茄汁同茄汁豆（但我鍾意是蜜味！）嗰間。兩間早幾年合併咗，理論上強強聯手，今次就瀨鑊勁。
原本我睇到頭條，第一個反應就係，買啦！因為呢啲超級巨獸公司，眾多牌子，你根本冇得杯葛，客戶忠誠又極高—仲要啲客都未必知自己食嘅品牌轉咗幾手。
所以上次Johnson and Johnson因為爽身粉可能有問題，「最高賠償XXX」時，我叫人快啲去買，而家未上返去大插之前，但都係一個好建議 （http://bit.ly/2IxJxmd）。國泰果啲乜鬼「最多罸款40億」更加係得啖笑（http://bit.ly/2Iw5hiu）
但，投資有咁簡單就好。唔係叫你有醜聞仆到去買。睇下衰乜先。國泰莊臣呢啲，一單事件，仲係唔知要唔要賠，就簡單啲。但Kraft Heinz今次一衰衰三樣嘢。
首先，減派息，一減減三份一。好衰唔衰可口可樂之前一日剛好宣佈連續57年加派息！好堅。
另外，公司撇帳，一鑊就撇咗154億美金（！！！）。大約即係幾多？2017年公司收入262億，純利110億（按：應該有特殊項目，冇咁高純利率的，再對上一年收入差不多，純利35億，似係正常啲）—即係，半年嘅收入咁滯。你國泰果啲咩罰一年收入4%（40億）真係濕濕碎，仲要只係「最壞情況」。Kraft Heinz一嘢就撇帳超過半年收入。咁業績當然見紅啦，2017年100億純利，2018年…..虧損102億。呢啲就真係管理不善啦，唔見你啲國泰抽水期油專家出嚟講兩句？
第三，仲要收到美國證監傳票（Subpoena是也，上次篇文講過眾數唔係Subpoene http://bit.ly/2IGexQS），懷疑會計政策有問題．
會計政策做乜畀人查唔知。但講頭兩點，減派息明顯就係大撇帳大蝕錢嘅結果。做乜大撇帳？公司就話係因為供應鏈問題（即係乜？）同埋利息上升（唔係就快減息？而美國長債而家2.7厘息都冇），令到啲早期收購可能會冇預期咁值錢（呢啲技術嘢另文先計，goodwill impairment test）。
分析員唔多信服喎，更加擔心係因為口味轉變，大家都食健康啲嘅嘢，唔係罐頭唔係茄汁豆唔係熱狗。其實未有呢單嘢之前，Kraft Heinz股價都一路表現唔好
當然了，同業家樂氏Kellogg或者金寶湯都大跌。
又，呢隻Kraft Heinz，係股神畢菲特嘅重貨投資之一（唔係求其買少少嗰啲），甚至單世紀收購都係佢有份撮合的，舊年仲諗住買埋聯合利華（Unilever），亦係佢出馬。
所以，巴郡股價當然都係跌，股神又蒸發幾多幾多身家啦。哦。
又，就係早一日，先寫過雀巢之前一路賣咁啲朱古力業務出去，其中一個接手嘅就係意大利Ferrero （金莎嗰間）。就唔係意大利佬特別有良心或冇良心—但Ferrero冇上市嘛！話知你！（http://bit.ly/2IuAIte）。所以本專頁真係有啟發性呀！
金寶湯罐頭分析 在 金寶湯罐頭(藝術作品) - 维基百科，自由的百科全书 的相關結果
金宝汤罐头 （Campbell's Soup Cans），有時稱作32罐金宝汤罐头（32 Campbell's Soup Cans）是一幅由美國藝術家安迪·沃荷於1962年所創作的藝術作品。 ... <看更多>