【你哋有抑鬱症就嚟英國，唔怪之得呢度咁多傷殘人士啦。】
一個人身攻擊甚至歧視嘅Comment，對於我嘅啟示同反思
開咗個Page咁耐，我有乜留言或者inbox我未遇過呢？好激動地死拗做過，好勞氣嬲幾日試過。到今天要响留言或者inbox令我動真氣嘅，其實難度已經好高。大家一定以為厘個comment係五毛或者深藍所寫，其實對方係一個同我一樣係來自香港，不願做中國人嘅係英國人。唔同嘅可能比我年紀大一啲，响英國生活耐一啲。原來佢認為我係嗰啲，因病去英國攞醫療，教育同住屋福利，香港衰就走，大陸好就回流嘅人。
如果我話我無嬲就呃大家或者食咗廿粒鎮靜劑，嗰刻真係嬲到去睇佢個 FB睇下點解低質。甚至諗過開名起底出連相加link出Post，公審佢厘啲咁劣質唔尊重他人嘅歧視行為。但係諗法時間為持咗十幾分鐘，結果我嘅處理方法連自己都估唔到。苦口婆心咁叫佢set番自己FB嘅privacy，勸佢將來唔好响公眾嘅page到講厘啲嘢。現今網絡生態，有名有姓有晒一家大細嘅相咁亂比comment，後果係可以好麻煩同殘忍。而且我真心感覺網絡公審係幾無聊同無品，唔通我要同人地鬥低質咩！
不過佢嘅諗法同身份，亦影響咗我不禁諗下自己嘅身份問題。我覺得自己其實根本就好似蝙蝠一樣，係有翼識飛嘅哺乳類動物（重真係夜晚先出動！），衰啲講就係兩面都不是人。去揀是但一邊位容乜易，重一定有更多固定支持嘅朋友添。只要推銷去咗美好嘅英國，分享永遠過住幸福快樂嘅童話生活。或者不停講香港要幾衰有幾衰，分享大陸要幾差有幾差嘅煽情Post。偏偏我就係兩樣都唔揀，結果就係會係兩邊都唔討好。某啲Post，香港嘅朋友睇到又唔鐘意，另一啲，英國住嘅又唔開心。
關於大陸，我的確係由大陸移民香港嘅第二或第三代。由細到大對大陸嘅感情基礎，都係阿爺同家父所講嘅民國時代同睇書嘅歷史中國。但香港就真正係我出生同成長嘅地方，感情就深極多。好衰唔衰我中學時代就去咗英國讀書，放親長假都番香港。因為居英權幸運地無啦啦做咗個英國人，英國就等如我嘅第二個家。
咁樣我嘅學生年代長時間就夾响八九十年代，最好嘅香港同較差嘅英國。可以話美好輝煌嘅香港我遇過，動蕩不安嘅英國我見過。而我出黎工作嘅所謂人生黃金廿年，就正正由九七前開始。真係睇住香港，由最璀璨糜爛跌低起番身之後自甘墮落。唔洗我再多講，香港依家係變到由生活同政治環境到教育制度，都變到一個荒謬扭曲嘅地步。
到咗今日我「回流」英國定居生活，美期名就真真正正係一個英國人。而英國事實上，亦並非係童話世界人間天堂。都一樣有唔少無稽嘅人和事，也一樣有社會分裂。問題係整體黎講，英國嘅公民識思相對高啲咁解。最好嘅可能係生活環境比較好，而教育上有選擇嘅機會。
我曾經講過，比我揀我係唔會番香港嘅。因為我真係死咗心，有回憶嘅地方同事物都已經消失晒。而我掛住嘅，人大可以黎英國或者約去另一個地方旅行。就算低質到講食買玩，香港亦唔可以滿足我。
雖然我對厘個地方死心，但係我一定唔希望佢變得更差。何況香港畢竟係我嘅鄉下，我又點唔會唔留意下香港嘅嘢呢？而英國事實現在係我嘅家，有趣嘅新聞時事同生活點滴，又點忍得住唔同大家分享呀？
結果我真係去咗一個童話，不過係動物童話故事裡面嘅一隻夜晚出動嘅蝙蝠。大家都知蝙蝠响童話故事係最慘嘅係咩啦，因為佢永遠都唔take side。哺乳類同鳥類都唔認佢係自己友，打起扙上黎兩邊一齊就係打佢先。但係我樂得做厘個角色，因為如果選擇歸邊容易，保持獨立客觀嘅思考能力就非常難。
#連續兩日都係動氣
#睇黎我真係唔多化
#我真係香港人
#亦都係英國人
#重要係好西人
#係鐘意攞黎賤
#選擇做蝙蝠
#竟然話我黎攞福利
#好話唔好聽都係偽中產
#有Batman小小超能力唔通話你知
#Batman超能力係乜自己搵
我真係香港人 在 我係香港人 的必吃
我係香港人。 222935 個讚· 1630 人正在談論這個。我係香港人！我愛香港！ ... <看更多>