【老婆/女友唔比踢波原因】
踢波，係男人最鐘意嘅運動之一。但係當有女友/老婆，甚至有埋小朋友，踢波就變得難能可貴。要提早拎permit之餘，甚至迫住早起身黎個 Sunday Morning Football。今次同大家講下5個唔比踢波嘅原因。
事原版主星期晚喺蒲崗村友賽，著左龍門短褲，長波襪。做足應有預防措施。結果一個單刀急停落地，波就失左。結果一膝頭爆血，踢完場波女友就少少🤬
突然間就諗到另一半唔鐘意佢地嘅男人踢波嘅原因
1️⃣成日周身傷
呢個係一個好重要嘅原因，嚴重起上黎比限聚令更嚴格嘅「禁賽令」。踢波係一個有對抗嘅運動，好多時擦傷，拉傷，扭傷間唔中就有。男士當然唔當係咩一回事，仲覺得呢啲傷證明自己付出嘅努力記錄。但當出現嚴重受傷，例如斷手斷腳，斷十字韌帶等等嘅大傷，另一半就特別緊張，直接表缺下達「禁賽令」，而作為男人迫不得已離開綠茵場，從此掛靴。
2️⃣冇時照顧頭家
如果作為一隻「波牛」一個星期三四場係必定會有，特別踢多幾隊，有時臨時搵腳夾人數，一個星期踢5日絕對唔出奇。另一半會投訴唔陪佢，寧願坐喺屋企on99，冇嘢做，都唔會出去享受自由嘅空氣。唯有迫住踢少啲，甚至踢完波食個宵夜都會摧你幾時番。潛台詞係幾時番屋企陪我。
3️⃣一班男人一齊好危險
部分比較偏激嘅另一半總會覺得一班男人去踢波係一個藉口黎。總會覺得踢完去玩邪骨，過大海。可能睇得「飛虎出征」或者「向西聞記」睇到上左腦。其實就係踢完波，一班男人搵間野食。飲下啤酒，講下波經。咁就開心番屋企。呢種聚會就好似啲姊妹一齊去做瑜伽，做facial咁簡單，咁純潔。
4️⃣生左個小朋友
初為人父嘅「足球員」因為小朋友岩岩出世，要照顧老婆同個B，好多時出現有波踢唔到。老婆岩岩生完係最需要陪伴，而且要餵奶換尿片。基本上都冇咩時間，假如冇奶奶或者父母照顧，基本上都冇機會出去踢波。直到個B戒左奶，3歲先可以重新回到球場。可能個男人想踢波，但被迫放下呢個念頭。
5️⃣足球裝備浪費金錢
呢個相對係少啲發生，波衫褲鞋襪係基本野。但加加埋埋都幾貴。買對頂級袋鼠皮波boot都過千，身為家中財務大臣見到一定問價錢。甚至買左要偷運入境。以防被查封。情況就係「男人玩高達，女人唔明白」嘅道理如出一轍。賣左咁耐手套，間唔中都聽到啲客有難言之隱，對鞋未必係貴，但老婆覺得貴唔比買。之後解決提出問題嘅人，咁咪唔比踢。
其實自從球場重開之後，呢啲情況真係少左聽到。因為封左咁耐，唔好話踢波，出去食個飯都難。而女人少聽到「踢波」呢兩個字，戒心就自然低。到球場重開就好似申請左「回港易」，輕鬆出閘過關。咁當然又唔係個個老婆都咁難處理。遇著另一半開明，都知道男人番工辛苦，想比個地方佢地開心享受鐘意做嘅事。
踢波，洗嘅係有限錢。買個名牌手袋都唔知可以買幾多對袋鼠皮波boot。而男士珍惜享受男人嘅浪漫同時，記得要有交帶。即使食個飯都要報，令到信任度增加。當然唔好有啲咩不良記錄，即使之後只係踢波，對方一先入為主就麻煩，明明踢波都當你去滾。而因受傷唔比踢嘅朋友，踢波要做足保護，做足熱身。同埋30歲以上就唔好咁博命，唔傷就冇藉口去入你。最緊要平平安安番到屋企比佢見到，仲要冇穿冇爛冇受傷。咁就可以踢得耐啲。
最後，難得球場重開，都希望另一半可以比地鐘意踢波嘅男士出去開心下，結終都封左兩個月場。就算想踢都踢唔到。而唔知會唔會又搞出啲咩群組又自爆。結果又再封。咁不如放佢出去玩下。反正番唔到大陸，又過唔到大海。踢場波姐，比佢開心下，相信男士都會識做嘅🤣
#踢波係好難得
