耐唔耐就會有讀者問，到底荷蘭好唔好住呢？
（更多歐洲/荷蘭生活資訊，立即到https://www.patreon.com/allyblahblah）
其實每個人去到其他地方，住得適唔適應，享唔享受，真係好睇個人。不過，話晒喺香港長大，又喺唔同地方住過，筆者可以簡單地講下荷蘭同香港生活最大嘅分別。
第一，先睇衣食住行。
如果本身鍾意簡單嘅生活方式，其實喺荷蘭會舒服好多。例如，荷蘭人着衫比較易實用為主，雖然有一部份人依然會追求潮流，但相比喺香港或者其他亞洲地方，對潮流嘅要求冇咁誇張。
食嘢方面，之前都講過，荷蘭真係冇乜嘢好食。如果想要食好嘢，好多時候都要「識地方」；呢個我就唔多講喇。
居住方面，喺荷蘭可以享受到嘅私人空間一般會比香港大好多。除咗個別大城市之外，其實好多地方都比較「可以負擔」；不過，同香港一樣，荷蘭近幾年都面對緊房屋供不應求嘅情況，唔少城市樓價節節上升。但如果有一份收入穩定嘅工作，儲幾年錢，要買樓其實又唔係真係咁難。
交通方面，以交通網絡黎計，香港比荷蘭略勝一籌；不論係地鐵、巴士或者其他交通工具，香港都比較平，而且真係非常四通八達。不過，相比之下，大部份荷蘭人主要交通工具係單車，所以對於注重健康生活方式嘅人來講，荷蘭係呢一方面優勝好多。
第二，再睇工作環境。
之前有文章提及過，荷蘭嘅工作生活平衡（ work life balance ）。唔少荷蘭公司，都好着重員工嘅身心健康。所以喺荷蘭會好少出現長期加班、過勞等情況。社會上普遍比較重視民眾嘅心理情況，呢方面嘅教育同意識都比較強。簡單來講，如果你喺工作太大壓力之下，出現唔同情況嘅情緒病症狀，身邊嘅同事甚至乎上司都好容易理解。偶爾都會聽到有人因為過勞可以放幾個月假。
另一方面，喺荷蘭做嘢都有好多有薪假期。而「連續放幾星期假」係當地亦都非常普遍。放假嘅時候真係可以將一切工作相關嘅事務拋諸腦後，唔需要下下睇住部手機檢查電郵。所以喺荷蘭工作，係絕大部份嘅情況之下，都會比香港輕鬆同做得開心。
第三，社會福利制度。
荷蘭係眾多西歐國家之中，其中一個收稅最高嘅國家之一。習慣咗亞洲或者香港地區極低嘅稅收，再對比一下荷蘭嘅稅務，有時候真係會卻步。有啲人會話：「如果我可以享受到當地嘅福利，我交多啲稅都唔緊要」
其實真係當你要交咁多稅嘅時候，你就唔會咁諗㗎啦⋯⋯
要知道，你比嘅大部份稅收，其實係用嚟資助當地人教育、失業津貼、政府房屋等等嘅支出；咁當然，好多社區設施、公共建設、社區清潔等，都係納稅人俾錢。但係有好多「個人」嘅福利，係你冇工作/處於低收入嘅時候先會有。
有人會覺得，正正係因為有錢人交得稅多，窮人有福利，社會先至會和諧同安全。事實上，荷蘭治安遠比英國、法國等發達國家好得多，罪案率低。將收入嘅三至五成攞嚟交稅，值唔值得，就真係見仁見智啦。
最後，難唔難融入社會？
好老實，喺荷蘭如果想融入當地人嘅圈子，會有一定嘅難度。唔少荷蘭人嘅「核心圈子」都係由細玩到大嘅朋友，但係調返轉頭，個個地方都有呢啲情況。如果你住喺大城市，其實身邊好多人都習慣咗係一個「國際氛圍」嘅情況之下生活，又或者本身喺外國生活過，甚至乎有外國嘅伴侶。係呢個情況之下，只要你夠主動，唔怕羞，一樣可以識到好多人。
今次呢篇文章只係好概括地講下荷蘭嘅生活情況。如果大家有興趣了解多啲呢方面嘅資訊，記得讚好同埋留言話我知！
#荷蘭
#荷蘭生活
#歐洲
#歐洲生活
#海外職場
#香港人在歐洲
#香港人在荷蘭
