《喺香港地，老弱傷殘都會「嫌命長」》
同大家講一個悲劇......
我呀媽係一個專業c9，c9嘅networking係超乎你想像，唔使靠facebook，c9係靠儲印花換煲同打麻雀建立友誼，但佢哋呢份友誼絕對唔薄弱。(雖然我唔明換咁多煲來做咩，但我信c9 心目中唔同型號嘅煲，就好似唔同型號嘅高達一樣，外行人識條鐵咩)
10年前，我呀媽喺百佳識咗一個part time賣壽桃面嘅 c9 ，壽桃面c9有一個獨居婆婆鄰居，於是我媽就識咗呢個獨居呀婆，呀婆好早守寡，佢有一個仔，讀完中學就去咗加拿大，呢個仆街仔竟然由個刻開始，無返過來香港，亦再無理呢個呀婆。呢10年間，我呀媽，壽桃面c9 都嘗試摷呢個仆街仔出來，問佢點解唔返來，但個仆街仔話呢啲係佢家事，堅持唔返來，叫其他c9 唔好理。呀婆咁多年都透過社福機構捐款度日。
2015年10月，呀婆喺將軍澳一間百佳行緊街，有一個大陸女人手持行李，撞向呀婆，呀婆跌到，送院之後腳骨同盆骨斷裂，做完手術之後唔行得。呀婆手術後堅持出院，寧願住老人院，當時好多人都勸佢留院多一排，因為「老人家入老人院係死得特別快」
呀婆做完手術，一直都唔行得，大小二便都要人照顧，當時c9 們都輪流去探佢，個間老人院細到不得了，間房就係一張床加一個櫃，可能你會話佢都唔郁得，幾細都doesn’t matter，但我覺得，呢個空間真係衰過赤柱，亦解釋到點解入老人院會死快啲。
※※※※※※※※※※
大家仲記唔記得2015年5月，大埔劍橋護老院俾人影到，職員安排院友除哂衫喺天台等沖涼。呢幾日，我睇到日日夢遺嘅院長張健華涉嫌性侵智障女事件，初頭我以為又係個間仆街劍橋，原來今次係康橋。呢啲集團式院舍，改埋呢啲 「豪華」名，真係好諷刺。張健華有無性侵智障女？就憑佢呢個星期訪問嘅對答，佢真係「屎味甚濃」，身有屎個屎。但我今日想講嘅唔係張健華「屎味甚濃」，我想講下照顧老弱傷殘嘅責任.....
※※※※※※※※※※
政府有責任，但政府就係唔負呢個責任.....
政府無撥到應有嘅資源同土地做老弱傷殘院舍，亦無監管呢啲私人經營嘅院舍。政府嘅監管永遠都係出事之後，如果大家記得，上年劍橋係俾人巡查過96次，出過15封警告信，社署都無釘佢牌，係俾傳媒揭發咗，先唔俾佢續牌。而今次康橋八個月發生六宗院友死亡事件都無人理，係直至爆出性侵女院友事件先俾人釘牌。
政府唔負呢個責任，私人院舍更加唔會負.....
私人院舍經營者係當一門發大財嘅生意來做，佢哋唔係社福機構，要賺盡，加上呢行根本係嚴惡性行業，私人院舍於是用好低嘅價錢，請一班唔合資格嘅員工。佢哋唔做無人做，咁亦解釋到點解呢啲院舍服務咁差。
而香港嘅家屬，亦只可以用錢負上照顧家人嘅責任.....
你唔搵食，你點有錢俾私人院舍照顧你家人，而你搵食，你點目及住院舍有無照顧好你家人？
※※※※※※※※※※
大家都知院舍係(等)死路一條，但香港地亦只有呢條死路.....
香港地，老弱傷殘必然係一個悲劇。無論係我呀媽個呀婆朋友，上年劍橋院友，甚至今年康橋院友，都係俾社會一班繁忙嘅人遺棄。政府拎多啲錢出來？院舍賺少啲？家屬唔好搵食？無一方係做到架。
呢個死局，大家都見到，但大家都解決唔到.....
只要政府俾多啲資源，監管多啲就會無呢啲悲劇？香港地呢個地方，秒秒鐘幾百萬上落，政府邊得閒理啲「對經濟無貢獻嘅弱細社群」。政府根本無興趣解決呢啲悲劇，佢只係想大家唔好目睹呢啲悲劇。
咁可以點？作為一個香港人，我會希望我死得有技巧啲.....
香港地根本係一個只可以(即)死，唔可以「等死」嘅地方。你有病，要拖長來死，你就必定要入老人院舍，因為我捱足一世先買到層樓，如果我死返屋企死，我層樓就會變成凶宅，所以話香港人真係好撚 可憐。
PS. 我呀媽個呀婆朋友，喺今年1月過身，入老人院唔夠半年。我媽最後一次探呀婆嘅時候，問呀婆想食咩，呀婆話佢好想食杯面，因為佢好耐未食過咸野，於是我媽買咗個合味道俾佢。其實，人真係好簡單，就係食同住姐，但呢兩樣咁簡單嘅野，喺香港真係好難。
福 興 路 62 號 凶宅 在 法拍凶宅提醒: 文山區福興路62號3樓( 潤泰敦南美景)(法院註記 ... 的必吃
法拍凶宅提醒: 文山區福興路62號3樓( 潤泰敦南美景)(法院註記)(跳樓) 汐止區民族六街5巷16號3樓( 金龍社區)(未註記)(疑似燒炭) TORO分享即時凶宅資訊(疑似凶宅) 與法拍 ... ... <看更多>