《無二之初》深夜無人小巴（三）
為咗搵返下落不明嘅阿聰，我聽從摯友小Ｉ留低嘅指示，去到某大廈見一位叫做「無二」嘅人。據說，佢係有能力去解決呢類型嘅神秘事件……
「你就係無二先生？」雖然剛才嘅反應已經足夠證明佢係，但我都禮貌性咁確認一次。
「妳仲未答我嘅問題。」無二先生緩緩行到辦公桌旁邊。先除低工作手套，再順勢坐上去。
近距離一望，佢應該比阿聰仲要高上半個頭（接近一九零）。如果唔係一身污糟邋遢嘅清潔服、頭髮凌亂而又滿臉鬍鬚嘅話，實在好難令人相信佢係清潔工人。
老老實實，只要佢肯執下儀容加套合適嘅西裝，話自己係上流社會嘅成功人士應該可以呃到唔少人。
「我朋友……」我再一次佩服小Ｉ，因為佢好似估到會有呢幕咁，「話等你幫完我之後，就會話畀你知佢係邊個。」
「哈。」無二先生聽完一笑，但臉上係冇帶住笑容，純粹係表示了解，「原來而家啲後生要人幫手係咁嘅態度。」
其實你年紀應該唔係大我好多啫──雖然想咁反駁，但呢刻我係有求於人，當然係客氣啲好。
「咁你可唔可以幫我……」
「我嘅職業係清潔。」無二先生打斷咗我，「有時會順便去清理下『怪異』。但『搵人』向來都唔喺我工作範疇之內。除非……」
「……除非？」
雖然對「怪異」兩字都抱有疑問，但而家最重要嘅事都係搵返阿聰。
「我要妳先答我幾條問題。」無二先生起身行過去茶水間，隨手拎咗隻杯同茶包開始沖茶，「等妳答完我再決定幫唔幫妳。」
原先，我以為佢又會問關於小Ｉ嘅事，萬一係咁就會跌入一個永遠都解決唔到嘅輪迴裡面。
「首先，妳同埋妳男朋友嘅全名係咩？」
但我估錯了。
「我男朋友叫做韋家聰。而我……叫做白如初。」
「OK……咁妳係點知道阿聰佢失咗蹤？」一問完，佢突然行過嚟將手上杯茶遞畀我。
「吓？」我有少少愕然。
「我睇得出妳已經好攰。嚟，坐喺梳化度，一路飲茶一路講。」佢建議講。
「嗯。」我點咗下頭，拎走杯茶然後坐喺身後面張梳化上面。
雖然印象中佢沖茶之前應該冇洗到手，但見佢突然變得咁友善，我都唔好意思拒絕。
簡單飲咗啖茶後，我就由凌晨聽到阿聰電話開始，完完整整咁交代返成件事。整個過程無二先生只係默默咁聽，並冇打斷過我，表情亦冇多大變化。
「……最後，就係我收到朋友嘅電話，係佢叫我嚟呢度搵你。佢話……而家只有你先可以幫到我哋。」
「明白晒。」無二先生先瞧咗眼我頭頂嘅掛鐘，再繼續講：「以我所知，近幾年的確係有唔少無人駕駛小巴嘅目擊個案──葵涌、觀塘、數碼港、新娘潭、大棠路……仲有石門。至於點解會發生，不外乎係嗰兩種原因。以妳啱啱所解釋嘅情況，我相信阿聰應該遇上咗其中一種。」
「你咁講，係咪即係代表願意幫我搵……」
「仲有最後一條問題。」無二舉起手打斷我，「其實成件事發生到而家不過係半日時間，點解妳要咁心急去搵阿聰？其實妳大可以耐心等下，或者件事冇妳想像中咁嚴重。又或者，妳嗰位朋友判斷錯誤，其實差佬根本係可以處理到……」
「就喺阿聰打嚟之前……我發咗一場夢。夢入面佢為咗救我，不惜犧牲自己……我覺得呢個夢並唔係巧合。而且……」講到呢度，我用堅定嘅眼神望向無二先生，「我可以肯定，換轉失蹤嗰個係我，阿聰佢一樣都會咁做……一定會。」
