關於 環球水泥評價 ，我們在網路上蒐集到這些相關的討論、資訊與評價

【龔成問答信箱】（Q21541-Q21560）

Q21541：

阿sir，剛剛重溫你第五堂既野，去計0066企業價值，唔知計得啱啱啱

咁我就用左2012-2020年既數據既 咁由細到大排左市盈率再揀左中間5年既就係13.18-17.56，

咁由於2020年港鐵因為物業估值嘅關係導致佢每股盈利得出負數，咁我就用2019年嘅每估盈利為1.94，

乘返市盈率再俾上下10%緩衝得出就係24.09-37.47。請問方向正確嗎？

謝謝阿sir

龔成老師︰

你成個功課，方向大致都正確。但因為港鐵(0066)較為特別，所以係你答案之上，會有些調整。

首先，每股盈利部份，由於集團收入係包括一些物業重估，所以你見佢過往多年，個數字都唔太穏定，有上有落。因此，我建議你用6年平均去計，會較理想(不計2020年負數)。

另外，市盈率方面，由於每股盈利包含了物業重估部份，令企業價值被高估左，實際PE應該係無咁低(如果你記得計算PE的公式，就會明白我意思，可參考第5堂, SLIDE3)。

因此，PE個合理範圍，我地都會調高少少，去反映這個物業重估，所帶來高估每股盈利的影響。

其實最正統的方法，要每一年的盈利扣除翻物業重估，以這個作基礎調整市盈率數據。

每股盈利︰HKD2.34，合理PE大約上調15%，即15 - 20倍。

合理價格︰HKD35.1 - 46.8

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。你預佢現時估值，是合理區中上位置。

------------------------------------------------

Q21542：

你好，龔Sir。 我剛報了股票班，希望踏出第一步，去增加智識。現想請問 MPF 組合問題。

我現時39歲，睇返MPF滾存至今，只有30萬，以往未有理會，但至從看你的fb, 令我有所改變，MPF也是一種投資，不能輕視。

曾經睇過一片文章，MPF要按年齡去增加債券比列，不知以下改變，是否適合。

我39歲，單身。 MPF經理：銀聯BCT

現有資產基金組合：
4月開始轉了30%環球股票, 40%大中華股票, 30%環球債券

將來供款投資組合：
4月開始轉了 3.49%中國及香港股票, 40.75%大中華股票, 27.88%環球股票, 27.88%環球債券

十分感謝回覆。

龔成老師︰

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

當然，你想分散風險，加入一些大中華股票或環球股票，係可以。

但環球債券增長力不高，除非你投資取態好保守，否則以39歲年紀計，就唔係咁適合。

股票班見!

------------------------------------------------

Q21543：

老師，想問金界合理區正確嘛？另外，老師覺得幾多先算便？值得入？我用上堂教的方法，計到佢合理價為$8-$10。

我而家有現金30萬
10萬1044

仲有一d質素無咁好既股票諗住逐d轉番做有質素既

我心裡面知而家股市未係平宜，老師都叫人留現金等大跌市先掃貨，但成日心郁郁想入市，例如金界，但同時又會諗，如果等大跌市，回報會高好多

內心會爭扎，工作收入唔穩定，所以會好想d資金用得其所，唔想再係有機會但無錢入

如果係你，老師會點做？

龔成老師︰

你做的估值，係合理的，現時金界(3918)算在合理區。如果要到平宜區，你預跌多2成以上。

這股股價較為波動，不過都有長線投資的價值，現價可分注投資。另外由於市場新興，在注碼上不能投資得過多。

另外，我地無人知將來個大市會點走，更加唔會去估佢走勢。只會用當時平貴，去制定入貨策略。唔好比自己心理或者大市氣氛，影響到你計劃。

係價格合理時候，入一部份資金。到平宜區時，我地就大力入貨。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現貨可持有。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多(少於組合之30%)，同一股不能太多(少於組合之15%)。要平衡，建立後長期持有，不是買賣賺差價，而是成為你財富組合一部分。

