［貧窮限制了想像力，也同時增加了想像力］走漏呢隻添。其實昨日想貼，但結果都冇。仲要昨日只係諗起鴻海精密科技（台股），漏咗呢隻細細粒容易食嘅。事實鴻海都有照升，但當然冇富士康咁幾日9毫子上到 1個4咁堅，升近六成。
背後嘅故事當然係郭台銘選總統，昨日已經漏晒風。但，其實我唔係好明兩者有乜關係，雖則炒咗先算。佢做咗總統就益自己生意？即使台灣咁黑暗都好難咁明目張膽吧，更何況鴻海唔係侵侵啲濕鳩公司，世界級巨企，你要做幾多嘢先再谷到佢？相反如果係隻細公司（例如陳智思間亞州金融662），話咁易就炒得起，你批個牌比佢已經不得了。
另外，記性好嘅記得隻美維（3313，皮已收），當時有同事讀錯做姜維控股。有乜關係？隻嘢就係唐英年家族嘅，當時傳話可能因為唐英年選特首，就私有化埋佢，費事煩（可見大家雖然仇富，唐英年雖則成日畀人話失言，但啲格調都係好過後來梁振英嘅）。後來有人（即係我）成日講662，都係因為同樣嘅邏輯。當然而家明顯陳智思唔會選
關於鴻海／富士康，回多次帶，當年郭董元配死咗（2005），正係超級王老五，我剛入行做分析員，成個團隊都很天真很傻（我指我同事，唔係我啲馬仔，都話我新入行）。當時郭董成日上娛樂版，然後有排郭董係咁減持富士康，朝早開會（分析員八點甚至七點半就開會架啦，有能力你唔好早返丫），有sales問起知唔知有冇特別原因。
當其時負責嘅同事（女仔一個）就答：可能因為傳佢結婚？
結果真係比個sales指住嚟笑。幸好嗰個sales比較友善（有啲係當面指住你屌話垃圾然後行出去，我試過，當然係比人指），笑完一輪都係教返佢：你估我地咩，結婚要沽股票。
後來此女結咗婚，冇請我飲我唔知咩回事，後來佢轉工都有人打嚟問reference。之後就扶搖直上，而家撈得好撚掂的說。但實話實說，至少當年，該女對股票嘅認識真係低過呢度大多數版友。英文講就幾流利，但有次老細不在我幫佢睇報告，仆街，寫撚到好似德文咁。但掉轉頭，我唔會話佢符碌或靠訓（梗係唔會啦），人地有其他能力你又唔知啫。冇咁多符碌嘅（靠訓就有啲嘅）