聽到呢度，無二先生將手擺喺嘴邊深思起嚟。未幾，佢先微微一笑，然後講：
「妳走喇。」
「吓？」一聽到呢個答案，我當然感到愕然。
「老實講，喺呢件事上面，我真係冇乜嘢可以幫到手。」佢邊講邊行去大門前，然後將門拉開，「請。」
「你！」我激動咁彈起身。因為感覺就好似俾人玩完咁，當然係非常嬲，「你聽咗咁耐，結果就係咁……諗住見死不救！？」
無二並冇回應，睇落係唔打算同我爭論。如果唔係一早放低咗茶杯，我真係可能會忍唔住狠狠咁掉爛佢發洩。
事已至此，我冇理由繼續留喺度俾佢羞辱落去，強忍住眼淚拔腿就衝出走廊。
好快就去到升降機前，明明已經撳咗掣，但部升降機偏偏停喺最頂層郁都唔郁。發悔氣撳多幾下見都係冇反應後，我決定乾脆行樓梯算……
反正只係四層樓，呢刻我只係想盡快離開呢度，離遠呢個咁黑人憎嘅男人……
但離開之後，我仲可以做啲咩？真係好似佢咁講咩都唔做，然後等警察幫手？諗到呢度，我忍唔住拎起手機。先打咗次畀小Ｉ，然後再打畀阿聰……理所當然地，兩個人都係冇接聽。
到我離開大廈嘅時候，我先意識到原來已經天黑了。我諗，阿聰嘅爸爸同堂兄應該好快就會注意到佢並唔係傷心而收埋自己，而係真係出咗事。
喺大街恍恍惚惚咁行咗大半個鐘後，我正好途經一個小巴站。就喺呢一瞬間，唔知係咪因為太擔心阿聰，腦海好似有把聲叫我要等下一架小巴。
我冇諗到太多，相信直覺去等，好快就有部小巴嚟到。我上車先望一望司機位置，確認有人後就畀錢，然後揀咗最後排嘅一角坐低。
雖然阿聰唔係坐呢架小巴，但我記得……佢當時就係坐喺呢個位置。
我靠住窗邊，腦海一片空白，只係聽住小巴播住嘅電台節目：
──現時氣溫十七度，相對濕度百分之七十──
──控方已經完成舉證，被告被裁定表面證供成立──
到下一站停車，我注意到有一個三人家庭嘻嘻哈哈咁笑住上車，最後坐咗喺門旁邊嘅一整排……
──我咁膽講呀，食完嗰間炸豬排，你會覺得香港嗰啲全部垃圾──
──唔知你哋有冇聽過白湖村，唔係講緊廣東省嗰個，而係喺香港──
──如果公投失敗，英國就可能要面臨硬脫歐──
──當年曾經發生過瘟疫，政府封完村就掉低啲村民喺度自生自滅──
──今場迪基亞真係食禁藥喇，清熱酷呀──
──但我有朋友真係見過嗰度仲有人──
──喂，妳真係唔諗住留意下前面？──
一聽到呢把男聲，我重新將目光移向前方。赫然發現嗰個三人家庭無緣無故咁坐後咗一排──父親、母親同小男孩都將身體挺得筆直，仲要一粒聲都唔出……同上車嗰刻比實在有好大分別，令人不寒而慄。
呢一刻，我心跳得好快，先撇過頭望向窗外面。但過咗幾秒又忍唔住偷望一眼……
明明只係幾秒鐘嘅事，嗰三人家庭居然又再坐後咗一排。
成個過程幾乎係冇任何動作，無聲無息……
越坐越近。
（待續）
感謝上集各位咁踴躍去留言 😭 但次次用呢招都唔係幾好。今次換個方法，如果各位係主角如初，面對呢刻嘅處境，你會點處理？唔影響發展的，留個言講下吧～
我哋 100 SHARES 繼續，暫定星期日／一。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