因此，你未來要加入更多不同行業的優質股，令個組合平衡翻，唔會太偏重個別股票。

你持有股票如果係劣質股，就應馬上沽出。如果係質素較弱，但又未到無質素，可以分段咁慢慢沽。

現時大市只在合理區，現金和股票佔比，最好係各一半。由於你收入不穏，最好額外儲半年開支，作不時之需。

雖然無人知幾時會大跌市，但你都要預留一定資金，去把握這個可能出現的機會。

------------------------------------------------

Q21544：

老師，唔好意思，可能又要麻煩你，我手上持有1257@$3.5 / 三手：(3000股)，今年1月25日入，目前為$3.12。

最近Biden發表減碳目標，同各大基金經理亦看重中國實際參與度，你認為對此股在中長期算是利好消息嗎？

另外，相較之下老師如何看待956, 257 同 1330呢？

多謝老師先，同好多謝你不斷俾正能量同正面思維大眾，默默地，它們對好多人真係有一定程度嘅影響，我自己也是其中一個。

希望大家一齊進步！再次感激老師！

龔成老師︰

中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。

負債與發展持續性，都是這股的風險因素。

你所講的減碳目標，都會係一個利好因素。長遠來說，這股仍是有投資價值。但此股畢竟有一定風險，不建議太過大注，同時可能仍會弱一段時期。

新天綠色能源（0956）和綠色動力環保(1330)本質不差，業規模比較細，整體質素和潛力度，無1257咁高。

光大環境（0257）係中國光大綠色環保（1257）母公司，都係主力環保相關業務，同樣有質素，但由於己有一定規模，故潛力度會較1257為弱。

------------------------------------------------

Q21545：

老師，剛想到一個情況

我在102元時入左一手平安好醫生，早前有一天，記得因為有個女股神定乜知名人物大手購入這1833，令佢股價一日內突然狂升幾十元到140多元

我剛剛突然諗，這個突然炒高的價位是因為某些巿場利好消息，應該超出了1833的合理價，當時我應否先賣出了。

待1833回復合理價位（例如現在經常徘徊在90多元）時再買入來長線持有？

龔成老師︰

我地優質股，永遠都係長線持有，會係最好。好似這類中短期波動，其實唔需要特別做任何動作。

更加唔好去沽走勢，覺得佢$140就一定係貴，我沽左先，平D再買過。這個不是正確做法。

早前佢升到$140係貴，但未算得上十分貴。無人知之後，會唔會更貴，到時你就無機會入翻貨。所以，這個水平的股價上升，我地係唔應該沽貨。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

你現時只有1手，你只要耐心長線持有就可以，等待這企業改變整個行業的情況。

------------------------------------------------

Q21546：

老師你好 啱啱睇完你本股票勝經 𠵱家睇緊50優質潛力股 加上自己睇下其他資料

現打算月供以下股票 希望老師俾少少意見 謝謝。 (之前老師你建議 平穩增長: 潛力為7:3)

盈富+中銀香港+港鐵+領展+中電+金沙

再加安碩恆生+小米/騰訊+港交所

想請問每隻月供係咪1/9咁分? 定某幾隻應該供多啲? 謝謝老師解答。

另外我已經報咗名上你股票班 到時會盡量同同事調時間務求上到老師你嘅堂 (我仲幫埋妹妹報名一齊上堂 會好好努力學習)

龔成老師︰

你現時所選組合，係合適。所選的都是有質素的股票，以及有長線投資價值，無問題。

資金分配上，我建議你簡單點，將月供資金分成10份。盈富(2800)月供2份，其餘全部供1份。

上課前，你先看看我的書，對你課堂吸收會有幫助。你有時間，可以睇埋"財務自由行"，但無都無所謂。

而我會較建議，你這刻可以初步進行上述計劃，但就一定要留有現金，到上堂後，才正式進行整個組合的具體配置。

一齊上堂是一個很好的學習方法，因為可以討論，大家可以更快進步。股票班見！

------------------------------------------------

Q21547：

老師，如果一隻股票我有$10買入，而現時升到$20，如果仍$20仍是合理價，應否加注？

如果加注會拉高我平均買入價。

龔成老師：

你思維錯左，唔好比「過往平均買入價」限制左自己，你要分析，現時我手上有一筆資金，怎樣會對長遠財富有最大回報。

當然，要同時考慮整個組合的配置、現金，持貨比例。

------------------------------------------------

Q21548：

Sir 我見很多收息股股價上落不多，但成交很多，是甚麼原因？

龔成老師：

因為市場對佢合理價的定義較為一致，沒有大大的分歧。

投資者認為企業價值好接近，例如$100億-$105億，如果市值上到$106億，就會有好多投資者認為貴，因而賣出，令股價下跌，所以股價不會太超過一定的範圍。

相反，如果一隻股票股價上落大，代表市場對這企業的睇法及分歧好大。

至於成交大，代表買賣好多，不一定會令股價有好大的變化。

------------------------------------------------

Q21549：

老師，我媽咪成日聽到我講買股票，最近夾硬過咗啲錢俾我，叫我拎去我投資

我會打算將媽咪嘅錢，放落去水桶1-2，買返去我平時睇開嗰啲，可以？

龔成老師：

你媽的風險承受能力，與你並不相同的，你不應投資同你一樣的組合，投資水桶1-2，並不適合佢。

特別是佢對股票無乜認識，當佢面對短期股價波動時，承受壓力的程度與你不一樣。

建議你幫佢投資水桶3類別的股票，再加上水桶2，會較適合佢。

------------------------------------------------

Q21550：

龔sir,你好！我是一個90後雖然我不是你的學生，但我都有留意你出嘅書，也同意你書中大部份的內容！

其實我今次信息你係希望你可以講下一個大部份有錢人都會做的事情「捐款」！

我相信你在成名之前也做了不少的善事導致有今天的你！

例如用自己嘅時間真心去回覆別人嘅問題.....，希望你來緊會出一條影片去陳述關於捐款對自己變得更富有嘅影響！因為我相信普通人變成有錢人離不開第一個步驟，就是幫助別人或捐款！好多謝你去留意我嘅信息！

