<<嬲左>>記錄一下,因為已經唔嬲喇,雖然外人覺得好少事,但係對我黎講都幾大件事...
我性格好求其好無所謂,好少咁執著,但係我真係好執著呢單野,可能我真係好care,好care呢個人care唔care我,其實佢好幸運,佢自己唔知........我諗佢係我嘅死穴,如果有一天我唔再care,無咗呢個死穴,我諗我會變得所向無敵.....
就係10月14日我地拍拖24周年嗰日,我忙到甩皮,安排好多野,去左CWB YLHK 開workshop,然後搭車返屋企,係街拎住40磅重嘅手袋(入面有電腦)再拖住一個40磅重嘅喼,我同Assistant 講,以前我大陸廠有個跟單,返工第二日,跟我去買布,佢睇住我將幾條布掉上7人車,再不停催佢地行快D,佢第二日辭工🤣
完左workshop 返到屋企食完飯,已經差唔多8點,我坐係Sofa,覺得硬係爭D嘢......無花嘅!!!!!!! 諗起即刻好嬲!!! 即刻message 問佢!其實幾日前係Phuket 提左佢,佢問我14號送咩比佢,我話送花,佢話啋, 花係等死左先送啦! OK, 好明顯已經提左你,但係你無做.....
然後條友發現奶野,叫佢PA走落花墟再親自送去我屋企,講真,提左你,呢件事上網十分鐘內攪掂,or 你真係無時間,同PA講 10月14訂紮花送去我屋企,十秒內講完你都無做,對比起你揸架車去老遠嘅車房等三粒鐘換偈油,我算是甚麼?
點解咁嬲?首先我本身個人已經無乜特別要求,禮物我次次諗唔到要D咩,頂盡諗到要電器,無咩物件特別想要,我亦唔需要fine dining,我鐘意大排檔陳漢記茶餐聽,最鐘意係唔郁留係屋企食!
紮花係我唯一唔可以無左嘅sweet spot......幾百蚊, 又唔係比唔起,係咪,之前我仲會走落花墟買,批發個D,一紮幾十蚊有廿支都OK架! 我唔係嗰D逢到節日要鑿男朋友or 老公一筆嗰D港女,
但係,點解D花咁重要?因為紮花對於我黎講係,Celebration, respect, being loved!
+嬲1,佢因為自己唔記得攪著個PA, 補返紮花已經無意義
+嬲2,佢依然覺得我嬲好無謂,祇係紮花
+嬲3,佢作左篇文,篇文好多人覺得好好笑,佢話人地覺得好sweet, 但係我唔覺
+嬲4,佢話已經同左我去Phuket,但係我想講,我係話去Japan 架,佢為左個大女想玩ZipLine 同 go Cart, 細女想游水揀左Phuket, 我唔鐘意zipline,無玩go cart,好憎游水(我淨係換泳衣落水影兩張相only)去Phuket 我祇係搭單食mango sticky rice 去 cooking class........ 所以佢嗰篇野話同我去Phuket 慶祝左係唔成立嘅!
最後嬲左兩日,其實都好嘅,因為嬲佢變得無咁掛住佢,然後我堅持要佢明白係佢唔care我感受,要佢明白呢紮花對我有幾重要,重點唔係紮花度,重點係, << 佢 有 無 記 得 我 >> ,有無記得個老婆好鐘意花,有無記得要多謝我當年應承左同佢一齊,有無記得要慶祝因為個日,我地嘅生命變得唔一樣.
最後,我舉左個好貼切嘅例子問佢 「我以後可以唔收花,你以後都唔好上大山,得唔得?」 佢唔敢答,然後, 我再話「多謝你激到我咁嬲, 聽日我會買兩包XL size 嘅薯片約埋你兩個女落你架車食薯片」 我諗佢個刻驚到賴屎, 之後就同我say sorry.....
OK,我無再嬲,但係諗起唔啋你個兩日,你send whats apps D 花嚟,我無願諒你,諗起你平時都係嬉皮笑臉地氹我,我成日都因為忍唔住笑好快就唔記得左嬲,今次無得用呢招,反而比機會我要你諗下我嘅感受! 唔該你mark底日歷,一輩子 ER D 花比我!!!
我好相信做人要有時有節有慶祝,生命先唔會枉過,呢D嘅時節會為繁忙嘅生活帶來調劑,尤其感到被愛嘅時候,令到我地更有勇氣面對生活嘅困難,繼續行我地嘅人生路! 珍惜一齊左24年仲係一齊,好難得,真係要慶祝,唔好話24年,有好多人4年都玩完啦!
你唔好彩揀左個老婆好執著於呢樣野,但係亦因為咁,你好好彩有個充滿愛平時入得廚房出得廳堂上得大台落得農場嘅老婆,所以幾個月一次駛幾嚿水,唔好咁度啦扑乖!
#花唔一定要貴
#有本事上山摘唔洗錢
#我寫完要每年Tag你
#唔記得送花遺臭萬年
#為乜呢
