【玻利維亞持香港特區護照落地簽堅定流？】
呢篇文章以香港護照為主，係小弟2018年6月經驗，之後可能有所更改，而BNO同台灣護照不在此限。
由今年四月開始，持香港特區護照入玻利維亞可以做落地簽，唔駛再喺Santiago或Cusco搞簽證，但可能成件事太新，你上網Search「香港護照玻利維亞落地簽」，都係search到同一堆廢話、各大網媒嘅新聞稿，但係咪真係得，似乎人人都各執一辭。
小弟成功入到，但又係咪咁簡單呢？
我唔知大家點睇「落地簽」呢個Term，我理解就係好似以前台灣咁，去到機場填Form、俾錢，完，但玻利維亞要搞咁多嘢，完全唔係「落地簽」囉。
首先睇下各大網媒寫乜：
1. 預先填好簽證申請表格並簽署。
2. 有效期不少於6個月的護照。
3. 如果將會進入黃熱病高危地區，需要有效的預防黃熱病疫苗接種證明。
4. 旅程路線單或往返機票及住宿訂單；如果入住當地民居，要有合法家庭住址的玻利维亞人的邀請函，邀請函須在玻國移民總局登記並公證。
5. 合法的個人經濟能力證明文件。
6. 近期個人證件照，4 x 4 厘米，白底。
7. 簽證費繳費單，費用30美元。
對於第一至六點，小弟可以做到，但因為玻利維亞個簽證唔可以太早搞，只可以15日內，但15日前我根本冇銀行，網上銀行有人又話佢唔得，所以果30蚊我交唔到，而我亦覺得，「落地簽」應該可以「落地」俾，所以決定去到先算。
至於個表格係要15日前填，如果過咗要重新填，但小弟出發前15日內根本冇printer，好在後尾喺Santiago機場（離境大堂中間information center）有免費printing，所以印到。
好喇，萬事俱備，我嚟到接壤智利同玻利維亞邊境城市San Pedro，都係對果30蚊美金有疑惑，就去information center問問，information center答我係，曾經有香港人俾完30蚊美金後，去到邊境都係要加錢，佢就此打去玻利維亞大使館問，對方態度惡劣cut佢線，所以都唔知係咪堅30蚊。
我決定唔理，直接去邊境。
我係跟三日兩夜團去（堅正，容後再講），去到邊境我心諗點都有司機幫我掛，點知個司機唔識英文，而入去個邊境關卡每次只限兩個人，好在有個同團巴西人幫我。
其他人一嘢就過得，偏偏偉大嘅特區護照就要一大堆嘢，我預備咗果份網上表啦、相啦、Passport副本（呢樣一定要）啦，連埋護照俾佢，條友左睇右睇，係咁篤佢手臂個玻利維亞印章，我當然唔知佢講乜，個巴西人都唔明佢講乜，佢係咁篤係咁篤，仲鬧個巴西人唔知佢講乜點做翻譯（巴西講葡文唔係西班牙文），搞完一大輪先知係要黃熱針證明！
嘩頂，好在我有打！
我俾佢睇，佢都唔得，話一定要有影印本，而佢邊境係冇得影印，好在我有影印，即時俾一份佢。
然後，佢又要我拎行程所有住宿交通證明，我話，果份表咪填曬囉，佢都係唔得，要我白紙黑字一份俾佢。一來我根本冇Planning，二來手寫又唔得，咁你想點？
佢竟然話，冇行程表唔入得境。
我屌你呀？
巴西人好努力咁幫我翻譯，話行程表都網上入紙俾曬你（其實上網我都係亂寫），一係我手寫有乜問題？條友仲係咁搖頭。最後出動到佢大佬，叫咗我埋一邊，同我講US$110。
我知道係海鮮價，但爬文人哋最高都係US$90，你掠我US$110？然後我話乜唔係US$30咩？香港入境處Official係US$30，條友竟話，從來冇人俾過US$30。
ok, fuck that，俾就俾。我俾咗兩張US$50，一張US$10，條友竟然話張10蚊有摺痕唔收，都好在我身上仲有多張50蚊新錢，佢先至收，然後，竟然有得找。
就此，佢露出一個不懷好意笑容，俾我入境。我肯定果110蚊佢有自己袋。
你可能話我柒，唔俾定30蚊所以咁煩，但我相信隨時俾完30蚊你到邊境都係要加。可能個個邊境入境都唔同，但經驗話我知，你有乜都唔該好影印定一份，有咩資料打定印出嚟，因為唔接受手寫。同埋，錢可以解決嘅問題就唔係問題，你唔好咁老定成身得30蚊美金，唔係真係一身蟻。
總結，落地簽係咪堅？係堅嘅，但係咪咁簡單，絕對唔係囉。同埋，排過境時如果你唔識西班牙文，最好搵個識嘅人幫你翻譯，唔係雞同鴨講加上班關員態度極奇惡劣，你想如網媒新聞稿所講40分鐘入到境，真係發夢都冇咁早。
Anyway，我。終。於。嚟。到。天。空。之。鏡。喇！
🎉新書銷量持續向上、口碑滿載！買嚟睇就明 🇭🇰 | goo.gl/J9QdBR
🎉台灣書局亦已上架，可去文中連結購買 🇹🇼 | goo.gl/xzCymP
【IG請follow】www.instagram.com/travelerwithmovie
#有故事的旅人 #南美 #玻利維亞 #天空之鏡 #uyuni #玻利維亞落地簽
