［一萬蚊點洗好？］唔止畀個冧把你咁膚淺啦
1. 金融角度講下，但又其實唔係金融角度。你以為我叫你用咗佢，其實係教你投資。但你以為畀冧把，其實我教你投資落自己度。
2. TLDR：洗三千儲七千，差不多了。三千蚊你可以去次澳門，或者本地嘅可以去次半島或美利，女伴／男伴請自備。剩返七千銀？拎去訂嘢。當然如果你懶嘅，就拎嚟贊助埃汾寫文吧。當你買隻股票升十倍都好，但一萬變十萬，應該對你生活質素冇乜影響。但改變你個人，就改變到你生活質素。
3. 首先，一萬蚊，「其實好少錢」。當然我唔係講「唔係錢」嗰種「好少錢」，任何人講乜乜乜唔係錢唔care，例如好多人話當份強積金冇咗，當係零唔會指望，我都叫佢成份畀晒我，最多我請佢食餐飯。但的確，喂，一萬蚊，香港最低工資（開足工的話）都唔止。係錢，但唔值得你花幾個鐘去研究點用（＊）。當然了，人總有好多bias，你我都係，無數咁多人都係爭一千幾百嘅嘢搞成晚，但一千萬買層樓就樓都唔睇，幾十萬去買股票都係諗都冇諗。
4. 好啦。你以為我會叫你買股票，畀隻冧把你。但現實係，唏。「一萬蚊真係唔係咩錢」。都唔好講香港啲股票一手手咁買，我就當任你買。面對現實啦，你買嘅股票最多升過幾多倍？我畀你升十倍，一萬變十萬，已經勁過股神，但十萬未夠你退休下話？
5. 至於其他資產，更不用諗，香港地尺金寸土，一皮嘢買一尺屯門都未夠，買電單車位首期都未夠。反而另類資產可以諗下，買紅酒買金幣應該好啲。但一樣，畀你升十倍好未？係好勁，但我當你超級，聽日就一皮變十皮，你嘅生活都冇可能有任何改善（除非你負資產爭人幾皮嘢卡數準備畀人賣落火坑）。
6. 所以，諗啲可持續啲嘅嘢。就係，投資自己！
7. 或者直接啲講，如果我係你，我會點洗。適用於四十歲以下（我唔係啦，所以先要如果）
8. 首先，錢嘅嘢，一係投資，一係洗（射落海都係洗嘅一種）。在好多定義下，開支就只係消費同投資。儲起佢固然亦係投資，你去買樓都係投資。另一種當然係消費，你去捐咗佢係消費，你去食咗佢都係消費。
9. 叫你儲晒佢，應該不切實際。雖然個個都識食棉花糖（https://fbook.cc/3BcQ）。但，唏，人生苦短嘛。係架，投資咪就係he牲今日嘅享樂換更多回報。今日我唔食百人一朱，留返啲錢第時去食小野二郎。好似係咁。
10. 之但係，又要及時行樂嘛。傳統智慧話遲下食棉花糖先有多兩粒（https://fbook.cc/3BcQ），但，我點知你個大人會唔會守信？What if 你反口？今日唔食百人一朱等十年後食小野二郎，What if 聽日我死咗？或者佢死咗？
11. 所以，咪講咁多，唔好信專家。有錢用咗先—但唔好用晒。你見我寫文就好似好激進，但真係做嘢，同叫人做嘢，都係講中庸之道。用三千，儲七千啦下
12. 三千蚊可以做乜？可以做好多嘢。例如夠你解封後去次澳門（食杏仁餅咋，唔通諗住食西洋菜？）。慳慳地嘅，去次台灣小確幸都得。聽聞啲友去次韓國日本都仲話得，咁高難度嘅嘢，大家唔好試。
13. 留港消費嘅，建議你可以去住半島（https://fbook.cc/3BcS），或者美利酒店（https://fbook.cc/3BcT）。兩間都係三千有找，不過女伴／男伴就自費項目。但放心，有半島有美利，自然有女伴／男伴。冇嘅？就睇埋落去
14. 好啦，戲肉，剩返七千蚊，講投資。「其實應該叫你一皮嘢拎晒去訂埃汾收費專欄同影片」。不過認真。
15. 訂一年嘅Financial Times，應該二千幾。再訂埋Economist，應該差不多三千。你剩返兩千銀左右。我係你會訂Bloomberg News。咁你啲錢應該冇晒。仲有剩嘅，揀埋其他啲local東西咯（不開名了）。