龔成老師：

我睇左好多成功人士、有錢人的書，佢地都會貢獻社會，而我都在這樣做，原來佢地好明白一個社會法則。

就是你要「先給予社會，你才會得到」，如果我地想有更多財富，更加成功，就要先貢獻更多給社會，這是成功人士、有錢人、我，都明白的。

這個世界好神奇，你貢獻愈多，得到的就愈多，這樣的情況我已經歷了好多。

另外，當我地擁有了一定的資源，自己根本用唔晒，就應該還翻比社會，因為所有資源都是大家的，只是有時我地憑努力分多左少少，而比翻多d社會都是很正常的事。

------------------------------------------------

Q21551：

龔老師：你好,本人有一些股票問題想請教！本人在較早前以$1.64買入1569（民生教育）及以$1 .3買入2233（西部水泥）,2隻股票都有5萬股

而西部水泥過往3年的派息都不錯,但民生教育則比較小,我明白教育股是需要保留資金的道理,故此請問上述2隻股票可否長期持有？

另外本人已55歲,有50萬現金,我想分配到2（中電）、2800（盈富基金）及2822（南方A50),可以嗎？
多謝龔老師提供資料,感激！

龔成老師：

民生教育（1569）主要於中國提供民辦高等學歷教育，包括本科學歷教育及大專教育。該等學校為重慶人文科技學院、重慶工商大學派斯學院、重慶應用技術職業學院及內蒙古豐州職業學院（青城分院）。

過往的業務都有發展的，盈利整體有增長，不過就有少少波動。

企業長遠的發展力屬中等，現時股價合理，預期企業能平穩增長，但預期不是高增長類別。

你有貨可持有的。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

其實兩隻都可以持有，不過，以質素及增長力來說，都不值得持有太多。

至於你資金，可以分配到盈富（2800）、南方A50（2822）、中電（0002），建議加時加入少少收息股，例如香港電訊（6823）、置富（0778），組合會更加平衡。

當然，財富組合都要有一定的現金在手。

------------------------------------------------

Q21552：

請問老師2158現價可入嗎？另外，6886($26入）和2623($0.55入）都是持有很多年，一直都沒有止蝕，這二隻還有希望嗎？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強，現價合理。由於你買入價貴，而這股增長力不強，要上翻去不易，你或者見有較大反彈都可以減持，轉其他對組合長遠增長力較好。

愛德新能源（2623）業務波動，之前年年虧損，近期先好翻少少，是高風險類股，這股長線投資的價值，唔高。賣出較好。

------------------------------------------------

Q21553：

龔老師，我手上有
1211, 2手$270
968, 3手$18.5
2820, 8手$145

你覺得呢幾隻股發展潛力如何？我應繼續中線持有，唔好理中間波動？謝謝

龔成老師：

1211買入價貴，但有潛力，你持有就得，不過要耐心D，同時唔好心急加注。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂。你買入價略貴，不過有得守，只要不持貨過量就得。

