致命回傳
後衛回傳比龍門絕對無可厚非，但呢個回傳力度就真係好似害緊個龍門。可能個後衛諗，比啲野你做下，等你醒神啲。
好多時回傳會出現好多意外，好似呢球波制造唔少危險鏡頭。通常回傳嘅意外不下呢幾個原因。
1.) 傳球軟弱無力
佔70%都係呢類傳球，俗稱醫院波。因為龍門又唔可以用手接，又未必有足夠時間解圍。結果個Keeper睇住個前鋒拎埋個波，形成單刀狀態。
2.) 缺乏溝通
就算回傳，都通知下個Keeper。開聲也好，打個眼色都好，比佢知道你回波比佢。唔排除有時個龍門發緊夢。傳左個波都唔知。呢個係一個默契嘅表現，加上龍門與後衛溝通係非常緊要。
3.) 扭到死
有啲後衛以為自己美斯上身，不停係度扭呀扭，扭到個波死晒先傳比個龍門。等於將個炸彈踢比個龍門。呢個情況通常已經係對方喺自己後場壓迫緊。迫斷左或者龍門解唔到圍比人射入，又好順便將個責任推比個龍門。擺出一副關我咩事嘅姿態。其實點解唔早啲傳波呢？
4.) 醫院 No Look Pass
回傳嘅時候會好型咁望都唔望下個Keeper就傳球，經驗豐富嘅Keeper當然一早現定身等回傳解圍或者轉邊，咁唔係個個Keeper都咁有經驗架。總之向住個禁區傳左波以為自己任務完成，傳左比邊個都唔知。隨時做埋送禮勤，傳個波比黃雀在後嘅前鋒。個前鋒好似over lap 咁上左去拎埋個波。個龍門就咁就比你玩死左。
5.) 低劣傳球質素
筆者好怕後衛回傳個波彈彈下，因為夠時間控都未必夠時間解圍或者傳球。加上大腳抽出去解圍有機會撻Q，個波踢去邊，踢唔踢中都冇人知。除非個龍門好好腳法，如果唔係又係害死龍門。
回傳係唔反對，甚至龍門見到勢色唔對嘅情況下主動要求回傳，大腳解圍好，轉邊又好。最緊要嘅係溝通。龍門絕對可以開聲提示。要留意嘅係龍門要有一定腳下功夫，必要時救自己一命。
#致命回傳 #醫院波 #自殺式回傳 #害死龍門冇命賠 #溝通 #後衛與龍門要經常溝通 #睇清睇楚先好回傳 #腳下功夫唔可以差 #切勿死扭
