《無二之初》深夜無人小巴（四）
雖然已經充滿誠意咁去尋求協助，但無二最後都係唔願意幫我。離開佢嘅辦公室後，我憑住「直覺」上咗一架連目的地都唔清楚嘅小巴。本來純粹係一個藥石亂投嘅做法，但結果……竟然俾我遇咗一個詭異嘅狀況……
等我仲以為自己睇慣恐怖小說同電影，對恐怖事會有一定抗性。但原來，面對「真正嘅恐怖」嘅時候，嗰份恐懼同壓迫感係可以咁巨大……
呢刻，嗰個三人家庭已經坐咗喺我前排，而喺正我前面嘅應該就係「父親」。雖然好驚……驚到想放聲尖叫大喊，但僅餘嘅理性制止咗我咁做。
＝＝＝＝＝＝＝＝＝＝＝＝＝
第一集：http://bit.ly/2VWhOOB
第二集：http://bit.ly/2FCBbaG
第三集：http://bit.ly/2W3yPXa
＝＝＝＝＝＝＝＝＝＝＝＝＝
而且，經歷完上一秒鐘嘅教訓，我好似明白到一件事──只要目光從佢哋身上移開，佢哋就會「靜悄悄」咁再坐近……而事實上，已經冇得再近了，天知道之後會發生咩事？
所以，我忍住內心嘅恐懼，死盯住前座「父親」嘅背影……連眼都唔敢眨。
──哈，反應又幾快喎──
廣播再次響起剛才叫我「留意前面」嘅男聲。我認得呢下笑聲，到底點解……
「媽，點解姐姐個樣咁驚嘅？」小男孩突然開聲打斷咗我嘅思考。
佢明明係背對住我仲要坐喺另一邊窗口位，冇可能知道我而家嘅表情先係……
「殊。仔，叫咗你唔好成日亂咁周圍望。」母親嚴厲咁講。
「但係……」
「你聽住，嗰位姐姐啊，」母親雖然壓低聲線，但呢個距離我仲係可以聽得好清楚，「應該仲係未好接受到……」
「喔！」
「但慢慢佢就會習慣，就好似我哋咁……」
──但白湖村呢單嘢太陰謀論啦，根本就冇歷史證明。不如等我分享另一單吖，你哋應該有聽過尾東樓三屍命案？──
廣播又突然跳返去恐怖節目嗰邊。先講嘢嘅係一個女主持，然後到男主持回應：
──我有聽過，係咪老竇先殺咗個老婆同仔，再自殺嗰單？──
聽到呢度，我心更加寒了……感覺，呢個廣播並唔係巧合……
──我有位警察朋友話件事唔係咁簡單，據說案發嗰陣現場仲有第四個人──
再咁落去唔係辦法。當我猶豫緊應唔應該開口嗌「有落」，又或者叫司機關廣播嘅時候……
（如初，妳聽清楚啦。）
嗰把提醒我要「留意前面」嘅男聲再次響起，但今次並唔係喺廣播裡面發出，而係直接喺我耳邊響起……呢一瞬間，我終於恍然大悟，原來頭先叫我等下班車嘅人……根本就係佢！
無二……先生！？
（雖然望實人呢個做法好明智，但妳應該知道維持唔到好耐。妳要想脫險嘅話就只有一個做法。）
──然後，有次警察上去搜證嘅時候，見到有三個人拖住手企喺窗台外面，臉目模糊──
（妳而家慢慢舉起右手，搵下隔離太平門嘅手柄。記住視線唔好移開……同埋唔好再分心聽其他無謂嘢喇。）
我點解……要相信你講嘅嘢？
（妳大可以唔信，但之後會發生咩事我就控制唔到了。）
聽到呢度，我戰戰兢兢咁伸出顫抖嘅右手，掂到太平門後開始搜索門柄。既然係搵門柄，佢應該係想我打開門……但開門之後會發生咩事？唔通個三人家庭就會願意「離開」？
（NO，要離開嘅人係妳。）
「吓？」一聽完我愕然了。
而下一秒鐘，我亦都碰到門柄了。
（妳冇辦法叫停叫架小巴、亦都冇能力趕班「遊魂」走。妳唯一可以做嘅，就係喺佢哋察覺到妳係「異類」之前離開呢架小巴。而離開嘅方法……）
就係……跳出去？
（冇錯。時間無多喇，快啲起身，拉門柄然後推門跳出去！）
但小巴而家呢個車速，跳車嘅話根本就係九死一生！
（妳唔跳嘅話結果都係一樣。但只要妳願意跳……妳就可以離阿聰近一步。）
阿聰……一聽到呢個名，我總算鼓起勇氣企起身。但呢份勇氣，始終改變唔到跳車係「魯莽」呢個事實……
「爸爸、爸爸……姐姐佢起咗身呀！」小男孩再次開聲講。
「哎喲，老公，佢會唔會想做傻事㗎？」母親擔心咁問。
「唔怕，」父親回應：「我哋可以勸佢，等佢接受自己已經『死』咗嘅事實。」
「我冇死！」我終於忍唔住反駁，然後背對住太平門將門柄拉落嚟，「我仲……唔可以死住……」
就喺我講完嘅一刻，眼前嘅三人家庭同步咁企起身，然後緩緩轉身望住我──父親臉頰發黑，同白茫茫嘅雙眼形成對烈對比；母親即睜大雙眼，頸部就有條清楚嘅勒痕；最後係小男孩，佢雙眼就好似曾被活活插傷一樣，流出黑紅色嘅鮮血……三人都毫無活人嘅氣息。
我再唔敢睇落去了，轉身用力推開太平門，然後扶住門邊，望向車外──小巴車速之快，可以見到街燈不斷無止境咁出現、又無止境咁遠離、消失……
──雖然新聞係咁報道，但我始終相信父親係無辜，真正兇手係另有其人──
阿聰，係唔係我只要跳落去，就可以見到你？
「小姐……小心……」身後嘅父親開聲講。
就喺父親冰冷得可以穿透衣服直達皮膚嘅手掂到我右肩嘅一瞬間，我抱住最大嘅覺悟跳出車廂。其後，時間突然變得好慢好慢，我可以見到雙眼離地面越嚟越近，快要碰到之際……
阿聰，我愛你。
眼前一黑。
（待續）
第四集，其實呢個故事唔會好長，預計十集內係一定完到。不過呢個系列應該仲可以講到好多個故事，大家即管期待下吧～
為咗對抗 FB 嘅壓榨，睇完故事嘅朋友，不妨喺留言留句「留名派嬲」同幫手 SHARE 出去呀～有留言有分享就有速度 😂
我哋 100 SHARES 繼續，暫定星期三／四。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
