#莆田 (銅鑼灣)
銅鑼灣波斯富街99號利舞臺廣場7樓A舖
-----
呢間黎自星加坡嘅過江龍🐲進駐香港已經有好幾年 主打香港唔多地方食得到嘅福建菜 B仔一家人已經光顧過好幾次 最近上網見到佢推出以哆頭蟶為主題嘅限定餐牌 B仔即刻迫不及待地拉朋友仔陪我去試下🤤呢度嘅蟶子一共有八種做法 （有薑蔥炒蟶子 鐵板鹽焗蟶子 花雕蒸蟶子 蒜蓉蒸蟶子 冰爽酒糟蟶子 蟶子炒蛋 紅菇鮮蟶湯）單叫1款要100蚊以上 而2款就抵D $198就可以食到～B仔今次就食咗兩種~😋
-
叄芭爆蟶肉：韭菜花同紅椒絲條條新鮮又爽口 蟶子飽滿大隻 而且隻隻都剝晒殼 唔使自己剝 非常方便 叄芭醬係一種星馬菜常用嘅獨特辣椒醬 香港人愛食嘅喇沙入面都有呢種醬料 加入叄芭醬爆炒過嘅蟶肉非常有鑊氣 食落口辣得黎不帶勁 卻帶一絲鮮甜 唔食得辣嘅朋友都完全可以駕馭到😊
-
蒜蓉蒸蟶子：相比起上面嘅叄芭爆蟶肉 蒜蓉蒸出黎嘅蟶子 味道少左一分惹味 卻多左幾分清甜 鮮味更為突出 質感一樣係飽滿鮮嫩 令人不自覺咁食完一隻又一隻 整體黎講兩種蟶子嘅烹調方法各有春秋 叄芭爆適合佐酒 蒜蓉蒸就適合配飯 兩種都值得一試
-
土筍凍（$42)：係一種令人聞風喪膽嘅福建特色小食 所謂嘅土筍即係星蟲 無錯 佢係蟲 唔係筍 食素嘅朋友千祈唔好食錯 雖然聽落好似好恐怖 但係其實食落味道好正常 啫喱嘅凍糕中間有一條一條土筍 加入佢附帶嘅秘製醬汁食 質感滑溜 味道酸酸甜甜 又帶點鹹鮮味 有啲似食緊上海菜嘅鎮江肴肉 幾特別 敢食的話 可以一試 香港唔多地方食到😂
-
興化炒米粉（$82)：呢碟炒米粉係B仔每次黎都幾乎必點嘅菜式 興化米粉比我地平時食嘅廣東米粉或者台灣新竹米粉都更要幼細一D 呢種米粉要煮得好食並唔容易 由於米粉幼到好似絲咁 一旦火候控制得唔好 米粉就會癡埋一舊 （B仔曾經買黎炒過）而莆田嘅興化炒米粉就冇呢個問題 佢地嘅炒米粉絲絲分明 材料豐富 有芥菜 蝦仁 頭水紫菜 芹菜 花生 蝦米 半肥瘦肉 冬菇等等 炒出嚟好食到不得了 同我地普通係街上面食到嘅炒米粉完全係兩個層次 店員仲俾咗秘製嘅辣醬我哋加入米粉到食 雖然辣椒醬辣得幾爽幾好味 但個人覺得呢碟炒米粉咩都唔需要加 已經好完美😌
-
莆田扁肉湯 （$22) 扁肉湯湯底比較清 帶有淡淡鹹香味 飲落幾舒服 湯入面有頭水紫菜 所謂的頭水紫菜 即係第一次長成就采割嘅紫菜 入口細嫩 營養豐富 另一主角 扁肉嘅分量就非常多 外皮QQ彈彈 食落有D似像魚皮餃嘅皮 但係又比魚皮餃嘅皮更加煙韌一D 皮入面包住滿滿嘅肉 細細粒 一啖一粒 好快就被B仔一舉殲滅😝
-----
👶🏻B仔整體評價：8.5/10個👍🏻
👶🏻B仔抵食程度：7.5/10個👍🏻
👶🏻B仔環境評分：8.5/10個👍🏻（ 裝修精緻 啲位置都好好坐）
👶🏻B仔味道評分：8.5/10個👍🏻
👶🏻B仔回頭機會：8.5/10個👍🏻
-----
#swallowhongkong
跟住我一齊吞食香港啦！🤤
#swallowcwb @ 莆田香港
莆田 餐牌 在 莆田享譽新加坡的中餐廳 的必吃
一起享用美食就對了！ 趕快帶媽媽來 莆田Putien ，給她一個久違的放閃大擁抱 用擁抱傳遞對媽媽的感謝和愛 還有機會再來一場星級饗宴之約！ #扌由餐券方式請見留言區 王品 ... ... <看更多>