😂😂😂😂😂😂
好吧，既然有讀者接二連三跑來找我問有關疫苗的看法（呃… 其實找我也沒什麼用，畢竟我又不是醫生）那我也動筆寫一下吧。
很老實說，我對於香港這個會相信「擴輻射鹽焗雞」、「放仙人掌在電腦前吸輻射」、「船公司打風消息」、「用 #噴噴 醫濕疹」、「鑽石能量水」此等只要有「專家」跑出來說，就信到十足的奇蹟城市，竟然倒頭來唔信醫生，真的令我哭笑不得。
首先，有人質疑疫苗效用，有人話效用係一成，有人話一半一半，總之，就係話疫苗無效。咦？乜突然間又咁清醒嘅？市面上啲健康產品，由維他命到乜乜補骨補眼補肝丸，無一樣有實質醫學證明有1%的功效預防疾病，大家咪又係照買照樣「Keep住食，藥箱都變首飾箱」？食療以形補形，又有幾多成功效？去到日常生活，啲美容產品、咩黃金精華、納米補濕難道又有經過嚴格的醫學化驗嗎？你咪又係諗都唔諗直接抹在人體最大的器官---皮膚之上？依家有隻疫苗，衰極都有一成用嘅，反而被人質疑佢有冇用，呢個反智到近乎弱智的邏輯都真係世界級。
然而，又有人話打疫苗會有機會導致病毒洗牌，到時出現超級病毒更難醫。嘩，乜大家幾時變得咁大愛？一副我不入地獄誰入地獄的樣子？你地班友仔咁驚病毒洗牌，就唔好成日迫醫生開抗生素啦。上年香港公立醫院感染金黃葡萄球菌病人當中，有五成係耐藥性惡菌，比美國高出左五倍，撇除葉劉呢個人型病原體長期駐港的因素，茅頭直指濫用抗生素。唔打疫苗驚引起病毒洗牌呢句說話由佢地的口中講出黎，份外有喜感。
最後，有人話疫苗純粹係藥廠同政府呃大家錢的騙局，然後話藥廠點樣同政府勾結云云。好啦，我當佢地真係勾結啦好冇？你有冇諗過其實唔打疫苗，然後病左，到最尾你咪又係要買藥，咁啲藥其實都係藥廠出，你一樣要幫襯藥廠。無錯，枝針無論你打定唔打，你買大定買細，藥廠都係食硬你嘅。黎到呢度總會有些天線寶寶想到：咁唔買藥，我買維多C之類的增強抵抗力，咪唔會病囉。親愛的，維多C係Bayer藥廠的出品、康鈣Ｃ係GSK藥廠的，而善存就係Pfizer，啲錢繞一個圈都係去返藥廠度，圍骰通殺呀！而你又再諗下，一枝疫苗的利潤高一點，還是那些保健產品的利潤高一點？如果真係藥廠利益最大化，唔應該推疫苗吧？
你可以話藥廠如何邪惡，亦都可以話醫生如何垃圾，更加可以話政府如何腐敗。但是，請你看一下在1796年第一次天花疫苗面世後，人類平均壽命延長了多少，多少原來致命的疾病都在大家生活裡消失了，難道這一切不是藥廠、醫生和政府的共同努力成果嗎？這麼基本的事實卻沒看到，難道這是孟德拉效應嗎？人會說謊，但歷史不會。你可以不相信別人的說話，你甚至可以不相信事實，這是你個人的自由，總之中左招唔好喊、唔好傳染俾我就可以了。
#最鍾意話食咩健康的人通常都係最易病
#平時狂隊維他命同乜乜素嗰啲呀
#永遠係第一個冧
永遠係第一個冧 在 14m23d…紫柔妹畢業了 ... - 紫柔Hailey & 紫晴Hera | Facebook 的必吃
紫柔妹畢業了 由4個月大開始，就帶呢個小B黎游水… ... 同埋最後洗白白環節永遠係佢最乖最定最冧豬最享受嘅時候~... ... 可能係第一個想擒缸逃走嘅BB ♀️ ... <看更多>