The Night Watch
下集~
發光小妹妹係邊個?
The Night Watch唔係發生喺夜晚?
5月2日
《是日雜作》
(接5月1日)
喺阿姆斯特丹嘅國立博物館Rijksmuseum於1885年落成，2003年開始關閉「大裝修」，上個月開幕。開幕嘅其中一個宣傳，係喺商場度，搵班演員重演佢哋鎮館之寶－名畫林布蘭《夜巡》嘅畫面。呢幅畫，由一開館已經擺咗係一個重要嘅位置，亦係大裝修入面，唯一留喺原位展出嘅藝術品。關於《夜巡》嘅三條問題同答案，尋日講咗一條，今日仲有兩條。繼續講吓呢幅1642年，描繪警衛隊出發巡邏之前景象嘅畫。
2.畫面入面有個小朋友，邊個嚟㗎？
《夜巡》都係一幅被人話佢隱藏咗好多秘密嘅畫，畫入面嘅神秘小女孩就係其中一項令人奇怪嘅嘢，畫入面一班男人警衛隊整裝待發，做乜無端端有個妹妹喺度㗎？有人話佢係小妖，有人話佢係路過小妹妹，有人估佢象徵林布蘭老婆，有人估係警衛隊隊長個女，無確實嘅答案。
3.咁黑嘅幅畫？
《夜巡》入面，除咗隊長同副官好似有spot light照住，神秘小女孩似自己識發光，其他位都比較暗，咁樣採用光線，當然係林布蘭嘅選擇。有樣幾得意嘅嘢就係，雖然幅畫黑黑暗暗，個名又叫《The Night Watch》但佢畫緊嘅，係日間。慶祝法王亨利四世的遺孀瑪麗．德．梅迪西斯訪問阿姆斯特丹，警衛隊出巡嘅場面，《夜巡》呢個名，其實係改錯咗，一個啱啲嘅名，可以叫佢做《The Company of captain Frans Banning Cocq and lieutenant Willem van Ruytenburch preparing to march out》好長，所以大家最尾都係叫返佢做《The Night Watch》。1940年代之前，幅畫仲有一層深色光油令佢更黑，但之後就清除咗喇！
有人話，如果話無睇過《蒙娜麗莎》就等於無去過巴黎，咁無睇過《夜巡》就等於無去到過阿姆斯特丹。（即係咁講）
想知更多，可以搵埋林布蘭其他作品同佢嘅生平嚟睇，亦有電影直情叫做《夜巡林布蘭》，我推介睇BBC《Private life of a Masterpiece》。
