【功能組別搶灘】
—————————————————————————————
【一、進攻功能組別同國際線有無衝突架？】
近日網上流傳一種說法，話搶攻功能組別係浪費時間，因為喺《香港人權民主法案》通過後，只要美國出手制裁官員，北京就會讓步應承五大訴求；反而呢，參選功能組別只會比錯誤訊息國際社會，搞到美國唔能夠嚴懲香港黑警，甚至話美國會制裁參選功能組別嘅政治人物。
有關幾星期後促成制裁既成數，大家可以參考返我喺記者會既發言（ https://www.facebook.com/joshuawongchifung/videos/1029607370758307 ），但簡單來講呢，近排形勢都唔多有利美國關注香港，尤其係武漢肺炎喺西方國家肆虐、新聞輿論聚焦總統初選、環球經濟持續下行。面對唔同既不利好因素，華盛頓手足都有同我提到，期盼兩、三星期後美國可立即落實，當今都唔算好樂觀；而到底民主派參加唔民主既特首選舉同埋功能組別立法會選舉，會唔會成為阻礙美國制裁既因素？據我訪問華府多次經驗，不論公開定私下交流，自己都從當無聽聞任何美國官員、國會議員和幕僚就呢樣野作出過批評。
當然，如果大家覺得選功能組別係萬惡既話，都仍然可以用自己既方法同外國解釋，但實情係，不論三十幾年前從「新九組」晉身議會既國際線元祖級前輩李柱銘，定係從屬功能組別既涂謹申、郭榮鏗、梁繼昌，都係當今與美方關系要好既政界中人；而唔理大家同唔同意啦，甚或過去我都會有些少保留，但實際經驗觀察得問，普遍美國政壇理解香港形勢，有時都離唔開抱著良好意願，寄望民主派透過爭取越多數既議席，從港美關系穩定的角度出發，一定係寄望制度改革多於街頭抗爭既不確定性，從而促成「量變帶來質變」（都解釋左點解美方曾低調表態支持2010年的政改方案）。
固然美方評估「香港自治狀況」，必須考慮現行選舉的民主程度，但制裁與否還是更更更取決於美國政界對港抗爭的關注、警暴升級程度、美中貿易談判等一系列因素，特意作此解說，純粹是評估目前港美關系互動，我個人實在看不到民主派有意搶攻功能組別，會成為美國不制裁的原因，有關參選功能組別有何戰略意義，值得往後跟大家討論，甚至都明點解有手足覺得選功能組別無乜作用；但只想強調，搶攻功能組別真係唔會成為國際戰線推動制裁嘅絆腳石。
—————————————————————————————
【二、即使進攻功能組別無礙國際線，參選功能組別有乜意義？】
打散建制資源當然係首要目標。我地想谷功能組別選民登記時，駱惠寧同樣都會動員親中團體做新登記、例如透過勞工界拆分會增加票數，甚至「種票」，又唔好唔記得各項專才人口換血計劃，動員內地來港住滿七年既專業人士成為傳統功能界別的選民。對我來講，攻功能組別策略係想打散建制原有鐵票，迫建制再分多啲資源打功能組別選戰，其實同上年區選的白區運動有啲似。佢愈忙愈分身不瑕，對我地愈有利，而反正無拉國際戰線後腿既疑慮。
議席呢家野，多一席總比少一席好，如果拎得返，起碼果一席嘅議員唔再向北京負責，而係向返香港人交代。至於打散建制資源可以講多少少，查實即係功能組別，候選人都要走訪商會同埋團體爭取支持；過去每屆選舉有好多界別都因為無競爭，建制派候選人唔需要組織競選團隊搞拜票宣傳，選舉論壇都唔洗去就已經輕鬆過關。但試諗下如果建制派要由中聯辦協調要出多幾隊，洗多啲錢去箍票，甚至要同民主派候選人競爭，戰線分散咗，駱主任又再忙啲。
