［王維基卒之有錢賺］都係冇睇錯佢
TL：DR—香港電視搞電視就蝕足咁多年，搞網購先掂。呢啲先係Be Water
1. 即係，都冇乜需要多講，所謂先知就係知早你少少，當然我唔係知道會發盈喜，甚至唔知道轉賺錢。
2. 但，本人就唔玩跟紅頂白。你而家先寫？我廿年前已經講王維基係香港Richard Branson．與其今日（其實昨日已經係）睇啲友講，呢單係呢幾日唯一好消息，不如重溫下我寫嘅文。收費專欄都寫過幾次啦，讀者可以作證。
3. 就算你唔信我廿年前（其實係18年）前因為王維基而走去城市電訊見工（可惜得8千蚊，不了，明顯係我短視，但反正冇請我，證明王維基有眼光）。咁都可以睇返我寫嘅文，或者至少睇下，邊位有去買王維基寫嘅書？仆街，星島出版都去買呀！
4. 好啦，打從肺炎開始，寫過幾篇王維基嘅文，我覺得係不錯嘅：
HKTV市值超過TVB嘅啟示 （https://fbook.cc/3BNZ）
我挺王維基：電視夢碎，焉知非福（https://fbook.cc/3BNa）
匯控已死，維基當立（https://bit.ly/2BRxehH）
5. 真係寫到出晒面，啲題越寫越肉麻，甚至有朋友真係以為王維基科咗水畀我。到底我朋友係睇得起我定睇唔起我？但肯定係睇唔起王維基
6. 我覺得最重要都係講多次，電視夢碎，焉知非福。堅持係好，但搞清楚你想點。一早講過，王維基應該唔係一路夢想做電視大亨（雖然佢應該幾鹹濕，我話嘅）。佢咪就係Richard Branson，火麒麟周身癮。見到邊個行業老撚土咪去搞搞佢，去顛覆佢。補習社又好，教科書又好，長途電話又好，寬頻上網又好，最緊要好玩。
7. 然後就有，歷史由你開始嘅，電視發牌，同埋網購。
8. 高手（梗係王維基，唔係我）嘅，當然要盡力試，但真係唔得，就要斬。係呀又話要堅持又要斬，咪講過N次呢啲嘢多數都矛盾，真實點平衡先係難，否則買李嘉誠致富心得嘅（例如我）發咗達啦。
9. 例如其中一篇我寫，匯控已死，維基當立（https://bit.ly/2ZtuD5z），咪就係who moved my cheese．擺明唔派息架啦，咁你諗住幾時去英倫銀行抗議？倫敦針線街，畀埋地址你。明知樣嘢都走咗，日日鬧就有用？我明，發泄。但你發泄幾耐？匯控啲乜乜小股東，鬧咁耐，個市升咁耐。你錯失幾多機會？派息使乜乞畀畀你？
10. 同理，電視發牌，王維基玩落去，就知唔對路啦。咁點？日日著白衫寫血書抗議？定寫信去白宮情願？
11. 而家應該大多數人都同意我講，王維基冇做電視，係香港人嘅損失。但做咗電視，就會變成佢本人嘅損失（＊）。
12. 寫過了，搞電視嘅，有線無線就不用講，你見其實Now台Viu台都係蝕錢的（https://fbook.cc/3BNc）。王維基去搞，我估都係差不多，可能好過有線無線，但唔會好過李澤楷，子彈都爭好遠。當然搞電視唔只為賺錢，仲有好多過癮嘢。
13. 但你不妨諗下，王維基係乜人。我唔係佢肚條蟲，亦不認識佢，當然唔知。但我舊文寫過佢唔少嘢，大家大約睇到。你可以想像平行時空，王維基搞個台，冇錢賺之蝕，仲要擔驚受怕成日畀人搞—不過，記唔記得，王維基開台嗰時，已經講明唔會搞新聞？你話點解？你話呢？
14. 好，回帶講完。咁之後點？之後？我估OK掛。冇錯之前有讀者都講過相當有保留，香港市場細。係，但其實有時你做好個細嘅市場就夠啦。當然香港市場細係事實，出唔到好似騰訊阿里巴巴之類嘅公司都係事實。但，掉轉，咁唔通所有唔做大陸市場嘅都唔使做生意咩。又唔係嘅。
