最荒謬的是，原來小說並不荒謬。
日前通過二讀的醫委會改革草案，一直遭醫學界大力反對，質疑草案通過後，政府會輸入大批內地醫生。有網民發現，內地有教育機構提供輔導課程，聲稱可幫助內地醫生投考香港醫生執業試，更設有工作推薦和移民等一條龍服務。
http://m.mingpao.com/…/article/20160712/s00001/1468321145532
小說：杏林風暴
［２０１６年１月］
在中環某私人會所的包廂內，立法會議員張予仁今晚約了一位醫生，但並不是以病人的身份，甚至不是作為一個立法會議員，而是作為一名父親。
「張議員，對於你個女想返香港做醫生既事，我諗我未必幫到手。」說話的是方歷山，醫委會委員，也是香港著名醫生。
「我唔係淨係講關於我個女。」張予仁的女兒及女婿在美國攻讀醫科，本來打算讀畢回港執業的他們，卻一又一次倒在醫生資格試上，「我講緊既係，呢個考試根本唔make sense，有乜理由，要一個係外國做緊專科既醫生，去考返佢大學year one 既野，合理咩？你知唔知我個女係外國名校讀醫架，佢間大學，出名過港大中大多多聲，果班所謂考官，憑咩考我個女？話我個女無資格做醫生，佢地又有咩資格考我個女？」
方歷山聽完張予仁的說話只是淡然一笑，說：「1968年，我係北京大學醫學院畢業，當時我黎咗香港，諗住做醫生，你知唔知果時班鬼佬點同我講，佢地話，我地呢啲大陸醫學院畢業既，唔入流。好，我等，等到今時今日，班鬼佬走曬，但係仲有班香港人，當咗自己係鬼佬，帶住有色眼鏡去睇人。回歸二十年，大陸醫學發展一日千里，但直到今時今日，一個係大陸既專科名醫，想黎香港醫院搵份工，都俾人歧視要佢考試，我都覺得好荒謬，但係我乜都做唔到，因為我無呢個權力。」
「咁即係無計啦！」張予仁，嘆一口氣，心理已經打算放棄。
「我睇又未必，不如等我介紹位朋友你識。」
不一會，包廂進來另一個人，令張予仁一看到也感意外，放下了手中的紅酒杯，站了起來。
「我諗兩位都唔洗點介紹啦。」方歷山指著進來的人說，那個人官仔骨骨，穿得很是斯文。
「張醫生，我都唔知原來你同特首辦既人係相識。」張予仁說。
「有時識多個朋友，無壞既。」方歷山說。
「哎，張議員，講明先，今晚我黎呢度既身份唔係特首辨主任，只係作為一個熟悉政策運作既朋友姐。」說話的是歐騰華，特首辦主任，楊震英的副手，也是很多事上代為出面的人。而張予仁這時才感到，今晚這個飯局，已經變得不簡單。
「我諗無論係張議員定係方醫生，都知道依家好多人話唔夠醫生，唔夠醫生，咪係外地搵囉，偏偏個醫生資格試又咁難。作為一個好關心社會既普通市民，我有時會諗，如果有議員提出一個議案，係改革醫委會，再由醫委會改革個醫生資格試，咁就解決到個問題啦，當然，呢個唔係咩方向性既建議，哈，只係朋友間傾吓計，你明白架可，張議員。」
面對歐騰華的目光，張予仁腦中慢慢浮現出一個很龐大而隱蔽的計劃。他知道，如果他答應歐騰華的要求，他日他很有可能陷入一個被追究的境地，但是，在高鐵、領匯這些事件裡，又有哪個真的被清算了？就算被追究，也沒有甚麼事吧？
歐騰華見張予仁有點猶疑，於是向方歷山打了個眼色。
「張議員，我保證，醫委會改革之後，你個女一定返到黎，到時候想去瑪麗定係威院，或者任何一間私家醫院，甚至自己開鋪，都完全無問題，我一定全力支持。」方歷山說。
的確，他們的建議對張予仁來說很具誘惑，但他擔心的是，他怎樣向他的黨友交代，而且，他又不是醫學界，提出這樣一個醫委會改革議案，怎樣爭取支持？難度要他逐家逐戶，逐個醫生去拍門？
