【你問我答】 今日回答 まつやま松山 以下呢條問題：
“樓主，我想知 #列斯聯 既財政狀況有無能力比佢地喺英超立足？見佢哋完全無重點收購，只係繼續簽幼齒同借人”
要講 #英冠 球會財務，首先一定要提吓降落傘補貼(parachute payments). 基於英超同英冠播映權金額嘅巨大差異，英超同EFL協議向英超降班球隊發放最多三季補貼，按照英超球會平均分配部份，降班後三季順序派發55%, 45% 與及20% (兩個例外， 分別係如果球會降班前之前只喺英超停留一季，就只會發放兩季補貼； 同埋球隊三季内升返上英超的話，就無得再收)。以2018/19球季為例，17/18英超榜尾三隊(史雲斯，史篤城同西布朗)各收£42.6m, 而16/17嘅尾三(新特蘭，米杜士堡同侯城)就收£34.9m.
大家都知道，列斯對上一次踢英超已經係十五年前嘅事，當然就唔會有parachute payments收。所有無parachute payments收嘅英冠球會，2018/19球季每隊都會從英超分到大約七百萬英鎊。另外，每場獲得英國SkyTV選作直播嘅賽事，主隊可以收大約十萬英鎊，而客隊就收一萬英鎊，但球會就唔會因為排名較高而獲的更多獎金。
我從列斯2018/19年度份財務報告揀咗幾版同大家分享，大家可以見到列斯全年收入加埋都無£50m，新降班三隊齋計補貼都已經差唔幾。不過其實列斯畢竟球場容量與及球迷人數都比好多英冠球會高，過去咁多年撇除有補貼收嘅球會，列斯嘅收入都係餘下英冠球會中最高嘅一隊。至於大家見到18/19年度虧損£21.4m, 呢個數喺英冠來講都不見得十分特別。
不過睇一間球會財力，唔只單睇球會本身盈虧。早兩年狼隊喺英冠一樣無補貼收，但背後有支水喉就唔同。列斯呢十五年可謂經歷過何止幾許風雨，到2017年，由一位意大利人Andrea Radrizzani牽頭，專注體育，媒體同娛樂事業嘅投資集團Aser Ventures (http://aser.com/) 收購。從列斯嘅財務報告可以睇到，截至30/6/2019， Aser Ventures向球會提供咗約£25.6m有息貸款，投資額同狼隊（*）相比其實唔算多，估計集團都係期望列斯慢慢做到自負盈虧。
咁列斯係咪一定無錢買人，只能繼續簽幼齒同借人呢？又未必。畢竟下季上到英超，至少都穩袋一億英鎊播映權分成，而唔少英超球會，都好興將固定金額部份抵押俾銀行或其他金融機構換取貸款，變相預支筆理應球季内分期收取嘅分成，嚟用作季前買人用途。當然，列斯應該唔會好似狼隊咁使得，但又未至於完全無能力增兵。
