【三中商被控合謀違反市場競爭】
一，今日咩樹，咁多新聞？話說，競委會向「三間公司、一名個別人士」展開法律程序。
二，該「一名個別人士」，叫 #許超明，係「香港出版總會」副會長；呢個會呢，會長就係 #陳萬雄 ，即係人稱「三中商」嘅聯合出版嘅副董事長，全國政協，紅底。 許超明好多年前都係選委，當然，都係紅底。
三，競委會呢次真係「省」招牌之作喇；教科書乃係養活香港紅色出版界嘅水源，一棍打落去，你都咪話唔勇武。
四，競委會嘅講法係：「三間公司向中小學學生售教科書期間，涉嫌合謀定價、瓜分市場或圍標，許超明被指為牽涉合謀安排的人士。」
五，點理解好呢？係競委會想要表現？係呢幾條友唔識做？定係⋯⋯我冇內幕消息，所以只可以用表面、公開資訊推敲。
六，首先，都應該係表面證據成立。題外話，近來有非三中商書店艱苦經營，聽聞想轉行做教科書出版。
七，咁，其實讀競爭法，都一定讀過書嘅「建議零售價」安排；經濟學嘅理據係，書店租咁多地方賣書，燈油火蠟租金都係錢，如果出版社唔定價，就一拍兩散囉。
八，你可能會話：「咩博客來、Book Depository、Amazon 都會賣書去香港喎⋯⋯」所以咪做香港教科書最好搵囉。其實，全世界賣到最唔合理價錢嘅，都係教科書；好多時，教授會用返自己本書教，吹咩？
九，講遠咗。其實我想講嘅係，當一個市場出現一層又一層嘅壟斷，價格就可以超唔合理；教科書，只係其中之一。
十，教科書呢行有幾難入？先唔講學校揀書嘅黑箱作業，原來要得到官方 blessing，一樣唔易。所以，教科書呢行，真係識人緊要過識字。
十一，亦因為呢個緣故，呢行都可以好政治；政治，就係一個靠識人，將公權力變私利嘅過程。
十二，你問我，呢個行業何止要競委會去查，老廉去查都大把嘢睇。當然，呢個可能性係低嘅。
十三，所以，我嘅結論係，通常壟斷同剝削，係一層一層咁出現，唔會單一咁發生；你想打破壟斷？首先，你要打破成個制度。
十四，點都好，競委會呢下都好勇。祝佢哋好運啦。
＝＝＝＝＝＝＝＝＝＝＝＝＝＝＝
- 1st Draft by Simon 免費訂閱 -
http://bit.ly/1stDraftSimon
＝＝＝＝＝＝＝＝＝＝＝＝＝＝＝
＝＝＝＝＝＝＝＝＝＝＝＝＝＝＝
- 2nd Opinion 收費專欄 -
http://bit.ly/2ndOpSimon
＝＝＝＝＝＝＝＝＝＝＝＝＝＝＝
＝＝＝＝＝＝＝＝＝＝＝＝＝＝＝
- Telegram Channel -
http://bit.ly/ClipboardSimon
＝＝＝＝＝＝＝＝＝＝＝＝＝＝＝