「我怕呢個議案唔會通過，同埋，我點向我啲黨友交代？」
「或者咁講，其實我地今晚同你一個人傾，就係唔想你既黨友知道呢件事，至於爭取支持方面，你唔需要擔心，呢方面政府我地會安排，你只係需要提呢個議案就得，而且，楊特首會記住你今次幫手，你係一個明白人，應該理解我講咩。」
飯局過後，歐騰華和方歷山的說話一直在張予仁的腦海中重複，直到他身在外地的女兒來電。
「喂，乖女，你點啊？哎，係個醫生資格試唔好，唔係你問題，放心啦，Daddy一定幫你搞掂，係，信Daddy啦，幾時有呃過你。嗱，Daddy同你保證，兩年之內，瑪麗定係威院，任何一間香港醫院，你中意邊間就揀邊間。」
一個星期之後，立法會議員張予仁提出醫委會改革議案，但令人不解的是，作為飲食界議員的他，為甚麼要提一個醫學界議案？而且連他的黨友，也不知道他要提這樣的一個議案，但最耐人尋味的是，他的議案很快就被政府吸納，並在僅僅四個月的短暫諮詢後，就提交立法會審議，整件事發生的速度，彷彿一切早已經安排好一樣。
［２０１６年４月］
在醫委會內部會議上，兩個委員爆發激烈的衝突。
「方歷山我屌你老母！」盡管已經六十七歲，但醫委會委員，名醫蔡鏗有火，「總之你話引入大陸醫生，我唔同意！」
與蔡鏗在會上打對台的，是方歷山。
「阿鏗，無人話要引入大陸醫生，我地只係想改革醫委會，你知架，依家啲人，病人組織，輿論打手，個個一有咩醫療事故就鬧我地，醫委會好大壓力架，唔改革，點回應啊。況且我地只係想加多幾個委員，多啲人去做醫療事故審核姐，無人話要郁醫生資格，你唔好咁萌塞。」
「我同你講，你唔好同我玩呢套！加人做審核只係藉口，你只不過係想引入你啲大陸同鄉咋嘛，唔好以為我唔知，當年既事，你一直記到今時今日！」
「阿鏗，我無諗過你會係咁personal，我地今日坐得係度，係為咗做啲建設性既野，唔係俾你發脾氣或者人身攻擊，如果你再係咁，我諗我要以會議主席既身份要求你出去。」
「攞職權黎撻我？好啊，拎埋你個北京政協出黎！」
「阿鏗，我唔怕同你講，改革議案已經獲得政府支持，呢件事勢在必行，你同唔同意都好，都唔會有影響，我尊重你先同你討論，你要記住，當日你都有份投票俾楊振英，今日呢個改革，亦係你都有份造成。」
「我當日投俾佢，係一個錯誤，今日，我就要親手改正呢個錯誤。」
「好啊，我又想睇吓你做得啲咩。」
就在會議的前一天晚上，當蔡鏗在細看醫委會改革議案的文件時，他收到一通來自一個他不怎麼喜歡的人的電話――「阿鏗，Louis史啊，唔好收線住，我知我地有好多分歧，但我想提醒吓你，今次醫委會改革，唔係咁簡單，背後一定有政府既人支持，我收到風，佢地想引入大陸醫生，你要小心啲楊震英呢個人。」
離開會議後，蔡鏗遇到了一個年青人。
「蔡醫生，你好，我叫王任康，係青年醫生組織既代表。」
「唔得閒去做講座，呢排好忙。」蔡鏗沒有因為那個年青人的說話而停下來，因為他有更緊要的事去做，但那個年青人卻不放棄。
「蔡醫生你係咪打算組織反醫委會改革？如果係，我諗我可以幫到手。」
聽到這句說話，蔡鏗停下腳步，看著他眼前的這個年輕人。
「你諗清楚未啊後生仔，依家係打仗，唔係講玩，唔係大學辯論，加入咗，你呢世就無運行，準備成世痞係門診部都得。」
年輕人的眼神很堅定，說：「蔡醫生，我地準備好架啦。」
［２０１６年４月］
在特首辦公室內，楊振英滿面愁容地迎接他的下屬，食物及衛生局局長高詠文，以及政務司司長林月娥。
