［值68蚊嘅合和，胡應湘40蚊就收返晒。因為你唔畀佢連屎都冇得你食］
合和通過私有化，David Webb即時就寫文贈慶。應該係如果之前寫會畀人覺得影響私有化吧，所以寫定，一完成就出。（Hopewell and the lemon discount http://bit.ly/2Fp18rJ）
David Webb唔係只係話私有化作價唔吸引。當然我理解佢都覺得唔吸引，但更深層次嘅係，咁唔及引嘅作價，小股東都爭住畀佢，高票數通過。背後反映乜？
事實冇人迫小股東支持丫，冇人迫你食屎。但大家都爭住食。即係代表乜？就係，唔食嘅，你連屎都冇得食。
真喎，合和帳面資產值（Book value per share），講緊大約60蚊，就係最新盤數上面嘅凈資產。咁當然你會話係低估啦，土地庫存值錢嘛，或者將來有嘢起好嘛（呢個情況係合和二期）。咁所以分析員睇地產股唔講book value，係講Adjusted NAV，計埋你啲地咩地積比呀建築成本幾多呀賣到幾錢尺呀之類。今次合和因為私有化，都要搵出面獨立（如是我聞）測量師估值。咁Adjusted NAV幾多？醒多十幾巴仙，加多8蚊畀你，差不多68蚊一股。
然後私有化作價幾多？39蚊搞掂，人人投降畀佢。人地寫到明值68蚊嘅嘢，你都係要39蚊投降，43% 折讓。點解？因為唔過你分分鐘屎都冇得食。未宣佈私有化之前，26蚊咋。你係咪想跌返落去丫？一拍兩散鬥長命？睇下胡文新咁健康有排玩喎（聽聞話唔玩）。你有39蚊唔袋要鬥氣？
本來，投資嘅嘢，都係願打願捱。亦冇人拎支槍要你買合和，合和嘅作風亦都好似汽車維修員咁出名，你應該感受到胡應湘咁多年嘅誠意同體育精神。我都寫文講過（http://bit.ly/2EeISmJ 54 今夜星光誘惑: 合和胡應湘的四件事 ）大股東忽悠小股東搵鳩你笨就一定，但都有程度上嘅分別。
事出必有因，大折讓嘅唔只合和一隻，亦唔只係講大陸股。大陸股固然差，但不代表香港股就唔差。大把華資公司都係咁大折讓，費事開名。
合和胡應湘係好人一個，但做生意認真麻麻，應係市場共識。亦唔使主觀，股價自然話畀你知。但股價不濟唔止反映呢樣嘢。你做生意差，賺唔到錢，盈利升得慢甚至冇，自然個股本就冇乜增長（純利扣除派息同回購後，咪在股本碌上去咯）。咁你咪可能好多年先到68蚊咯，人地新地長實可能碌得快好多，呢個係第一樣嘢。
但合和，同埋某啲公司嘅問題，就唔止係做生意差咁簡單。直頭係公司管治水平低下，即係冇為股東創造價值。唔係同小股東一條船。你碌多年先68蚊，冇問題丫，咁咪68蚊咯！理論上呢個NAV就係公司「呢一刻」值幾錢，資產減負債，所謂嘅清盤價（當然實際上你清盤人人就壓你價）。
你諗下，當你自己搞間公司，點解你間公司明明資產減負債後4億，但街度賣緊2億？唔會架嘛。而合和私有化之前，68蚊嘅NAV，股價只係26蚊左右，60%折讓咁滯。
合和呢類公司嘅例子，就話你知教科書嘅商業101，講股份制公司，大家夾錢做海盜船，你夾一份我夾十份，有鑊齊齊孭有錢齊齊分，係太理想化嘅。現實係大股東嘅影響力不成正比，佢拎50%，你拎1%，但佢嘅權力邊止係你50倍。
正如David Webb講，實際上呢，啲小股東基本上只能聽天由命，只能希望大股東仁悲為懷（例如李嘉誠或郭氏三兄弟），仆街還仆街都唔好太過仆街，留返小小良知，顧及後人仲要有屎忽。除此之外實在係冇乜嘢做到。啲咩獨立董事呢，係廢嘅。
亦都因為咁，小股東對於公司管理層（有時仲要係大股東自己）嘅薪酬呀（你睇東亞？），用邊間圍威喂核數師呀等等，全部都係冇SAY嘅。最慘係維權股東Activist 仲要畀人覺得係搞屎棍。
所以任你點鬧都好，做李嘉誠嘅顧客可能差（例如鑽石廳，例如百佳賣油魚），但咁多年長實和黃等等公司，對得住股東。真係同股東一齊發達嘅公司，實在唔係好多間咋。
最後你會話，扯，咁都落左幕啦，合和仆街咪有得佢仆街，都入土為安啦。錯了，其實係影響成個市場的。David Webb有提到Lemon discount，經濟學嘢，講二手車，可以自己去睇下（http://bit.ly/2Ft2kdJ）。正係會劣幣驅逐良幣。如果啲公司咁嘅折讓係常態，即係隻隻都對NAV大折讓，咁我係正正經經嘅公司，就唔會願意咁嘅價上市嘛。我咪去第度上咯。於是留低在香港嘅只有垃圾公司咁話。
（註：好快講下，所謂Lemon其實係指次貨，最初個故事講二手車，影響好深遠嘅一篇論文（我都識，證明真係好深遠）。講資訊不對稱，二手車市場，車主（賣家）知道架車係好車定垃圾車（檸檬是也），但買家唔會咁易知道。假設好車值一萬蚊，垃圾車值一千，而市場上好車同垃圾車一半半，咁買家唔知情況下，只能夠碰下運氣，咪畀個平均價，開五千五買車—問題係，真正嘅好車車主唔會五千五賣畀你嘛！所以最後你開五千五，買到嘅全部都係垃圾車。就係劣幣驅逐良幣，忠忠直直終須乞食啦。解決方法？好多。其中一個就係保用。買家可能要畀貴少少，但我保證幾年內壞車嘅賠錢畀你。呢個就係訊息，只有好車嘅車主先負擔得到呢種風險）
資訊不對稱二手車 在 CH4 市場失靈之三- 資訊不對稱之逆選擇 - YouTube 的必吃
延續前面介紹的市場失靈，以George Akerlof(1970)為基礎，說明 二手車 市場在 資訊不對稱 之下所發生的逆選擇現象。 ... <看更多>