ＧＸ中國生科（2820）有潛力，但現價仍貴，你可長線，但唔好再心急加注。

------------------------------------------------

Q21554：

龔sir，想請問下第5課計港交所合理價時，每股盈利你用最近5年，但PE就用10年內的4年，點解PE唔可以同樣拎最近5年？

我諗法係PE係嚟自除以EPS，咁EPS同PE所選取的年份如果唔對應會唔會有問題，同點解冇問題，謝謝你

龔成老師：

因為計算每股盈利時，我地其實是考慮「有代表性的每股盈利」，因此，並不一定用5年平均，這只是一個較簡單的方法，最正統的方法是自行推算。

所以，當用5年數據時，只是找一個較近現時有代表盈利的數去計算，是否5年並不是重點。

至於市盈率，則是運用能反映企業與市場關係的數目，如果10年的大環境無變，就會用10年，但如果大環境改變，就會用較近的年份，其實這都是無絕對的答案。

------------------------------------------------

Q21555：

最近經朋友介紹瀏覽你的網站，十分欣賞你正面的信息。有心真的不怕遲，只要努力，必定可以慢慢達成理想。

我40歲左右，之前因生活問題，放棄了讀博士（這是我一直的夢想)。後來決定以Part Time報讀，終於在2017年畢業。

當初有親友說我不設實際，但完成了自己的夢想，真是很快樂。大家努力~！

龔成老師︰

只要有一個你真正重視的「夢想」，就算再困難，幾無人支持你都好。只要你個「夢想」對你夠重要，你都一定會諗到方法去完成。

當你現在成功完成這個「夢想」，代表你人生又行前了一步，恭喜你。

在完成這個「夢想」之後，我地又係時候要好好規劃之後的人生目標。

好好思考如何去「經營未來的人生」，給自己一個獨處時間，好好想清楚自己的下一個夢想、目標，是什麼。

當你有方向後，你要將自己放到一個「適合你成長的環境」，努力去「成長」，提高自己能力，向下一個新目標和夢想進發。

------------------------------------------------

Q21556：

龔老師，你好，想請教下，N年前十幾年前的買了隻1191,成本12.8，一直跌。

現在一蚊都冇，唔知點，放左單咩都冇，同所淨冇幾。會否升返嗎？由佢放係度？

謝謝老師

龔成老師︰

我地是否持一隻股票，唔係睇佢個股價，而係睇佢有無質素。如果無質素，就算而一刻蝕多少，都應該要沽。

中國中石控股(1191)主要於中國從事物業發展業務，以及金融服務。

這企業規模好細，而且營業額都唔高。睇佢過去多年出現虧損。

加上2019年核數師意見是「不表示意見」，代表盤數有機會係有問題，對這類企業我會好有戒心。

現時由於佢2020年年度業績審核未完成，所以公司暫時停牌，因此你現時係無野可以做到。

此股唔見有明顯的投資價值，到佢復牌後，建議沽出。如果你持貨較多，可以每有出現反彈，就分批沽出。

------------------------------------------------

Q21557：

老師有啲嘢想問你，1858 春立 至從骨科集採，成本下降，而且由高位下跌66%時候已入貨(成本$19）

想問下呢隻值得我作為倍升股持有嗎？

龔成老師︰

集團毛利率由2019年的69.38%上升到2020年的72.60%，主要由於採購議價能力加強和公司量產導致固定成本相對下降所致。

這是一個正面的訊息，但我地分析企業，唔好只睇1,2年情況，而從長線去做考量。

春立醫療（1858）長遠有發展的。

佢主要從事以自有品牌「春立」研發及產銷植入性骨科醫療器械，產品包括：

（１）標準關節假體產品：主要包括髖關節假體產品及膝關節假體產品，用於治療骨關節炎、類風濕性關節炎
及其他疾病。

（２）定制關節假體產品：分為傳統定制關節假體產品及組配式定制關節假體產品，主要用於治療關節骨折及
其他原因所致的關節損傷或骨缺損。

（３）脊柱產品：包括頸椎前後路固定系統、胸椎固定系統及腰椎固定系統，產品適用於退化性疾病、脊柱疾病、畸形、骨折及其他病理原因所致的背痛。

佢係關節醫療器械技術有一定經驗，受惠於未來人口老化對醫療用品需求、醫療器械納入醫療保障等因素下，此股有佢架投資價值。

集團盈利由2015年4000萬，升至2020年2.8億，升近數倍。但主要升幅來自2019年，所以盈利增長唔算係平穏。

現時股價比之前合理翻D，但仍未算平。

此股都有倍升機會，但質素上，未算係最高個類。而且都有一定不確定性，不宜持有過多。若佢只佔你組合小注，你長線持有就可以。

------------------------------------------------

Q21558：

龔sir, 你好...我現在33歲, 有兩個小朋友, 大的5歲, 細的1歲, 目標係草到個首期上左車先。

由於之前都係短炒為主, 真係損手爛腳, 剛好早排有朋友推薦我看你旳facebook, 所以才開始接觸月供股。

有幾個問題唔係好明﹐想問問你,希望你百忙之中抽小小時間回覆...

1. 月供股意思:假設我月供金沙, 每月供$3000, 以而家1手股價係1萬4左右, 咁即係供4-5個月左右才入到一手, 係米咁意思...

2. 金沙而家呢個價位可入嗎?

3. 假如我每月投放$8000, 想月供2-4 隻, 有推介嗎?

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。所以，往後不要再用短炒這模式去投資了。

1) 簡單來說，月供股票就是你每月將現金，買入某一隻或多隻股票，慢慢咁樣儲貨。

形式就是每月投入相同的金額，買入同一隻或多隻股票，並持續進行。

以你例子，每月用相同金額$3,000 買入金沙（1928），假設第一個月股價為$30，就能買入100股；第二個月升至$35，就能買入85股；第三個月跌回$25，就能買入120股。

總結這三個月，投入了的資金為$9,000，累積股票為305股，平均買入價為$29.5。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

當於初學者或者不懂定平貴的投資者，月供可以令佢地買貴貨風險，得以大大減低。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上。

月供最重要的一點，是「選股」，如果你無選股能力，就投資ETF，如盈富(2800)。

2) 金沙（1928）有質素的，有長線投資價值，收息不差，同時有平穩增長力，但不是高增長類。

現價合理，可分注入貨，或月供都可以。

3) 以你33歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。如果每月能儲到的現金為$8000，你可以每月先用$4000儲蓄，另外$4000就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，我建議你先集中在平穩增長類股，至於潛力股，只宜小小注(少於3成)。此期間，你最好是努力提高投資知識，才慢慢增加翻潛力股比例(最多5成)。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21559：

想問下1800 中國交通建設 點解高息, 低淨值, 低市盈率, 高現金流, 有增長, 都可以跌足4年?

