要乜就有乜（下）
上集：https://bit.ly/3y9wVqM
有咗錢之後，開始有好多女仔痴埋嚟，但我依然對佢哋冇感覺。
我心裡面只有玲玲。
但佢既然唔鍾意我，我都冇再騷擾佢。
我以為，我呢世都會保持單身。
直到我知道，玲玲患上咗肺癌，病情唔樂觀。
玲玲阿媽哭成淚人，聽講，玲玲以往嘅追求者，都已經消失晒。
我去咗醫院探玲玲，佢瞓喺病床上，虛弱而蒼白。
見到呢一幕，我個心好痛。
原來你愛一個人嗰陣，佢嘅肉體有幾痛苦，你只會更心痛。
於是，我同玲玲講：「我想要你嘅癌細胞。」
玲玲唔明白：「你講乜嘢啊？」
我答：「我話，我寧願我代你病。」
「唔好傻啦。」玲玲一笑置之。
玲玲好快就不藥而癒，醫生檢查過，佢已經冇晒原本過量嘅癌細胞。
相反，唔舒服嘅感覺喺我嘅身體度蔓延。
我都唔想死，馬上去醫院，確診肺癌。
玲玲嚟探我，好困惑咁講：「世事又會咁啱嘅，我啱啱好番，你就病咗，仲要係一模一樣嘅病。」
「我話過，我要代你病丫嘛。」我笑住講。
玲玲唔信：「你講笑㗎啫，邊有得真係代人病。」
我雖然做咗英雄，但我冇諗住做無名英雄。
我將我嘅超能力老實話畀玲玲知，佢當然唔信。
但當我話：「我好想要你條頸鏈」，第二朝我真係拎到佢條頸鏈之後，佢就信咗我。
對於我嘅付出，玲玲既愧疚又感動，好貼心咁照顧我。
更令我驚喜嘅係，我嘅病情漸漸好轉，居然好得番。
我本來打算犧牲條命去救玲玲，點知唔洗犧牲，都救到玲玲。
經歷咁多風浪，玲玲終於俾我打動，答應我嘅追求，拍拖冇幾耐，我就結咗婚。
抱得美人歸，又有無盡嘅錢，我梗係好幸福啦。
直到二十年後，我哋個仔都已經讀中學。
有一日，我早咗返屋企，我聽到玲玲講緊電話：「你就好啦，你同你老公咁恩愛。我……我從來冇愛過我老公。」
嗰一刻，我個心痛到連手上嘅嘢都跌咗落地，甚至唔記得我手上拎住乜嘢。
我衝咗入房，大聲問玲玲：「你從來冇愛過我？」
玲玲呆咗，佢部手機都跌咗地。
喺我一連串嘅質問下，佢終於講出真相。
其實都唔係咩驚天動地嘅真相，只係佢同當年一樣，對我冇感覺。
哪怕我同佢結婚廿年，哪怕佢一直做個賢妻良母，佢都從來冇愛過我。
我問：「咁你點解要同我一齊？」
「你為咗我，連命都唔要。我仲可以同其他人一齊咩？」玲玲反問。
係，玲玲係一個好女仔，佢一向唔鍾意欠人哋嘅人情。
但我以為，我咁多年嘅付出同專一，會感動到佢。
估唔到，佢只係同樣以對家庭嘅付出同專一嚟回報我，偏偏冇愛上我。
玲玲喊住講：「我努力過㗎，但我做唔到。」
我終於意識到，就算我想要乜就有乜，我都冇辦法得到玲玲對我嘅愛。
因為，呢樣嘢本身就唔存在。
如果一個人對你冇感覺，就算你情深如海，就算你感動到佢，就算你同咗佢一齊，
可能到最後，佢都係對你冇感覺。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #要乜就有乜
我個心好痛 在 我的心好痛 - YouTube 的必吃
我的 心好痛. 32K views 9 years ago. jessica winnie. jessica winnie. 184 subscribers. Subscribe. 176. I like this. I dislike this. ... <看更多>