【何麒的生活隨筆】
Hoki the Kongner：單車EDC
話說最近我買咗架摺車，有時夜晚食完飯或者放假會踩下單車，都幾寫意。今日就同大家分享下我踩單車嘅時候會有啲咩野袋喺身啦。
EDC按字面咁解就係 “Everyday Carry”， 但佢背後嘅精神係做好準備去應付唔同嘅狀況。首先講左法例規定要有嘅野先啦。
我係網上面搵到呢份小冊子，入面有講踩單車有啲咩配件係法規要求你要有嘅嘢：
(link: https://www.td.gov.hk/file…/…/content_182/rs_bulletin_32.pdf)
首先你架單車一定要有嘅就係「前白後紅」，即係要一盞白光嘅前燈用嚟照前面嘅路面，同埋一盞紅光嘅尾燈，等後面嘅車睇到你。咁揀單車燈點先至揀到啱自己用嘅呢？主要就係喺揀嘅時候要睇盞燈嘅光度有幾多流明（Lumens，姐係光度嘅單位）。例如我淨係喺單車徑度踩，其實大約100流明嘅燈都已經唔錯，但如果你踩開單車嘅地方好暗，又或者你會玩越野路段嘅話，咁可能你就會需要揀一盞光啲嘅燈，甚至自己再帶埋頭燈。其次就係要睇燈嘅續航力，即係盞燈着到幾耐，呢樣視乎你平時踩車會踩幾耐。以我平時嘅習慣嚟講，我就會揀大約3-4個鐘續航嘅燈都夠用。不過如果你係會去台灣環島遊嗰啲嘅話，可能就要揀隻續航耐啲嘅燈。跟住你都要睇下啲燈可唔可以用USB叉電，同埋盞燈裝唔裝到落你架車度，尤其是尾燈，因為有啲款係裝喺Seat Post，而有另一啲係裝喺座位下面。
另外，小冊子入面講嘅反光板，鈴鈴同煞車如果你已經裝咗喺架車度嘅話，咁就唔使當EDC咁拎黎拎去啦。
好喇咁講完法例規定你要有嘅嘢之後，不如就講下啲法例要求外嘅野啦。我踩車通常都會孭個細嘅斜孭袋，事關我架車冇水壺又冇袋架而我又唔想裝，所以到最後就決定自己孭袋算數。通常短程我會孭個Sling Bag，而長程跨區嘅話我多數都會孭背囊。
我每次踩車都會帶水，因為踩到咁上下真係會口乾，有時唔使唞都要落車飲啖水。踩短程就會拎個細嘅軟水樽，長程就會拎番個大啲嘅樽。再者，有水係身好處就係有時整親都可以用黎沖一沖洗個傷口，至少可以沖走啲污糟野先。我明白用水黎沖未必係最好嘅方法，但係喺無急救箱嘅情況下就唯有將就下，直到搵到適當嘅治理。
另外每次出車我都會帶少少急救野係身，通常都會係一啲膠布同埋一啲敷料。因為踩單車其實有時都會遇到意外，會跌平衡跌車，會撞到之類，所以有少少急救用品喺身就點都穩陣啲。膠布可以用喺啲細範圍嘅傷口。而敷料就可以用喺啲比較大範圍嘅傷口個度。老老實實，倘若跌車擦傷，個傷口都唔會細得去邊，喺呢啲情況之下，膠布都一定衾唔哂成個傷口，不過呢啲都只係屬於簡單臨時嘅急救救治，受咗傷當然最好都係去睇醫生Check下有無細菌感染啦。
最後就係我次次出車都會戴手套，主要係我以前試過踩單車落斜嘅時候試過因為鎖左頭轆而成個人拋咗出車外，嗰次就係有戴手套所以先無傷到隻手，所以自此之後我真係每次都會戴手套出車，重要係全指個隻。不過全指嘅手套係會比較焗，因此如果你想要戴手套嘅話，你都可以揀半指嘅手套，一黎冇咁焗，二黎靈活少少，唔使除手套都可以用到電話，到你要踩長途要查地圖嘅時候就會方便啲。
老老實實，其實我都想買返個單車頭盔，唔知大家又有無好介紹呢？有嘅話麻煩係留言講低啦。今次講到呢度先，我地鼠年再見喇，Bye~
（本欄逢周三更新。敬希讀者垂注）
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
HappyKongner 招稿喇！！！
我哋嚟緊會喺逢星期一、五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