市值 (港元) 165.693 億
市場價值指標 (最新)
年度 (貨幣) 2020/12 - 末期 (人民幣)
每股盈利 (人民幣) 92.000 仙
每股派息 (人民幣) 18.088 仙
派息比率 (%) 19.661%
每股現金流 ($) 0.857
每股淨資產值 (人民幣) 15.160 元
市場價值指標 (全年)
市盈率 (倍) 3.4
周息率 (%) 5.712
股價/每股淨資產值 (倍) 0.206

龔成老師︰

你都講都佢一些正面的財務因素，但我地唔會單憑個別年份的指標，去評斷佢投資價值。

我地要好全面，去睇佢過往多年數據變化，企業本身質素和行業發展狀況等，去得出一個綜合性結論。

中國交通建設（1800）本身不是無質素，但又未去到好好，算是中等類別，但增長力不強。市場會擔心企業的可持續發展，擔心生意無過往咁好。

過去幾年收入的確維持增長，但你再仔細去睇佢財務數據。

你會發現，多年收入維持增長的同時，盈利整體係出現倒退的情況，反映佢賺錢能力係弱左。

而且佢本身負債高是扣分的地方，因此估值不會高(所以PE一直偏低，反映出市場對佢評價較一般。)，股價都反映了相關風險。

此股現價算是合理，分注投資都可，但就未必適合太大注。

------------------------------------------------

Q21560：

你好龔sir，本人28歲，投資新手

想請教你對0311 聯泰控股和恒生simplyfund 基金的睇法。

謝謝

龔成老師︰

聯泰控股(0311)主要從事成衣及其飾配件的生產和貿易業務。

此企業規模唔大，盈利都唔算高。賺錢能力唔強，加上有一定負債，都係扣方地方。

現價算係合理區頂，可投資。但由於質素只係一般，而且過往股價都好波動，只宜好小注投資。

至於恒生simplyfund，係一個可提供多種不同基金的投資平台。

你可以衡量翻恆生所提供之基金的投資策略，所投資的資產類別、投資策略、風險程度、市場、費用成本以及過往的表現(可以睇佢過往5-10年，如果回報係比主要投資市場高，你可以考慮投資)。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14741-Q14760）

