//支持本Page請Click入內文比Clap，已為Medium收費會員請直接Click入內文閱讀，謝謝！//
由朱凱迪、余若薇牽頭，各界突然紛紛自設工場製作布口罩，例如魏綺姍就率領話劇界趕製布口罩應市。但呢種「善舉」結果響網上都掀起咗一場論戰。反對者列出大量數據，指出布口罩阻擋病毒率只有四至五成，同合規格嘅外科手術口罩可以去到八九成係完全唔同級數，鼓吹以布口罩取代外科口罩嘅人甚至係同蔣麗芸「蒸熟口罩翻用」同級，完全係靠害云云。
呢度又要講下香港口罩嘅供應問題。雖然近來有唔少人話各藥房同網店再加埋大大小小嘅NGO陸續番咗貨，令到炒價有所回落，但其實一盒口罩仍然係講緊郁啲去到二三百蚊以上──香港好彩嘅地方係我地響呢個世界入面仍然算係前列嘅富裕國家，所以響呢場鬥有錢嘅全球搶購口罩大賽入面仍然處於優勢；
唔好彩嘅卻係，買得起幾百蚊一盒口罩嘅始終都係中產以上，而正如我之前所預言，隨住口罩日漸短缺，各種次等防疫措施必然係會陸續出現──正如我地經已接受咗用一二百蚊買啲無ATSM認證嘅次貨口罩黎用，布口罩只係其中一種響資源不足下以Deteriorate黎自救嘅方式──就好似經濟學界著名嘅「Geffen Good」爭論入面提到，十六世紀愛爾蘭出現愛爾蘭飢荒前夕，當其他食物供應愈來愈少，無選擇之下大家唯有搶購薯仔成為主要食糧一樣。布口罩響市民相對購買力降低之後需求上升，其實就係所謂「劣等財」inferior good。
究竟製作布口罩係咪罪大惡極？大前提都係你點樣宣傳呢樣嘢。個人認為如果布口罩用黎延長外科口罩嘅使用壽命當然係一件好事，甚至乎響你一個口罩都無嘅時候戴住布口罩頂住先亦無可厚非。而家朱凱迪等人最大問題係過度吹捧、講到布口罩好似係一個解決口罩不足嘅完美Solution、以為戴咗布口罩就一勞永逸，咁就好容易令到有啲市民受到誤導。
但另一方面，好多人鬧點解有人咁白痴連布口罩都去戴，我地就首先要解決一個問題，咁你係咪有充夠嘅口罩提供比佢地？如果唔係就只不過係另一個「何不食肉麋」故事──你係要屌，就應該針住朱凱迪余若薇無強調布口罩只係一個劣等方案，令市民以為就算自己負擔得起都唔需要買番正常口罩去用，破壞社會整體嘅防疫意識。
防疫權威袁國勇早前接受傳媒訪問時曾經表示，「戴番個布口罩都有70%作用，所以唔駛搶外科口罩」，然後你又會發現好多醫學界專家都會不停強調「唔能夠誇大口罩嘅保護能力」、「就算無口罩都唔係世界末日，可以用其他方法去預防感染」，甚至講到「大家放心，連我都無戴口罩」。點解呢班業界人士嘅防疫觀念會同一般市民諗法相差咁遠？除咗有少少離地嘅因素之外（例如話唔去人多地方就得，屌你去唔去好多時唔到你揀），主要就係同防疫概念唔同。
好多醫生都係將感染肺炎視為一個或然率，而各種防疫方法就係一條方程式，只要將呢個機率壓低到一個心安嘅數字就叫成功，至於用咩方法做倒佢地反而唔太注重。
用RPG做比喻，假如戴合格口罩嘅防護力係6嘅話，佢地覺得一樣可以布口罩2、勤洗手3、出街唔好亂掂嘢1黎補足。掉番轉，如果因為戴咗口罩而產生咗錯誤嘅安全感，因而響諸如勤洗手、唔好同高危人士有近距離接觸方面大意咗的話，結果可以仲衰。經濟學者成日個例子講就係，有研究指出戴咗安全帶嘅司機出車禍嘅機會比無戴安全帶嘅更高，原因就在於無戴安全帶嘅司機反而會更加小心道路上安全嘅情況。
當然口罩響整體防護力係佔有幾大部份，係可以各有各詮釋，醫生身處嘅環境、生活條件同一般市民唔同，亦唔一定要照搬過黎。但問題係當而家好多人執著緊外科口罩同布口罩響防護力上面嘅差異時，其實更應該走去呼籲大家要戴眼鏡、甚至眼罩──喂你無論個口防護力谷到幾高都好，對眼零防護係咩玩法？
仲有，如果你真係相信防毒口罩係有用的話，咁你即係假設每次出街都係會有可能比病毒黏附響你口罩上面，而去到目前為止，都無任何一隻口罩嘅表層可以殺死武漢肺炎病毒，而噴任何消毒液卻又會破壞咗口罩結構──基於呢個前提下，你個口罩無論幾時除低，都應該立刻丟咗佢，用紙巾包住佢之後再用根本係極其高危行為──有人話用保鮮袋包住佢幾日之後再用亦係痴線，而家講緊隻病毒可以依附響物件上面9日都唔死呀，仲要未知呢個係咪極限添呀，咁做同玩命其實無乜分別。
講到呢度，當然你同我都知道，除非你係口罩大戶，但用一次口罩就丟根本唔太現實；又我地將所有防疫措施都推到最高標準亦係不切實際，所以去到最尾又係番番去之前醫生個諗法囉：總之大家都係計緊武肺防具嘅總防護力，大家做得幾多得幾多，有啲地方做得唔足，用其他方式補足得倒無話唔得。
最後當然又要提下大家，東方日報早前抽查7款消毒搓手液，發現全部都有大腸桿菌同黃金葡萄球菌，某啲搓手液含菌量仲要高過廁所板──喂原來你件防具質素唔掂的話，仲可能扣番你HP轉頭添呀，點解咁重要嘅新聞竟然無人講？
即係如果你係響外國買啲有牌子嘅搓手液入樽分比人仲好啲，有啲無良商人竟然夠膽死自製搓手液就真係痴撚咗線；知唔知消毒用品一個搞得唔好，係會防疫變播病？而家同你講唔合格嘅搓手液隨時仲衰撚過用隻手抹廁所板呀，唔撚該果啲搵市民條命較飛嘅黃藍屍KOL，回頭是岸啦！