15. 但同意嘅係，你要搞大，就難好多了。況且仲有一個問題。我多次講王維基係香港Richard Branson，「有冇提過維珍公司啲股價？」。最緊要好玩，盈利未必最緊要，但，上市公司嚟講，又好似最緊要係搵錢了。其實係有內在矛盾的。當然你只係40億市值嘅公司就冇人理你。但之後呢？
16. 所以我估香港電視仲可以壯大，但唔會壯到好大。
17. 呀仲有，啲友關心嘅，cap水。等我地又回帶一次，今年2月，股價因為肺炎炒起時，高位批新股拎咗舊錢（https://bit.ly/2BuzV8X），差不多4億。惹嚟唔少人批評。
18. 你問我嘅，就只能講句，香港就根本唔配有好公司。啲友都智障。睇過《大時代》未？股票必勝法，股市原意係乜？乃讓集資搜資有其地。
19. 再直接啲，股票唔cap水，上市嚟把撚？同證監玩好過癮？你話，喂，IPO咪集資咯。係呀可？一舊錢用幾十年呀可？
20. 根本有抽水有集資嘅股市，先係健康嘅股市。你搞到好似A股咁，有一排新股IPO又停晒，上市嘅公司再集資又唔批，咁你個市場仲用嚟做乜？就真係只係賭場了
21. 嗰時都講過，其實香港電視負債唔重（https://bit.ly/3ihNGbM）。3億貸款，億半存款，凈負債即係億半。講緊15億book，net gearing 11%左右。
22. 但，呢個係舊年年尾嘅時。今年年頭發生乜？肺炎嘛。咁有危有機，有生意機會，梗係做。但點做？請人開倉搞車隊，邊樣唔使錢？
23. 仲有，既然做，就梗係高位嗰時做。點知個市有幾耐好？到時跌到趴街你想拎都拎唔到。咁樣炒到高位，唔集資真係對唔住股東呀。拎到個好時機，撞彩又好乜都好，仲唔係佢功勞？7蚊唔拎錢，唔通2蚊先拎？
24. 事實亦係咁，集完資就股災，之後你要拎錢就難。唔係一早拎咗錢，唔敢話後來就一定睇住機會走，但應該唔會做到咁好。
25. 我估，應該短期都唔使再集資住，不過睇埋中期業績先。固然盈利有成億，2月又印新公仔紙集咗4億，照計財政狀況改善唔少—但唔知中間投資咗幾多嘛。
26. 呀，慎防仲有啲文盲話，唔係喎，公司之前一路蝕錢，累計蝕咗17億喎。而家先賺返1億，幾時先回本？
27. 對於呢啲想法，只能講句，水平太低，世界唔係咁運作。股價就係反映將來，同埋呢刻最新嘅嘢。仲唔明嘅，試下Microsoft 或者蘋果聽日忽然宣佈今年蝕100億，你睇下股價插唔插？「喂明明我之前咁多年賺咗幾千億喎」
28. 個情況，其實同啲人，被炒時，投訴「咁多年功勞」乜乜。即係，好難聽，但一句，「冇撚出糧畀你」？你啲乜乜功勞，咪就係每個月出糧時幫你reset咗，最多年尾計埋花紅畀你。你三十年前啲功勞，又要今日計多次畀你。「咁即係有啲人呃飯食幾十年，公司係咪可以炒佢時叫佢賠返錢？」
29. 呀，真係最好。股票呢，往往就係，蝕錢轉賺錢嗰下轉角位升得最勁。你睇Amazon，Tesla都係咁
（＊）某傳媒人（都有啲地位的）都話，好似我情況，我冇去做傳媒，就係香港傳媒嘅損失。但如果我做咗傳媒，就會變咗個人嘅損失。原文照錄。
————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。
入面有埋圖，有埋恒指標普目標價，教埋資產配置，有埋6隻心水股。有港股有美股有大有細。
請去呢度睇：https://bit.ly/37S4iC5
課程編號：CC002
客服whatsapp: 63832145
