《刻片位各別暫 我在必不成功》
CALL4VAN經營至今，多年來離經叛道，自從2014年佔領一役，運送物資支援示威者，繼而多次抽政治水，於立法會屌打政府輕視客貨車行業，改名「CALL6VAN」支持梁天琦，牛頭角大火主動提供居民撤離，以至19-20年徵召數百同路人「家長」，皆因深信「國家興亡，匹夫有責」，未曾有過諗過靠社會事件而斂財或者上位。
我曾經喺唔同嘅訪問講過，儘管年來C4V因我嘅經營不善而未有盈利，仍堅持落去嘅主因，就係14年之後，深信「唔知幾時香港會幾時再有大型社會運動，有社會運動就會需要物流」。5年後言中，儘管香港尚未重光，但同路人已經越嚟越多，而且香港問題已經提升到國際層面，共匪敗退只係時間問題。
此時此刻，見到更多嘅荒謬，恕我已經無力為各位帶嚟黑色幽默，更何況，Facebook入面有更多畀我叻嘅page admin，就此，我個人將會暫別C4V Facebook專頁管理，取而代之會由其他同事出返更多生意同行業相關嘅資訊。
C4V自19年下旬，托各位嘅信任，司機數目增加咗三倍，但因為武漢肺炎肆虐（以及政府隨後製造恐慌嘅愚民措施），前線司機嘅生意不增反跌，因而開拓嘅外賣同物流業務仍處於嚴重虧損狀態。喺全新嘅C4V叫車app推出、同帶住HKTVmall物流經驗嘅戰友未完成新系統之前，我哋必需開源節流，故就近期撐《蘋果》行動，請相信我哋嘅錢已經去咗更值得撐嘅地方。
面對是是非非，從來一笑置之。
既然多位有心人問起，怕影響C4V聲譽，故謹此回應：倒瀉食物整污糟車廂其實小事一樁，但司機要求清潔費就反指司機「敲詐」，然後恐嚇司機聲言報警，聽到呢句我覺得司機屌老母乃人之常情。至於出post再誣衊敝台未有處理8次投訴，假若當真，則衷心多謝小館遇到7次嘅不愉快經驗，從未有人處理投訴，仍然堅持要叫第8次先會出post發洩。西客，大部分都係情緒發洩所以先胡言亂語，唔係第一個，亦唔會係最後一個，實在不足掛齒。
最後，再次衷心多謝各位嘅信任，我並無意捲入是非，抗拒將抗爭商品化，反對盲目「撐黃店」。希望各位支持C4V，並唔係單純係因為立場，而係認同我哋7年來撐自僱司機嘅理念，我哋部份定價貴係因為希望各位關注前線司機嘅經營困難；與此同時，亦希望各位多加批評，我哋做得唔好嘅地方，請基於事實多加批評，唔明就屌到我哋明為止。
希望各位唔會get錯，今次唔係CALL4VAN執笠，相反喺經濟下滑之際，生意上非常需要各位嘅支持。
只不過我個人而言，會花更多嘅時間落去更需要我嘅人，陪伴佢行埋最後一段路，而喺香港有需要嘅時候，我、C4V團隊以及一班同路人就會再次出現。
CALL4VAN創辦人 符棨朝