16. 當然，其實呢，同gym membership一樣，最大問題係，有時你訂咗都冇時間睇。雖然應該好啲，做gym你要行落街 你要起身 你要流汗，newsletter送到你email，坐車睇又得，等人睇又得，做完愛睇又得（你唔係做緊睇咁無良下話？尊重下新聞工作者好喎！）。
17. 真係咁懶嘅，咁所以，不如都係訂晒埃汾嘅收費短片（已有）同收費專欄（就快復出）。好在乜？好在好似讀者文摘咁，幫你消化埋揀埋。咁就當然冇原汁原味咁正，但現代人忙嘛。埃汾有睇嘢快寫嘢快嘅天份（其實都靠後天，主要同我ICQ溝女有關），就應該好好發揮。
18. 以前啲人話， Those who don't read, read Reader's Digest。唔睇書嘅文盲，咪睇讀者文摘。然後而家就變成睇讀者文摘嗰啲已經係老學究，所以人類文明真係不停倒退。同時地，埃汾啲三四千字文已經畀人話超長文，咁所以你點會得閒睇人地啲咩Big Read, Special Report？
19. 你話，投資呢？買股呢？唏，幾時都做架啦，唔係等政府畀一皮嘢你你先買下話？咁即係下年唔畀你你就唔買？咁死得人架喎。
20. 至於，喂，股票冧把呢？畀咗啦，成日專欄同文章都講的。包埋架啦
21. 呀，如果，好忍得，唔食棉花糖嘅，一萬蚊全部自我增值嘅，咁很好。即係你仲多三千，就拎去買晒埃汾個書單上啲書吧。應該唔夠，但你一年睇得晒先講—可能下年又派呢。唔知咩書單嘅，睇舊文（https://fbook.cc/3Bcg）。照舊，你可以PM我問我拎，完全免費，不過就當然預我第時有新嘢會PM你賣廣告了
22. 呀仲有，真係，先知就係早你知少少。天地良心，昨晚兩點我就已經收到嗰一萬蚊，貼埋上自己Facebook．因為我有耐唔耐就碌一碌個戶口嘅習慣，睇下公司會唔會獎勵我工作出色醒返一千幾百萬畀我，暫時都未發生，但好似支爆咁，今年唔爆下年爆，下年唔爆再下年實爆。
23. 想講，個個朝早係咁F5（我知唔使F5），而我昨晚其實至可以拎埋舊錢去買股票，「今日就已經又執你1000點」（＊＊）。快人一步，幾咁重要！等於搞台灣單嘢咁，而家又改例了。
24. 有冇諗過呢個世界上點解有「利息」？就算嗰個人一定會還都有利息，就算冇通脹都會有利息。就係因為，手快有，手慢冇。早買早享受，遲買貴幾舊。（遲買貴幾舊咪通脹咯！）
25. 講明，本文冇收取任何廣告費或其他招待。酒店，媒體，通通都冇。
（＊）咁點解我又花半粒鐘打篇文教你點用？就因為我個人好咯。或者係，因為我從中得到好多快感。當然，亦都係我搵更多錢嘅一部份。
（＊＊）稍有常識嘅都知唔係咁計。但今日個玩法，真係開市入去追都執800點。但邊有早知。
——————————————————————————————
收費短片第二擊，暫時斷次買。80蚊，講足半個鐘，有圖有表有筆記。
都係一周思考課題，當然唔會就咁報新聞呃錢，係講有乜啟示。
影片簡介：https://bit.ly/2ZILRwf
或者睇置頂 post都得：https://fbook.cc/3BRq
講銀行加按息係咪睇淡樓市，美股有冇泡沫，奧地利發100年債券有乜啟示。
仲講樓，講埋Growth vs Value．
以下係報名方法：
【最新李聲揚收費影片】股市係咪真係太貴? 要買究竟邊隻係抵?
*影片下方會有內容撮要，唔想睇片可以睇字
影片/課程編號：CC003
播放平台：https://homebloggerhk.com/web-class-player/
付款及收看步驟：
1/點擊報名收看 [ 影片/課程編號：CC003 ]
2/利用信用卡網上付款
3/及後有登入資料可以立即收看
查詢：whatsapp 63832145
