我殺咗老婆之後（上）
「老公，快啲起身啦！」
係我老婆把聲！
我嚇到成個彈起，冒出一身冷汗。
我點解咁驚老婆？因為，我尋晚殺咗佢，佢條屍仲喺我架車裡面，我唔應該聽到佢把聲。
一定係我太驚慌，搞到幻聽。
我深吸一口氣，冷靜落嚟，重新諗一次尋日發生咩事。
我點解會殺我老婆？話說我哋感情唔多好，但都想努力挽回夫妻關係，所以尋日我同佢去郊遊，諗住大家單獨相處，可以培養吓感情。
點估到，關係唔好嘅兩個人單獨相處，只會發展出更多嘅爭執同憤怒。
我一怒之下捏死咗佢，當然唔想為咗呢個八婆而坐監。
我想搵一舊大石頭綁喺上屍體，丟落河，咁就石沉大海，無聲無息。
但我行嚟行去，好不容易搵到一舊夠大嘅石頭，又綁嚟綁去都綁唔實。
眼見天色愈嚟愈暗，我心慌意亂，又驚俾人懷疑，就返咗屋企。
返到屋企，成個人好攰好暈，好快就瞓著咗。
瞓到半夜，我就……聽到我老婆把聲！
我抬起頭，居然見到，老婆就喺我面前飄嚟飄去，面色慘白，頸上仲有清晰嘅手印。
「啊！」我即刻跪喺張床度：「對唔住啊，我唔係有心殺你㗎，嗰下我太嬲，跟住……」
我語無倫次，只想求得老婆嘅原諒，逃過冤魂索命嘅厄運。
老婆好溫柔咁話：「唔緊要啦，我都知你唔係有心。」
「吓？」我反而呆咗，佢真係原諒我？咁佢半夜叫醒我做乜？
「哎呀，唔講呢啲住，我哋有更緊要嘅嘢做。」老婆個鬼樣都皺晒眉頭。
然後，老婆就問我，我係咪冇搵過佢。
「我點樣搵你？」我講番我嘅行蹤：「我……咩咗你之後，就返咗屋企，唔小心瞓著咗。你嘅屍……皮囊，仲喺我架車上。」
唉，同一個自己啱啱殺死嘅人講嘢，真係好尷尬。
老婆問：「老公，你係咪唔想坐監？」
「其實我都諗住自首嘅，不過……」我支支吾吾：「最近公司好忙，下屬靠晒我……」
一時三刻，我真係諗唔到更好嘅理由。
點樣可以解釋我唔自首，又唔至於激嬲老婆嘅鬼魂呢？
老婆好溫柔咁講：「我都唔捨得你坐監。」
我成身都起晒雞皮，唔知係因為撞鬼，定老婆意外地溫柔。
唔通做鬼真係會改變一個人嘅性格？假如老婆生前都係咁順攤咁溫柔，我哋就唔會成日嘈交啦。
「但係，聽朝我返唔到工，同事就會搵我，遲早會發現我『失蹤咗』。」
老婆話：「你應該係最先發現我失蹤嘅人，警察一查，知你冇去過搵我，你嘅嫌疑就好大。」
我頭都痛埋：「咁我應該點做？」
老婆就叫我去報警，話我哋嘈交，佢一怒之下走咗，我就嬲爆爆咁返咗屋企，但等到半夜佢都唔返嚟，我開始擔心，先去報警。
我半信半疑，起身著衫，出門去警局。
老婆嘅鬼魂一直跟住我，但係行到警局附近，我諗起車裡面嘅屍體，又有啲心虛。
咪住先，老婆會唔會想報復我，所以出埋啲陰招，引我俾人拉？
始終係我殺咗佢，我哋生前關係又唔多好，唔通佢一啲都唔想我坐監？
我思前想後，無視老婆嘅催促，返咗屋企。
冇幾耐，警察真係上門搵我，問老婆失蹤嘅事。
我用盡我嘅演技，講番「同老婆嘈交，佢一個人走咗」嘅理由，但警察非常懷疑，不斷問我，老婆唔返屋企，我點解唔報警。
好彩，警局附近嘅閉路電視，證實到我當晚去過警局。
我順勢解釋，我本來打算報警，但行到門口，又覺得老婆只係自己行開吓，怕貿貿然報警俾老婆鬧，所以放棄咗。
講到呢度，警察先冇繼續追問。
我鬆一口氣，睇嚟老婆係真心幫我嘅，如果唔係佢提點，我可能啱啱就露出馬腳啦。
下集：https://bit.ly/34u69wx
我執到一本生死簿：https://goo.gl/ztyQzU
我嘅職業係：厲鬼：http://bit.do/fmtGi
#短故 #短篇 #小說 #陳美濤 #廣東話 #粵語 #tomatochan #我殺咗老婆之後
皮囊小說 在 有声小说《以正义之名，撕扯掉伪善的皮囊》39-第 ... - YouTube 的必吃
有声 小说 《以正义之名，撕扯掉伪善的 皮囊 》，【有声书频道】收藏并分享。 ... <看更多>