https://www.patreon.com/posts/54876341
《EVA 新劇場版：終》對唔同人可能有唔同意義，而對我黎講，相比起娛樂，睇完佢更加似係一場儀式。
唔好誤會，我唔係話《終》唔好睇，甚至乎當新劇場版經已進入第四集，當觀眾對呢套作品嘅期望經已驟至頂峰，庵野秀明響敘述故事嘅功力依然無令人失望，視覺效果響今時今日已被CG寵壞嘅新一代觀眾黎講，仍然有住相當出色；甚至有好幾幕嘅分鏡場景，例如明日香迫真嗣食多士一幕、同埋明日香同真希波響無重狀態下搵真嗣一幕，都係令我睇到非常感動，久久未能忘懷。
但響當年經歷過《EVA》電視版最後兩集、以及Death & Rebirth嘅衝擊，始終令我睇呢個「EVA最後結局」之前有種不安感──庵野秀明會唔會再一次用一個超乎我接受嘅程度進行一場思想震撼？
結果相比起塑造一個全新嘅結局，庵野秀明選擇咗將過往嘅兩個結局重新粉飾一次，好多熟悉嘅場景再次出現：超巨型綾波麗（不過呢個公仔個材質好差，個人覺得係全片敗筆）、電車對白、將長槍刺穿胸口嘅儀式、渚薰坐響無頭天使望海一幕、真嗣同明日香響海灘獨處……只係佢嘅處理比當年更圓滑，比以前更容易理解。
經歷過當年嘅衝擊，再睇一次《終》嘅「半新演繹」，當然比當年第一次睇舊版兩個結局容易接受得多；例如相比起以前父子去到結局比較隱喻嘅矛盾，今次就安排佢地痛痛快快打一場，感覺上好似睇《刃牙》史上最強父子吵架一樣直接。
反而入面一啲改變，由真嗣獨白一轉變成佢老豆獨白，再透過自己個仔令佢慢慢開懷，以「落車」象徵一種對生命鬱悶嘅解脫；當真嗣再次面對明日香，唔再以鍊死對方、而係以感謝作為替代，完全感受到庵野秀明由過去憤世嫉俗慢慢過渡到去而家就算唔能夠完全睇化，至少能夠比以前更加正面看待世界。
然後睇住幾個主角都由14歲o靚仔變成大人，跟住望一望自己，當日TV版響香港問人借錄影帶睇果陣都仲係一隻中學雞，去到今日睇《終》經已成為一條廢中；由當日經歷EVA TV版第一次衝擊、之後劇場版第二次衝擊，再去到今日《終》完成近第三次衝擊，雖然無好似當年咁樣顛覆三觀，卻有一種終於完成一項人生Checklist嘅滿足感。
所以不得不老土講句，真係幾生修倒，先可以遇到《新世界福音戰士》呢套神作。
近第三次衝擊 在 [閒聊] 庵野：原本的Q是完全沒有真嗣的登場戲份- 看板C_Chat 的必吃