响英國重未悶死系列 （5） 唔係中產Supermarket
唔知點解，好多香港人都鐘意比較英國唔同嘅Supermarket，稱呼某啲叫中產或者高級，又有啲叫劣食。老實講，响我眼中，食材只有新鮮與唔新鮮之分，而亦只要煮得好唔好食之分。如果係因為價錢、門面或者裝潢而分別食材同店鋪嘅等級，咁結果又係用眼而唔係用口食嘢。
香港中產，至少响我身邊嘅，近年有好多都因為唔同嘅原因，喜歡去有「中產味」嘅超級市場。例如City-Sxxper，Three Sixxy或者Marxxt Place等等🤔。
我聽過嘅原因包括係因為嗰啲食物新鮮啲，不過我想知嘅係究竟有幾多人知道乜嘢叫做新鮮呢？我相信香港嘅街市賣嘅食物，新鮮過任何超級市場好多，問題只係有幾多人肯去咁解😋。
亦有啲人會話嗰啲中產超市多啲organic嘅食材賣。首先，我想知香港有幾多人了解過，香港甚至歐美對organic food嘅定義同認証呢？其實我都唔知，我只係知道我本人就未見過organic嘅食材會咁「青靚白淨」。而且買organic food除咗係為咗健康之外，亦有一個原因係環保。我深信無幾多個香港中產去買所謂新鮮嘅外國organic food嘅時候，會諗下佢地究竟買咗幾多飛機汽油同製造咗幾多交通污染😢。
由我廿幾年前讀書之後，到我現在生活响英國，我最唔滿意嘅其中一樣嘢就係英國無咗好多真正嘅街市（Market）😰。我諗廿幾年間英國嘅街市的確係比Super Market取代咗。
既然無咗真正嘅街市，我嘅選擇就只有兩個要求，第一就係新鮮，第二就係價錢。我唔會覺得去M&S或者Waitrose高級咗，同時亦唔會因為去Aldi或者Tesco而低級啲。Organic與否更加唔關事，因為我如果要買organic food，我會直接去organic farm買🐄。
關於organic food，英國無論乜嘢supermarket都有organic嘅嘢。只係我覺得多到我開始有啲唔相信。如果大家對organic food有興趣，可以自己上網睇睇個定義，我嘅感覺就係越黎越闊，好商業。我地都有去過真正嘅英國organic farm，大概了解過啲運作。了解完，真係唔係好信點解個世界可以忽然間可以咁多organic food😅。
响英國，去唔同嘅Supermarket對我一家人係一個節目黎，原因係唔同唔嘅品牌會有唔同嘅特色。有主力係大眾化嘅，又有係買高級啲嘅食材嘅（真係高級，而唔係價錢mark高啲）。對於食材同日用品嘅價錢嘅敏感度，我兩公婆係最快融入英國嘅生活。唔好話我cheap，買嘢唔等減價，或者唔格價，就唔係英國人啦🤣。減價買嘢唔只因為係慳錢，而真係英國人生活嘅一部份。
所以去唔同嘅supermarket，係可以係一個星期裡面一兩日嘅活動。其實一家三口去買餸，有人可以覺得好悶，好日常。但係我就覺得可以好溫馨，好有樂趣。就係諗下講下每樣嘢點煮，都可以好有趣味😘。
對我黎講，食材係要煮嘅，所以食材新鮮與否，同埋煮法是否得宜先係最重要。如果去supermarket都要shopping嘅自我感覺良好，我提議可以留番去買衫嗰時先講shopping experience。另外，我希望大家如果响香港，可以的話就多去街市小去超市。因為最終有一日，街市係會消失嘅。 而香港嘅街市就係我小有會記掛嘅地方，因為實在係好多嘢睇同買👍。
#supermarket邊有高唔高級 #最好就係有街市 #世界上點解咁多organic #去supermarket都可以係節目
*****************************
响英國重未悶死系列 (1) 薰衣草田
http://bit.ly/2vQJScC
响英國重未悶死系列 (2) 又黎薰衣草田
http://bit.ly/2vQu09U
响英國重未悶死系列 (3) 英國放狗
http://bit.ly/2vPMZAS
响英國重未悶死系列 (4) Vintage Car Show
http://bit.ly/2v39RNU
*****************************
