C朗重返曼聯，對我呢個利迷都有好深感受。
十八年前，一班朋友仲打緊PS2，winning入面嘅球員名仲要自己落手落腳改，施丹未收山，我嘅世界仲係只有打機同足球。一次聚會，成班兄弟望住初出茅盧嘅C朗呢條濕水毛巾，俊俏得嚟又有少少鄉味，好波之餘又偶有波車出現，睇睇吓我都忍唔住講咗句：
「仆街丫，好似畀佢哋買到件好嘢。」
「18歲，葡萄牙仔，聽講堅尼一踢完士砵亭場友賽就叫費Sir買佢。」
「利都有冼拿馬邦高尼，勁。」我機械底咁回應，做一個敵對球迷就係要咁，你有個橙我一定要有個桔，輸人唔好輸陣。
後來C朗點同朗尼合壁，喺曼聯過完一關又一關，轉會皇馬，去到生涯頂尖，然後每個人以為佢會慢慢退下時再出走意甲，帶住祖雲達斯一直安全航行，雖然年紀唔細，但從來都冇退步嘅感覺。
佢嘅足球生涯同目標一如以往，講好咗嘅就一走到底，但當年我哋一齊睇波一齊玩嘅波友，老早就已經四散。
有人遠走他方，有人為口奔馳，又有人視而不見，每一個人都逐日逐日咁磨蝕，曾經諗過嘅「永遠」已經唔知去哂邊，你覺得生活「就係咁架啦」，我都認為你講得好好。
不過今日C朗轉會，重返曼聯，其實大家都知道，36歲嘅佢可以帶畀曼聯嘅事唔會太多，跟住嘅後續未必係一個完美嘅童話故事，不過C朗就係想話畀我哋知
「世界唔一定係咁」。
老咗嘅球員唔一定要以不變應萬變，唔一定要安守既有嘅安全範圍，正因為球場本來就係一個戰場，只要你望到有興趣嘅目標，你就要即時動身，將目標完成。
就算生活同世界已經不如18年前，但你仲係咪有你自己想做但未做嘅目標？
見一個朋友又或者係問一句 你好嗎？
18歲前陪你一齊睇C朗首次幫曼聯落場嗰幾位波友，宜家仲喺唔喺你身邊？
我有兩位好好嘅兄弟，咁多年嚟都同我鬥生鬥死，佢哋都係陪住我成長嘅曼迷。前兩年利記拎英超，我第一個反應就係想佢哋出現我面前，等我可以耀武揚威一下。
今次C朗回家，唔知點解我都好想出現喺佢哋面前，好好咁感受一下佢哋呢份感動，佢哋兩個入面，有一個八年前已經去咗澳洲，疫情之下，只可以用Whatsapp插科打諢咁恭喜吓佢；另一個四年前已經上咗天堂，下次去探佢時，等我私人整件紙製曼聯C朗波衫畀佢威吓。
你哋有冇人想搵吓？去啦，唔好等嘞。
