新年快樂，祝戰友們在新的一年身體健康，生活愉快，咁先會在投資路上有力繼續提升自己，贏到開巷。
一直都想寫個回顧，不過年尾放長假，搞到個人都懶咗，終於在昨晚的起心肝，開始動筆。寫市場回顧，難免行貨，所以決定集中在青冰的投資回顧，寫完都一定於己有益。
在2020年要贏錢，實在唔難，尤其愈近年尾市況愈癲，個別股份不一定要有重大利好消息，都可以飛天，單月升幾倍的股也不少，股民肯定如痴如醉。青冰今年的表現只算一般，跑唔贏納指，但都贏到滬深300指數，相信跑贏納指的戰友大有人在，青冰對自己成績，尚算滿意啦，在一個咁動盪的環球疫情市況下，感覺自己學到嘢又有進步，夫復何求，尤其是美股帶頭急瀉的三月股災後，青冰曾私下同戰友分享，話今年終於中止十連(年)勝了，當日諗都無諗過，咁嘅情況下竟在五月重返水面，之後keep住個勢頭順利帶返終點，所以都係個句，夫復何求。
去年能迅速離開谷底，實拜新股浪潮所致，新股去到下半年，已經發展到人人會抽，去到螞蟻時，已經係人人都孖，雖然有好幾次，都係熱爆新股卻穿底，但去到尾年一隻京東健康(6618)，帶返起個新股熱，之後再來一隻泡泡瑪特(9992)，股民好快又唔記得之前的傷痛。執筆之時正有十隻新股招股，1月15日同時有5隻股上市，而上半年仲有唔少勁的科技股嚟上市，睇嚟新股熱仍會持續。講返離開谷底，就全靠諾誠健華(9969)幫到手，這個B仔生於三月股災，佢上市前一星期，道指跌三千又升返一千，再跌千三，熔斷熔到痴晒線，但諾誠健華上市首天都冇穿底，誠意可嘉，青冰仲記得當日見佢咁勁，上市頭幾日仲加注，結果不負所望呀，為日後全力抽B仔打下強心針，隨後的康方生物(9926)及沛嘉醫療(9996)都有不錯表現，帶返青冰上水面，算係全年的轉捩點。至於新股的心得，其實青冰在專頁已講過好多次，不贅了。
贏得最多的個股，是圓通速遞國際(6123)，講真青冰都未試過有一隻持股，會在短短兩天升五倍，坦白講，這些都是時來運到，有內地資金狂炒，才會有如此盛況。在此事之後，青冰都有寫過賽後分析，講到人哋圓通母公司派來的董事局成員，都在那幾天沽貨，可想而知甚麼注資應該未有耐啦，青冰亦話短期內不會再提此股，四個月後的今天，股價仍在浮沉呢。戰友PM時常說，希望青冰再搵隻圓通速遞國際2.0啦，青冰也笑說希望啦，但真心話係，搵隻好股識升幾成的未必難，但要短時間內升幾倍，恕青冰無能為力了，難道你想青冰推五菱汽車(0305)這些亂炒之股咩。
去年叻豬的事只有新股及圓通兩單，其他的都不是太特出，唔詳細講了，至於蠢豬的事，實在要查找不足，大書特書，為免篇幅太長，決定分開兩集講，下集就留返‧‧‧明天講啦。