Q14741：

你好老師，我現在是大學生一名，有10萬現金，打算用4萬左投資. 我的疑問是我應該做穩健投資（盈富之類）還是可以更進取一些？謝謝

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14742：

Hello 龔成老師
上年開始學投資
睇開你d QnA學野

有月供同一手手咁買
月供我知要幾年以上 咁我唔會賣
但一手手既通常會儲幾年定價位好就賣？

例如一間公司/個市會有好有壞

1. 咁我應該係股票升 牛市果時賣 賣完如果股票跌 熊市再入 等價高再賣再入重複賺錢？

2.定一值持有 不理佢既波幅？因為有時見佢升到好高冇賣 但之後跌左價 都幾灰 心想如果我果時高位賣左 跌左再買好似會賺多啲

3.另外如果覺得一隻股票係有前景 但個價跌咗少少 咁我係咪應該係低價再買多少少溝淡佢 ？

謝謝

龔成老師：

其實，無論月供而一手手買，我地都只投資優質股，同時只長線投資。只是兩者的買入模式不同，月供就如同將資金分成多注去入。

1）基本上，我地會長線持有，但當出現某些情況，都會賣出部分或全部，第一，企業質素明顯轉差，第二，股價超過合理值，第三，有另一個回報明顯更高的投資機會

不過，要經過一定的學習，有知識，懂分析企業質素、平貴先做到，對大部分散戶來說，簡單長期持有往往更好。

2）你唔好比「心理因素」影響左投資決定，這是投資大忌！小心！

3）要睇佔你總財富的比例，較優質的股票，佔比雖然可以較多，但都不能太多。

另外，如果一間企業質素不佳，或轉弱，就算股價跌，都唔好加注！

------------------------------------------------

Q14743：

成哥你好呀！可以幫我解答下366嗎？
非常感謝！

龔成老師：

陸氏集團（0366）主要從事製造及銷售水泥、物業投資、物業發展、銷售電子產品及酒店業務。

業務本質不差，近年的生意與盈利都有所增長，不過就不算好強，生意相信長遠的增長力不是強的類別。加上規模細，企業的獨特性不強。

整體來說，企業質素算是不過不失，現價都可投資，處合理區，不過就不能太大注。

------------------------------------------------

Q14744：

老師你好！我有一個簡單問題諗唔明。假設我擁有10000股股票，平均買入為26元，賣出部分股票會影響平均買入價嗎？

因為有apps顯示拉低了平均買入價，另一apps又顯示不變。

龔成老師：

其實我都唔清楚，要睇該APPS的程式，點去定義，例如你在$10、$20、$30買入，各1000股，平均價為$20，如果你賣出了1000股，假設佢用平均價計算，就唔會影響。因為佢假設你所有貨都是$20，無論賣多賣少都是$20。

不過，這裡要提醒你，唔好太著重所謂的平均買入價計算，這只是數字遊戲，如果你比這些因素影響了投資決定，你就好有問題。

------------------------------------------------

Q14745：

老師你好，想請教下，我想搵d潛力股作月供 銀碼2千蚊左右 請問咁多隻潛力股 應該月供邊隻好？同埋每個月幾號供係最適合？ 謝謝

龔成老師：

你可以考慮比亞迪（1211）、中生製藥（1177），都是有質素的潛力股，都可以長期進行月供，你可以集中供一隻$2000，或兩隻名$1000。

至於幾號供，無所謂，真的無分別的。

------------------------------------------------

Q14746：

你好 本人今年40歲
月入扣除支出約剩$5000
剛剛開始學習投資

手上現金:120萬
00006電能:2000股
00011 恆生:300股
00939 建行:10000股 (全部1-2年內買)

未開始做月供

請教有沒有什麼建議可以讓資產增值?
非常感謝!

龔成老師：

你現時持有的，都是有質素的股票，可以長線投資。不過你現金比例較多，宜作出適當的分配。

記住，我地投資不是炒賣，是一個財富分配的過程，將現金適當地轉化為優質股。

由於你投資經驗不多，建議你只動用$20萬，分注投資優質股，餘下等你有投資知識及經驗先投資。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。都是適合你的。

至於每月資金方面，你可以進行月供，每月$10000，盈富佔$5000，餘下$5000你可以選2隻去供。

你先了解下上述股票，以及提升一下基本的股票知識，就可以開始上述計劃。

另外，以你的年齡及情況，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14747：

你好, 多謝您無私的分享, 令我獲益良多, 現時我做好功課note低有幾十隻優質股,收息股,潛力股, 希望透過呢啲股輪流坐順風車,任何時候某隻升夠就換另一隻唔知點解會跌既優質股, 如果座艇都可收息, 再配合期權!

當我選股時,遇到一些問題,希望老師可以解答一下,又或者介紹一些簡單易明既書籍讓我自己尋找答案,
以啤酒股為例

168
291
1876

市值,發行股數,公司每年收入,市盈率等等...以上資料 我應該怎樣分析呢?

市值 1876>291>168
收入都係
但 1876 股價反而最低

另外銀行股都有呢個情況, 我都係唔識計

依家因為唔識計,我只有睇圖,睇成交,憑經驗去買

我希望我知識上面有所進步, 咁以後買完股即使跌都可以更有信心
謝謝老師

龔成老師：

市值，代表這間企業以現時股價計，市場認為佢值多少錢，但我地不能單單以市值，去衡量投資那一隻股票，最重要是企業的質素、發展、業務、平貴。

另外，股價數字的大小，不能代表企業的大小、質素、平貴，因為每間公司發行的股數都不同，單單分析股價數小，是完全無意義的！

至於睇圖、睇成交，都只是所謂的技術分析，我要提醒翻，全球最賺錢的投資者，巴菲特，並不認同技術分析，而唔賺錢的財演，就會推介技術分析，用唔用，你自己決定。

我都幾擔心你行錯左，強烈建議你睇多D有關巴菲特的書，又或是正確投資知識的書。

就算你所講的投資策略，都有一些錯誤的地方，要小心。

------------------------------------------------

Q14748：

#3688 @3.6 4000股，@3.9 4000股，前景如何？應否再溝？

#1680 @1.49 10000股，前景如何，應否再溝？
#700 @385.8 200股，@328 200股，目標價幾多？現在似收成期是否應繼續持有？
謝謝老師指點！

龔成老師：

你記住，我地決定繼續持有一隻股票與否，最重要是企業質素、前景，買入價不是重點。

萊蒙國際（3688）質素一般，業務有持續下跌的情況，唔建議加注。但這股不是無價值，至於持有的貨，如有較大的反彈，可分注賣出。

澳門勵駿（1680）企業多年都出現虧損，投資價值不高，唔建議加注。

騰訊（0700）有持有的價值。無話咩目標價，但可長線持有，不過你預佢增長力比過往弱左。

------------------------------------------------

Q14749：

老師，我港鐵公司持股數持股數1147,中電控股月供股票1000元,(滬A)中國銀行 100 ,中銀香港全天候一帶一路債券基金 A2(港元)類,中銀香港全天候大灣區策略基金 A2（港元）類,鄧普頓環球債券基金(收入) (港元)