「我好唔中意依家呢個社會將所有事都變得好政治化，例如今次醫委會改革，輿論係度係咁打稻草人，又話政府干預專業，又話引入中國醫生，我諗你地都知道呢啲指導係好無稽。」
司長林月娥首先發言：「的而且確係，我建議可以由高局長去主導向公眾解釋議案爭取支持，我會係行政上盡量配合佢。」
楊振英點一點頭，說：「我都同意呢個方法，局長你點睇？」
「呢件事對病人同醫療界都係好事，我無理由拒絕。」
［２０１６年４月］
在辦公室的歐騰華接到來自方歷山的電話，在電話裡頭，方歷山告訴他，醫委會方面一切順利，只是有個小問題。
「只係蔡鏗唔係幾聽話，不過我諗佢一個人唔搞得出啲咩既。」
歐騰華聽罷，說：「唔怕一萬，至怕萬一，好在我一早同病人組織果邊溝通咗，佢地會全力支持議案，佢地仲搵咗張立基夫婦，即係幾年前因為醫療事故個仔死咗既果個歌手呢，多一手，永遠都無壞。」
但電話裡的方歷山似乎還有個疑問，「咁之前特首先生應承過我既事――」
「你放心，到時候中港醫療聯網會由你作為香港主導，日後聯網成立，你就順利成章成為香港代表，況且我諗修改醫生資格試之後，一定會有好多中國醫生希望黎香港執業，我諗佢地唔介意俾少少錢去學習一下香港既醫療方法，而我諗你係一個好適合既人才去教導佢地。」
「怕唔怕啲人話利益輸送啊？」
「利益輸送？方醫生，你知唔知政府一年開支係幾多？樣樣都輸送，啲人理得幾多啊？不過我要提醒你，呢一切要係楊先生嬴到第二任任期先可以實現，而我好希望你可以爭取整個醫療界支持楊先生連任。」
［２０１６年６月］
立法會議事堂內，醫學界議員梁嘉留已經拉布兩天，惹來不單是建制派，甚至是泛民裡部份人的不滿。
「從條文上睇，我睇唔到反對既理由，Alvin不如講吓你既睇法？」說話的是議員楊家傑，他剛剛在二讀投下了贊成票，但似乎他的黨友意見並不一致。
「我咁睇啦，」梁岳橋一邊細讀議案條文，一邊在案頭上摘下重點，「如果單純係議案本身，再加上郭醫生既修正案，其實係可以達到改革既效果，至於引入中國醫生，好似傑哥所講，根本唔包含係今次議案，我諗大家對於政府提出既野太敏感，連議案細節都未有睇清楚。」
「聽到啦，毛議員，唔係我一個人咁講，我地律師黎架，做野講邏輯，講證據，唔係吓吓就陰謀論，或者你以前做記者既習慣係咁，但sorry呢度係議事堂，唔係維園，唔係話邊個聲大就嬴。」
在立法會門外，歌手張立基夫婦正在接受記者訪問。談到當年兒子的醫療意外，兩人直到今天都不能釋懷，至於一旁的高詠文，連日來聽到病人組織以及現在身旁張立基夫婦的發言，感到無比愧疚。
盡管不遠處是一大群反對議案的醫生和醫科學生，當中甚至有很多是他多年的朋友，包括站在另一方人群之中，自己到今日仍然無比尊重的師兄蔡鏗，但高局長告訴自己，但為了病人，為了做正確的事，他義不容辭，甚至要他背負眾多的罵名，他也絕不退讓。
而在立法會大樓上，政府辦公室的高處，特首楊震英冷眼看著樓下一大眾形如螻蟻的反對人士，在他身旁的副手歐騰華。
「呢場仗我地嬴硬，係時候諗吓下一步。你覺得，如果下一個目標定係法律界，你點睇。」
「法律界一直係我地既死對頭，我諗唔係咁容易。」
「阿歐，無野係無可能，只係視乎你有無決心。」
完
內容純屬杜撰
#堂前燕小說
瑪麗醫院專科門診大樓 在 [Vy. Unique PA!] 薄扶林瑪麗醫院專科門診大樓S座奧的斯OTIS ... 的必吃
地址：西高山薄扶林道102號投入服務年份：2001 載重客量：1800 KG 24 Persons 途經樓層：G/F, 1-8/F 此樓層廣播款式(相信是前英國通用電氣GEC電梯公司 ... ... <看更多>