關於 買完月餅我連麵包蛋卷都掃埋 ，我們在網路上蒐集到這些相關的討論、資訊與評價

🥮

【點解要撐大班】- 徐緣

香港人真可愛，話撐大班，真係坐言起行，買到多款口味斷市。

我見有人話大班跪咗，唔應該撐。因為佢地出咗聲明，同公司太子爺 Garic Kwok 割蓆，指出其 Facebook 言論同信息轉載，純屬他個人行為，並不代表香港大班麵包有限公司之立場。而 Garic 亦喺 Facebook 出咗道歉聲明，內容同公司嘅聲明相近。

太子爺係反送中同路人，佢嘅個人表達自由，換嚟被藍絲追擊嘅惡果，影響到自己家族生意，以道歉同切割希望減少對家庭嘅影響，我覺得係情有可原。

更何況喺跪咗嘅情況下，喺只係真心講出心底話都搞到要公開道歉嘅委屈下，都仲係要被《人民日報》喺微博高調清算，硬屈「亂港」罪名，誓要以太子爺嘅個人分享將大班置諸死地，導致淘寶、京東、以及多間超市大班月餅全線下架。

呢種極權式高調打壓，就係要嚇到班商家買你怕，唔敢講反建制嘅說話，噤若寒蟬。大班以及太子爺 Garic，同我地每個香港人一樣，都係極權統治下嘅受害者，點解我地唔可以對佢地寬容少少？

要行到跪呢一步，對一個骨子裡反建制嘅人嚟講，心裡一定唔好受，但生意還生意，公司養住咁多人，要為每一個可能被自己影響嘅員工同佢地嘅家庭負責，難免有顧慮。生意人要型到盡頭同阿爺死撐，比想像中艱難。

依家大班太子爺因敢於發聲而遭逢劫難，無論佢有跪定冇跪，大家都應該撐佢地。因為呢個會對其他商家有示範作用，原來講香港人話，唔洗揜住良心媚共，同樣可以有生意增長。

至於佢地落 TVB 廣告嘅指控，坦白講，做月餅生意銷售期非常短，兼且買家年齡層廣，要選取受眾面最濶嘅媒體以達至宣傳效果，難免暫時要㨂 TVB。所以我地先要呼籲大眾轉台，若其他電視台收視唔急升，商家嘅媒體選擇始終受限。而以我理解，月餅公司落 TVB 廣告，早於上年尾已要做 commitment，唔係六月抗爭後先決定，而今年 TVB 可能見公眾鬧杯葛，更唔容許商家將廣告 commitment 延後或取消，我聽行家講，好多品牌都因為咁而夾死喺中間，進退維谷。

反送中運動有句名言，叫「核爆都唔割」，那怕前線手足犯了一點錯誤，我地都同情地理解，盡力去支持，維持最大嘅團結，保持整體嘅士氣。我曾經就示威人士嘅行為寫過一啲意見，有心好友溫馨提醒我，唔好做冷氣軍師，對前線手足多啲包容。為顧全大局，我理解好友提醒嘅用心。

故此，若果有同路生意人，或明或暗支持抗爭反對建制，喺商界已屬鳳毛麟角嘅稀有品種。對心存良知嘅商人，即使佢地嘅商業行為，唔能夠完美咁達到抗爭者認為最高風亮節嘅標準，我認為都可以借用少少「核爆都唔割」精神，支持一下佢地。

局勢越演越烈，認識嘅商界朋友，生意無一倖免受到影響。呢個時候，更需要有多啲香港人，去撐好似大班太子爺呢啲懷抱香港核心價值嘅港產商人。若佢地最後頂唔住，其他商家只會更怕極權，為求自保縮得更後。

我上星期搞嘅「反白色恐怖人才配對服務」，反應踴躍，好多良心僱主暗地發力支持。我唔希望有好似大班咁嘅品牌俾極權迫死，最後嚇到連暗力去挺良心運動嘅商人，都絕跡香港。

我同大班太子爺 Garic 唔熟，記憶中喺一次商會晚宴有一面之緣，互相派過咭片嗰隻，連認識都說唔上。好多人以為我幫朋友所以力撐大班，其實，我只係撐緊一個被打壓嘅香港小商人。

同大班嘅店員傾計，佢地話啱啱一星期生意明顯有升，生客都多咗好多，賣斷嘅以散裝為主，禮盒裝存貨亦充足。

若果你仍然需要買月餅送禮，我誠意推介大家，支持一下大班冰皮月餅。

都係嗰句：同路人，我地香港人自己救。

#買完月餅我連麵包蛋卷都掃埋