現金：
USD 6,371.29
HKD 150,000.00
CNY 14,000.00

收入每月:14,000
想緊買不買黃金？？

龔成老師：

首先，你現時的分配，現金有少少多，可以分多少少去股票，組合會更加平衡，你可以買入盈富（2800），這是最適合你，同時可以減少你單一持股風險。

至於黃金方面，在我地的理財配置中，可以投資少少黃金，因為黃金在財富組合中，有對沖大型黑天鵝風險的作用。

不過，黃金始終沒有現金流，因此，不用持有太多。

------------------------------------------------

Q14750：

阿Sir，有個問題想請教，這個印度債券基金有3x%是沒有評價級別，我投資前都有問銀行經紀。

佢話因為當中有7x%都是印度政府的，所以沒有級別，但他說可以放心，我不知道是真是假。

龔成老師：

你最好自行找這基金的資料，唔好只依靠經紀。

自己上網找，這基金的組合，投資策略，投資了甚麼，真正的情況如何，如果真的有7成是政府發行，相信如果基金有3成回報，其實都不差的。

不過，要清楚當中有那些風險，例如貨幣，如果債券是當地貨幣，而最終因貨幣貶值，最後得到的本金可能貶值，要清楚翻。

這類基金，如果最後投資，都不建議太過多。

------------------------------------------------

Q14751：

龔 sir, 請問你如何看雲南水務 6839? 為何近4年業績溢利都增長, 但股價卻不上. 是否因許雷及高負債 (另總權益近3年都沒增長) 才引致股價上不去?

現高息至10%比 0371 的 4-5% 吸引很多...

龔成老師：

雲南水務（6839）業務本質不差，但負債是最令市場擔心的，因為現時負債不止高，同時每一年都在高速增長，市場認為風險高，在估值上亦會因此而壓低。

所以你見這股高息，是反映市場對風險的因素。

現價已反映風險，所以投資價值都算有，但始終風險高，如真的投資，小小注好了。

------------------------------------------------

Q14752：

Hello龔成你好，本人現於馬來西亞居住全職家庭主婦，因要照顧小朋友没有時間看股票，全部是10年前買入。

最近只有買過1810小米，其他也没有郁動過，當年買入1919，到現在仍然蝕10萬以上，請問你覺得我應該全部賣掉，再重新買過其他嗎？

因想買些高收息股，作爲小朋友將來讀書用，希望你回復及幫到我，感謝你！

1810 200 $2,336
1898 1000 $3,080
1919 8000 $26,560
2628 6000 $134,400
3328 8856 $48,530

龔成老師：

我地持有一隻股票與否，最重要睇企業的質素、長期發展，以及你本身的年齡階段，組合分配情況。

你現時持有的股票，質素不算差，但部分不能說最高質類別。

小米（1810）可持有，但不能太過多。

中煤能源（1898）質素一般，就算轉其他都可以。

中遠海控（1919）質素一般，但不是無質素，建議賣出部分先。

中國人壽（2628）雖然有質素，但你持有的比例較多。

交通銀行（3328）有質素，可持有。

你可以將部分資金，轉投資收息股，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、匯豐（0005）、置富（0778）、陽光（0435）都可以。

------------------------------------------------

Q14753：

龔成老師你好。小弟係大概一年多前開始睇你既page
月薪得萬幾蚊

睇你講既而學懂正確理財同投資
何謂股票既真正價值，
股票唔係只係一張紙一個號碼

而係一間真實既公司
以前由月月清每月還款7，8千儲唔到錢
到而家每月儲到一萬蚊

用黎月供之餘仲可以保留現金
仲竟然儲到人生第一個十萬！

所以老師你講既做任何事之前一定要信自己做得到呢件事係一定要好好記住，十分感謝老師既分享

亦希望未來可以夾到時間去上老師你既堂
（因為幾次都撞唔岩個時間）

另外想問少少而家月供既問題
因為而家有兩個倉

一個係月供股票，一個係一手手買入
請問如果市場進步瘋熱狀態下

我部分賣出一手手既股票
而月供股我繼續持有唔賣而減少或停止月供金額呢個做法好唔好？

定係我應該保持金額去月供？
祝老師身體健康。謝謝

龔成老師：

當市況進入狂熱期，你一手手買入模式的部分，應該停止買入，甚至可能會賣出（但都要睇到時有幾熱，以及價格與價值的差距）。

至於月供部分，到時可以停，或者減少月供的金額，但都要視乎到時的情況，而一般的情況，都建議這部分保持長線持有，只是買入力度的問題。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14754：