香港人不斷從運動學習，例如我地唔會再因為件事好難或條件好差，就會選擇唔做，除非果樣野真係真係有反效果啦，咁搶攻功能組別咪係其中一條支線任務。分組點票同小圈子有幾惡，我未出世前已經有講，唔夠膽講話搶議席過半後香港就立即變天，但至少點都拉近左我地同達成五大訴求既距離。所以大家見到朋友同事，問多句，查下自己係咪可以登記成為傳統功能組別選民。
—————————————————————————————
【三、：即使同意搶功能組別議席，目前新界別真係有贏面咩？】
連日嚟唔同戰友在不同界別動員，講少少現時的登記情況⋯⋯全部唔夠。大家做登記前檢查清楚要求同遊戲規則，唔好傻下傻下個人登記但走去填公司票，或者填漏填錯搞到少咗票。綜合消息同埋收到既風，好多朋友都係交漏文件，或者交錯表，錯失機會！！！
1. 批發及零售界：上屆區諾軒挑戰，目前完全唔夠數，一定要動員。但大家要記住：登記公司票時，一間公司只能委任一個人，即係話------如果你已登記公司A，公司B就不能重複委任同一人；個人票方面，據了解黃藍各佔一半，所以可以做新登記的應該盡量做。有資格登記的，必須係「指定屬會」「超過一年」嘅會員，否則亂填都只會白撞。
2. 飲食界：暫時業界動員咗幾百張新增登記，但原來有好多都唔成功。失敗主因係好多朋友搞亂咗個人票同公司票張表。例如好多牌照明明唔係個人持有但走咗去入個人票（員工代老闆登記），或者個人牌走去填公司表。所以，嚴正呼籲飲食界手足，登記時提醒唔好填錯表（個人票：REO41；公司票：REO42）
3. 進出口界：阿布泰手足積極考慮後，建制派大戶「中出」商已經會開始發功，預計3月會動員大量會員登記，各位拜托幫手
4. 體演文出：當然唔夠數。
出版界：北京大動員，某建制圖書商會已經入咗數十張新登記，預計3月會繼續入。大家都知出版界唔大，幾十票其實好多。呢一席，要其他組別搭救
文化界：首先，好重要，原來好多本身係藝發局選民的朋友都無登記到做文化界功能組別選民！所以要召喚藝發局選民登記。（另外雖然最近有部分個人票登記，但果啲似乎唔係手足⋯⋯）另外，有好多個人票交表時資料出錯或者有漏，都影響咗登記。團體票呢社團註冊號碼要填齊、補充文件要有商業登記（要有 M&A）、有限公司（要有 M&A）或社團註冊證明書副本（要有埋會章副本）商業登記或有限公司要有 M&A，另外如果唔係藝發局團體選民，要交六年內嘅資助文件副本，但都係果句：檢查清楚無漏先好交表！！
5. IT界：不同傘後團體（鍵戰、前線科技人員等等）鼓勵下，約有1000多張個人票的新登記。不過，上屆的種票案後，選管會將登記門檻提高，需要提供證明文件（你睇返前線科技人員個Page點講），結果聽聞1000幾個申請有近一半都唔成功，需要補交文件。
6. 工程界：（冷門少少）工程界現任議員盧偉國，工務小組主席，香港過去近五年的大白象工程基建，就係盧博士透過主持會議時保駕護航，令好多爭議工程夾硬通過。即使換得走佢唔代表香港無大白象，但肯定大快人心。暫時業界發動咗幾百張新增登記，不過大家要留意，如果無交會費，唔達會員資格，登記唔到。
7. 衛生服務界由上年至今收到約1000宗新登記，大部分都成功登記為新增選民。
8. 法律界都收到幾百張新登記，但當中有幾多係親北京陣營的動員，不得而知。要繼續努力。
9. 超區：上屆選舉時有新聞講過，唔少選民去到票站臨投票果下先發現，原來自己唔係超區選民。咁係因為上個選舉周期登記時，有 6 萬人揀咗唔要呢票。如果你係果六萬人，又唔係任何傳統功能組別的合資格選民，希望你盡快補登記返做超區選民。
