《元朗性價比高有辣有唔辣的川菜小店。回味館》
最近吃貨生日，友人就話帶我去元朗吃一間不錯的川菜小店👍聽講最近老闆轉左手，佢話食過不錯就推薦和我去食😝我最愛支持小店，如果係高質嘅小店就一定支持！
呢間叫回味館嘅小店位置都算好方便，就響朗屏西鐵站一出嘅天橋底，一啲都唔難搵。店面細細環境就一般，大概擺到六七張枱，我哋嚟到嘅時候就嚟八點場內都有啲爆，等左一陣就入得。
睇佢嘅餐牌都幾多選擇，價錢都唔算貴，有$40幾蚊套餐至$70-80嘅小菜都有，佢主打嘅係川菜同埋一啲酸辣嘅菜式，不過都有唔少係冇辣嘅菜式，一半一半啦，有辣有唔辣任君選擇。我唔算好食得辣，但係我有好想試佢哋嘅招牌菜，辣子雞丁同埋水煮系列，點知老闆娘就好親切咁話可以小辣，可因應唔同人嘅口味，抵讚！👍
本身我想點酸菜魚，因為我見到人哋果碟好似幾靚幾正咁樣，點知原來係最後一份啦😔好搶手😟，下次我來一定要點佢嘅酸菜魚！😆於是我哋就點左一份辣子雞丁飯，水煮牛肉，同埋蠔仔湯飯。
佢呢度嘅辣子雞丁飯收嘅價錢係快餐價，但係一啲都唔頹，包飯包湯好似小菜套餐咁，先至賣$48，邊度搵😱？！個例湯我飲落真係冇味精㗎，正！😍講返個辣子雞丁，我之前睇過一啲電視節目介紹正宗嘅辣子雞丁真係勁多辣椒🌶️然之後你要喺辣椒堆入面搵返d雞丁出來，佢呢度就係咁樣，我同朋友響辣椒入面搵雞丁都幾好玩！雞丁唔算好多，每一粒形狀size都相若都考師傅切丁粒嘅功力，一口一粒啱啱好。不過每一粒都好入味好惹味，佢仲加咗好多配料好似花生青椒芫荽等一齊去炒零舍香😋係咪睇起上嚟好辣搞到我好似好食得辣呢?😂係好香辣但係又唔係好辣喎，我接受到啵好開胃😋
跟住嘅水煮牛肉（$80）同更令我驚喜，呢一份就係小菜，同樣會配一個飯同埋例湯，佢想嘅時候紅卜卜勁多辣椒，我又係以為我食唔到，不過我已經叫咗老闆娘幫我改小辣，食落真係冇咁辣！佢嘅牛肉都算幾多片，係滑牛嗰隻牛肉片，幾嫩滑，浸響一大鍋水煮中索曬啲辣汁，又麻又辣真係好正！唔使返大陸呢度都食都幾正宗地道嘅川味，鍾意食辣嘅人應該會喜歡👍👍👍
食咗兩個辣野我見佢仲有其他唔辣嘅選擇，見樓面嗰個姐姐幾親切幾好傾，就問佢有乜嘢推介，佢就推介我哋食蠔仔肉碎湯飯（$45）佢嘅豪仔肉碎湯飯同出面嘅湯飯有啲唔同，佢會將個湯同埋飯另上，我鍾意呢個安排啊😊佢兜湯份量真係大大碗超足料，同埋佢啲蠔仔嘅份量都幾多又夠肥，重點係我發現佢響湯入面放咗大量我至愛嘅芫荽！😂👍😍成個湯變到好甜仲好下火！食完兩個辣野之後食呢個湯飯真係及時雨啊！我真係飲到一滴都不留！
性價比來講呢間小店真係幾高，重點係食物嘅質素都高，我哋隨便點三個小菜都唔伏嘅話，我都幾有信心下次再返嚟幫襯！我會推薦俾鍾意食辣的朋友👍😋不過其實唔鍾意食辣嘅都可以一試其他菜式，加上佢呢度嘅樓面姐姐同埋老闆娘都幾親切，之後我會經過都來支持小店☺️
——————————————————
店名：回味館
環境🏝：6/10
服務💁🏼♀️：8/10
價錢💰：8.5/10
食物質素🍝：8.6/10
整體🙆🏻♂️：8.2/10
地址:
元朗俊賢坊18號權益大樓11號地下
#吃貨玩樂
#回味館