你好啊
呢幾日終於嘗試買第一之股票
我買左一手 09922 九毛九
之前抽唔中 之後入左
點睇呢隻九毛九？

龔成老師：

九毛九（9922）這類新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過股價就唔算平，小注都可以，初步睇，這股都有長線投資的價值。

------------------------------------------------

Q14755：

龔成老師你好，我今年25歲，政府工月入大概21k左右，每年跳point，依㗎每個月供緊3000人壽儲蓄保（供二十年）到時攞番1百萬左右，另外7000儲現金。之前有買落啲股票。

00939:[email protected]
01029:[email protected]
03988:[email protected]

想問下以儲錢嚟做大前提，可以點做？
謝謝

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注。

因為當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

你上述持有的股票，建行（0939）、中行（3988）都有質素，但就未必最適合你的年齡，就算你本身低風險，都建議你同時加上其他較有增長力的股。

鐵貨（1029），核數師的報告，曾經出現過問題，我元建議投資這股。

建議你加翻，有質素，有平穩增值力的股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14756：

成哥你好，本人近來研究這隻融創中國，見它這幾年也在平穩增長，如果是作長線投資，成哥你嘅睇法如何？想聽聽你意見

龔成老師：

融創中國（1918）有一定的規模，同時業務增長理想，這是由於中國樓市唱旺，但這不是無風險的。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是無質素，但你要明白背後的風險，同時明白這一定會令股價較波動，自己最好控制注碼。長線投資可以。

------------------------------------------------

Q14757：

老師……本人4O歲從未有投資經驗，每月2萬收入……現金有15O萬，想問我應該点樣投資沒有太大風險，謝謝老師

龔成老師：

以你的年齡，財富仍有增長力（但不是進取），同時，你未太多投資經驗，因此，你可以投資「平穩增值股」+「收息股」。

記住，投資股票不是炒賣，是投資優質股，長線持有，原理是持有企業，長線投資，企業成長令財富增長。

現時的$150萬，暫時只能動用$50萬，因為大市唔算特別平，同時你經驗不多，你要分注投資，同時留下一半資金。長線投資。

另外，你可以考慮做月供股票，供「平穩增值股」+「收息股」，前者佔7、8成，後者佔2、3成。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

你唔需要買晒上述的股，你可以選股，因此你先了解下這些股票先。

另外，買入時要分注，即是唔好一次過入，例如可以每隔2個月入一次，將資金分注轉為優質股。

------------------------------------------------

Q14758：

龔sir你好，我今年24歲，一年前睇咗你嘅書之後深深明白到月供股票嘅威力 依家目標係放係15年收成，供股1年後，今日我回顧呢一年嘅成績。

開頭我係月供$5000 去盈富，幾個月之後，我就轉咗做$2000 煤氣 $2000 領展 $2000 盈富，一年過去，我發現盈富已經有5%增長，但煤氣同領展反而負數，其實我應否係往後日子專心月供$6000去盈富基金？

然後搵機會放出823 003？

龔成老師：

首先，月供股票一定是長期進行，唔好轉來轉去。

月供的原理就是儲錢，但不是儲現金，而是儲優質股，因此，一定要長期，就可以發揮到，買入價平均，以及長期儲貨的作用。

另外，你月供的，一定要優質股，上述都是，因此這點無問題。

同埋，唔好太著重短期回報，要長期，中短期股價上落好正常，最重要是長期的財富增長。

其實你上述都是有質素的股，就算繼續月供無問題，但配置上，盈富（2800）比例會較多，因此，我建議你月供盈富$3000，另外兩隻各$1500。

記住，長期進行，唔好再轉。

------------------------------------------------

Q14759：

龔成老師你好！
想請教你如何在3年內儲到50萬

本人現月入$22,000

支出方面:
家用:$4000
大學學費:$2000
自動過戶儲蓄:$6500
謝謝。

剛剛開了股票戶口，打算一個作短線投資(富途) ，另一個用作長線投資(渣打)

龔成老師：

我會建議你集中「長線投資」，短炒的難度及風險十分高，當然，你分開兩個戶口是理性的做法。如果你真的想短炒，建議你定一個金額，如果「不幸地輸晒」，就不要再加。

你現時可以儲到約$10000一個月，要3年打上$50萬，不難，只要保持儲到這數，以及投資平穩增值股，已可以。

你現時是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14760：

老師我36蚊買比亞迪

佢會升到幾多先至放？
唔該哂

龔成老師：

比亞迪（1211）是有潛力的企業，這類股最好超長線持有，不用太著重目標價。

如果當企業的股價略貴，可以賣出一部分，你可以用「升一倍，放一半」的原則進行。

餘下的部分，就可以超長線，等佢的產品真正普及，企業潛在的將來價值，已經完全顯現，就可以賣出，我自己都是等這一天。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。