一，尋晚去咗個 Brainstorming 飯聚，規矩係 Chatham House Rule；即係可以公開講當中提出嘅概念，但講還講唔好講係邊個講。其實我哋呢班朋友，相識冇十年都有八載，所以大家都好清楚規矩，亦都有信任。
二，Brainstorming 一定有目的；尋晚嘅目的係「化解中港矛盾」。嘩，好大個題目。召集人（即大台）更加準備咗一張清單，方便大家去有個起點去討論。
三，清單係一條都幾長嘅 laundry list ，冇乜次序或結構；不過，簡單二元咁分立，可以歸納成「與資源分配相關」以及「與資源分配無關」。
四，「與資源分配相關」議題例子：新移民獲編配公屋、綜援金；又或者政策資源分配，例如「普教中」撥款、本地大學生學位、單非在港產子之類。
五，「與資源分配無關」議題例子：智能燈柱、海水化淡等。
六，從呢個清單可以見到呢個大台認為，中港矛盾源於一系列資源及政策傾斜，撥亂反正嘅話，港人條氣可能會順返少少。
七，「究竟我哋係想徹底咁處理中港矛盾，定係幫市民消消暑先？兩樣好唔同喎。」有人問（Chatham House Rule：就算係我問，都會用「有人問」。下同。不過，「有人問」又唔代表一定係我問。）
八，「假如係單純出啖氣，我感覺係呢張清單錯重點。」講呢句話嘅人再諗諗：「要市民消消氣？不如提倡『所有警太都有打 RFID Chips』；聽日一定會有人問，我哋個會點申請加入。」
九，「你依家係消除矛盾定增加矛盾呀？」話說呢個小組，都係一班有幽默感嘅斯文人，所以大家都知道見香港氣氛咁緊張，講個笑咁解嗟。
十，「講真，智能燈柱我覺得唔需要全拆，但收集得到嘅所有資料都一定要完全公開。即係假如收集嘅係氣溫、濕度、空氣質素、交通狀況之類，應該 open data 畀個市場去諗應用。不過，如果政府收集到嘅資訊係咩私隱，唔可以公開，政府 at the very first place 根本唔應該收集。所以，一係就所有 data 都公開，唔可以公開嘅就唔可以收集。」
十一，「咁不如唔好起，行政上會比較方便。」大家結論係：「多一事不如少一事。」以政府慣常嘅文化作風，呢項政策壽終正寢嘅機會最大。
十二，跟住，大家都討論咗好多其他政策；但結論係，關乎資源分配，尤其是香港人視為 entitlement 嘅權利，似乎比較易執行，亦似乎會有更多香港人覺得關乎自己切身利益。
十三，亦有人提出港交所壟斷（令香港股市變成大陸海外 ATM）、要求政府將來往銀行帳戶資料公開（例如有幾多個 current account、邊幾間銀行、結餘同交易額幾多，銀行提供利率又係幾多之類）。
十四，「我明白大家都想有切實有效亦可行嘅政策改變去舒緩香港目前嘅緊張局面，不過我覺得好似仍然未中重點。」
十五，重點係乜？簡單講，自從 1997 年主權移交，香港一直存在一個非常關鍵但又一直含糊不清嘅問題：何謂「高度自治」？即係咁，曾經我哋以為，高度自治解「除國防外交」，其實一切由特區政府去做決定。不過事實係，好多政策香港只有配合中央，特區政府冇任何 option。
十六，「國家對你咁好，你要咩 option？」我知道，有好多 120% 支持中央嘅人，一定會咁講。呢個係原則問題；你話係優待，都唔代表香港人一定要受。「點解唔受？」所謂嘅高度自治，就係唔接受都唔需要畀理由，明唔明？當然，唔需要唔代表唔會，但係唔需要係一個前提。如果你睇得明以上 subtle 嘅分別，你就知道中港矛盾真正嘅核心，就係呢個文化上嘅差異。
十七，每次北京將本來應該香港自行決定嘅事，提升到「國家主權」層面去講，即係以「主權」凌駕「治權」，香港人就覺得自己嘅自由同「原有生活模式」正在一步一步消亡。換句話說，要將香港穩定落嚟，北京一定要好具體清晰咁將「主權」範疇裡面嘅政策，同「治權」下特區政府自行決定嘅政策，清清楚楚列明。呢個討論嘅延伸就係：基本法肯定有唔清晰唔全面嘅地方，唔處理，最終問題唔可能解決。
十八，睇返過去十幾年，每次「主權」凌駕「治權」，香港就會有抗爭；廿三條、反國教、八三一到送中都如是，就係特區政府明明有治權去處理，但選擇去進行國家級任務。至於一帶一路、大灣區，亦一樣係。
十九，香港人嘅理性預期係特區政府從香港人最大利益出發，而唔係犧牲香港人利益去完成國家嘅任務，呢個就係「高度自治」嘅核心精神。你話香港人自私？算，吧，啦。作為自由主義者，我哋嘅信念係「防人之心不可無，害人之心不可有。」明冇？
二十，即係話，高度自治代表特區政府有權去否決中央提出但屬於香港「治權」範圍嘅事。家陣嘅現實係，只要係由中央提出，特區一定要死跟，而且一定要做到，而且要高調咁做，好似要咁先至可以彰顯「主權」。
廿一，你話北京係咪有「自卑情意結」吖？之前都講，成日要提住「香港係中國㗎」「香港嘅事係中國內政」，知啦～都話知咯。點解你搞唔搞得掂先？你當路人甲乙丙行過見你搞唔掂，好聲提醒句：「好心你就咪夾硬來啦。」你就又「主權」凌駕一切。唉！
廿二，另外，關於殖民地同宗主國嘅關係，尋晚有個好有趣嘅討論。殖民地同宗主國，最理想就梗係殖民地嘅人好想成為宗主國嘅一部份，但宗主國就唔係好想。假如香港同中國就有如波多黎各同美國，咁就一天光晒。By the way，除非打仗，美國唔會無端端同人講：「波多黎各係美國不可或分嘅領土」。
廿三，無錯，「主權」呢個概念，除左好表面嘅國旗國歌又或者行禮如儀，就只有打仗嘅時候你企邊一邊先至會見到。中國唔少人成日都覺得，自己要同人打一鑊，會有人佔領自己嘅土地，所以成日「主權」「主權」「主權」。當然，有少少智慧嘅人都睇得出，唔少極權政府將自己嘅存在同手段合理化，就係製造敵我矛盾，包括階級敵人同民族敵人。
廿四，所以，化解中港矛盾，正如數學入面，好多問題表面上簡單，但係答案可能幾個世紀都冇人諗到。不過，數學問題解唔到，好小事；政治死局拆唔到，結果就係一個秩序嘅瓦解（但唔代表新嘅秩序可以處理之前嘅矛盾）。
廿五，當年戴卓爾夫人曾經有提出過同北京以「主權換治權」」。北京拒絕，但換來「港人治港」嘅承諾。但幾十年後，大家先明白北京嘅理解中：「主權即治權」。
廿六，北京所理解嘅高度自治，其實係「你哋自己負責返執行政策」；即係話香港係「有責無權」。
- 完 -
議題例子 在 社會議題 | Dcard 的必吃
與社會議題有關的話題. ... 一下，（Super Y超級歪），如果你受夠了，各種推翻不平等的例子或是證明平權存在必要性的例子，可以從09：40開始看，內有洋蔥，重點總結：. ... <看更多>